ދުނިޔޭގައި މިހާތަނަށް އުފެއްދި އެންމެ ބާރުގަދަ ސޯލާ ޓެލެސްކޯޕް ބޭނުންކޮށްގެން، ސައިންސްވެރިން ވަނީ މީގެ ކުރިން ދުވަހަކުވެސް ފެނިފައި ނުވާ ފަދަ އިރުގެ ތަފްސީލީ މަންޒަރުތަކެއް ރެކޯޑުކޮށްފަ އެވެ.
މި ފޮޓޯތަކާއި ވީޑިއޯތަކުން ފެންނަނީ، މީގެ ކުރިން ދެނެގަނެވިފައި ނުވާ ފަދަ ގޮތަކަށް އިރުގައި އުފެދިފައިވާ "ވޯލްޕޫލް" ނުވަތަ ބާރުގަދަ ތޫފާންތަކެއް ފަދަ ހަރަކާތްތަކެކެވެ.
މިއީ އިރުގައި ހުންނަ ހޫނު ގޭސްތަކުގެ ހަރަކާތްތަކުގެ ސަބަބުން، އިރުގެ މެގްނެޓިކް ފީލްޑަށް ނުވަތަ ދަމާބާރަށް އަންނަ ބަދަލުތަކުގެ ސަބަބުން އުފެދޭ ހަރަކާތްތަކެކެވެ.
މެދުކެނޑުމެއް ނެތި ހިނގާ މި އެނބުރުންތަކަކީ އިރުން ބޭރުވާ ބާރުގަދަ ހަކަތައިގެ މައިގަނޑު ސަބަބެވެ. މީގެ ސަބަބުން އުފެދޭ "ސްޕޭސް ވެދާ" ނުވަތަ މޫސުމީ ބަދަލުތަކުގެ ސަބަބުން ދުނިޔޭގެ ކަރަންޓު ނެޓްވޯކްތަކަށާއި ސެޓެލައިޓްތަކަށް ބުރޫއަރައި، ފަޒާގައި އުޅޭ އެސްޓްރޮނޯޓުންނަށް ޖިސްމާނީ ގެއްލުންތަކެއް ލިބުމުގެ ފުރުސަތު އޮވެ އެވެ.
އެމެރިކާގެ ނޭޝަނަލް ސޯލާ އޮބްޒަވޭޓަރީ (އެންއެސްއޯ) ގެ ޑޮކްޓަރު ޑޭވިޑް ބޮބޮލްޓްޒް ވިދާޅުވި ގޮތުގައި، އެ ހުރިހާ ހަކަތައަކާއި ފަޒާގެ މޫސުމީ ބަދަލުތަކުގެ އަސްލަކީ އިރެވެ.
އޭނާ އިތުރަށް ވިދާޅުވީ، އިރުގެ މިފަދަ ތަފްސީލީ މަންޒަރުތައް ނެގުމުގެ ސަބަބުން، ފަޒާގެ މޫސުމަށް އަންނަ ބަދަލުތަކަށް ތައްޔާރުވުމަށް ބޮޑު އެހީތެރިކަމެއް ލިބޭނެ ކަމަށެވެ.
"ފަޒާގެ މޫސުން ދެނެގަނެ، ކުރިއަށް އޮތްތަނުގައި އެކަންކަން ލަފާކުރުމަށްޓަކައި، އިރުގެ ފިޒިކްސް އަހަރެމެން ދަސްކުރަން ބޭނުންވޭ،" ޑޮކްޓަރު ޑޭވިޑް ވިދާޅުވި އެވެ.
"ނޭޗާ" ޖާނަލްގައި ޝާއިއުކޮށްފައިވާ މި ހޯދުންތައް ހޯދާފައިވަނީ ހަވާއީގެ އުސް ފަރުބަދައެއްގެ މަތީގައި ބިނާކޮށްފައިވާ "އިނޯއީ ސޯލާ ޓެލެސްކޯޕް" ބޭނުންކޮށްގެންނެވެ. އެ ސަރަހައްދަކީ ހިރަފުހުން ސަލާމަތްވެފައިވާ، ސާފު ނޫއުޑެއް އޮންނަ ތަނެކެވެ.
