ކެލިފޯނިއާގެ އައްސޭރިފަށުގައި އޮންނަ، ކަނޑުއަޑީގެ އަލިފާން ފަރުބަދައެއް ދިރާސާކުރަމުންދިޔަ ސައިންސްވެރިންނަށް، ވަރަށް މަދުން ނޫނީ ނުފެންނަ "ބިގްފިން ސްކުއިޑް" އެއް ފެނިއްޖެ އެވެ.
"ޕީޕަލް" މަޖައްލާއިން ރިޕޯޓްކޮށްފައިވާ ގޮތުގައި، މޮންޓެރޭ ބޭ އެކުއޭރިއަމް ރިސާޗް އިންސްޓިޓިއުޓްގެ ދިރާސާވެރިންނަށް މި މަހާ ދިމާވީ، ކަނޑުއަޑީގެ އަލިފާން ފަރުބަދައެއް ކަމަށްވާ ޑޭވިޑްސަން ސީމައުންޓް ކައިރީގައިވާ ފުން ސަރަހައްދުތައް ސާވޭ ކުރަމުން ދަނިކޮށެވެ.
ޑޭވިޑްސަން ސީމައުންޓަކީ ކެލިފޯނިއާގެ ރަށެއް ކަމަށްވާ މޮންޓެރޭގެ ހުޅަނގު ދެކުނުން ގާތްގަނޑަކަށް 80 މޭލު ދުރުގައި އޮންނަ، މޮންޓެރޭ ބޭ ނޭޝަނަލް މެރިން ސަންކްޗުއަރީގެ ތެރޭގައި ހިމެނޭ ތަނެކެވެ.
އެމް.ބީ.އޭ.އާރް.އައިގެ ޕޯސްޓްޑޮކްޓޯރަލް ފެލޯއެއް ކަމަށްވާ އޮލްވިއާ ސޯރޭސް ޕެރޭރާ ބުނި ގޮތުގައި، އޭނާ ކޮންޓްރޯލް ރޫމްގެ ސްކްރީންތަކުގެ ކައިރީގައި އިށީނދެގެން އިންދާ، ވީޑިއޯގެ މަތީ ކަނުން ބޯވަދިލަމަހެއްގެ އަތްތަކެއް ފަދަ އެއްޗެއް ފެންނަން ފެށި އެވެ.
ފުރަތަމަ އެއީ ޖެލީފިޝްއެއް ކަމަށް އޭނާއަށް ހީވި ނަމަވެސް، އޭގެ ބައިތައް ފެންނަން ފެށުމާއެކު އެއީ ބޯވަދިލަމަހެއް (ސްކުއިޑް) ކަން އޭނާއަށް ވަގުތުން ކަށަވަރުވި އެވެ.
މި ބޯވަދިލަމަސް ފެނުނުއިރު، އޭގެ ދެ ބޮޑު ފިޔަގަނޑާއި، ފަހަތަށް ދެމިފައިވާ ޓެންޓަކަލް ބޭނުންކޮށްގެން ދަތުރުކުރަމުން ދިޔަ އެވެ.
އެމް.ބީ.އޭ.އާރް.އައިގެ "ޑޮކް ރިކެޓްސް" ނަމަކަށް ކިޔާ، ދުރުން ކޮންޓްރޯލްކުރާ ކަނޑުއަޑީގެ އުޅަނދުގެ ކެމެރާތަކަށް މި ބޯވަދިލަމަސް ފެނިފައިވަނީ ކަނޑުގެ ދެ މޭލަށްވުރެ ފުން ސަރަހައްދަކުން، ގާތްގަނޑަކަށް 10,751 ފޫޓު އަޑިންނެވެ. ސައިންސްވެރިން އަންދާޒާކުރާ ގޮތުގައި، އޭގެ އަތްތަކުގެ ކުރިން ފެށިގެން މަތީ ކޮޅާ ހަމައަށް މި މަހުގެ ދިގުމިނުގައި ގާތްގަނޑަކަށް 4.1 ފޫޓު ހުއްޓެވެ.
