އިނގިރޭސި ލަވަކިޔުންތެރިޔާ އެޑް ޝީރަންގެ ޓުއާއިން އެމެރިކާގެ ރެޕް އާޓިސްޓް މެކްލްމޯ އުނިކުރުމާ ގުޅިގެން އުފެދުނު ހޫނު ބަހުސްތަކަށް ފަހު، މެކްލްމޯގެ "ފްރީ ޕަލެސްޓައިން" ޓުއާ އަޔަލޭންޑްގެ ޑަބްލިންގައި ފަށައިފި އެވެ.
ޑަބްލިންގެ "3 އެރީނާ" ގައި ބޭއްވި މި ކޮންސެޓަށް 13،000 އެއްހާ މީހުން ހާޒިރުވިއިރު، މިއީ ހުރިހާ ޓިކެޓެއް ވިކި ހުސްވެފައިވާ ޝޯއެކެވެ. މި ޝޯގައި ހައިރާންކުރުވަނިވި ގިނަ ފަންނާނުންތަކެއް ފެންނާނެ ކަމަށް މެކްލްމޯ ކުރިން ވަނީ ބުނެފަ އެވެ.
އަސްލު ނަމުން ނަމަ ބެންޖަމިން ހެގަަޓީ، އޭނާގެ މި ޓުއާ އިއުލާންކުރީ އެޑް ޝީރަންގެ "ލޫޕް ޓުއާ" އިން އޭނާ ވަކިކުރިތާ މަދު ދުވަސްކޮޅެއްގެ ތެރޭގަ އެވެ. ޝީރަންގެ ޓުއާއިން އޭނާ އުނިކުރީ ސްޓޭޖް މަތީގައި ފަލަސްތީނަށް ތާއީދުކޮށް ވާހަކަދެއްކުމާ ގުޅިގެންނެވެ.
ދެ ކޮންސެޓެއްގައި "ފްރީ ޕަލެސްޓައިން" އޭ ބުނުމާއި، ދެއްކި ވާހަކަތަކުގެ ސަބަބުން ޔަހޫދީ ޖަމާއަތްތަކުގެ ފާޑުކިޔުން މެކްލްމޯއަށް ވަނީ އަމާޒުވެފަ އެވެ. އޭނާ ވަނީ އިޒްރޭލުން ގާޒާގައި ހިންގާ އަސްކަރީ ހަރަކާތްތަކުގައި މަރުވާ މީހުންގެ އަދަދަށް އިޝާރާތްކޮށް، އެއީ ނަސްލު ނައްތާލުމުގެ އަމަލެއް ނުވަތަ ޖެނޮސައިޑެއްގެ ގޮތުގައި ސިފަކޮށްފަ އެވެ. ނަމަވެސް އިޒްރޭލުން އެ ތުހުމަތުތައް ދޮގުކުރެ އެވެ.
އެޑް ޝީރަން ފަހުން ބުނެފައިވާ ގޮތުގައި، މެކްލްމޯ ޓުއާއިން އުނިކުރުމުގެ ނިންމުމަކީ އޭނާގެ އަމިއްލަ ނިންމުމެއް ނޫން ކަމަށާއި، އެއީ ޕްރޮމޯޓަރުން ނިންމި ނިންމުމެކެވެ.
މެކްލްމޯގެ ޑަބްލިން ޝޯގައި އޭނާއާއެކު ފެނިގެންދިޔަ ފަންނާނުންގެ ތެރޭގައި ލަވަކިޔުންތެރިޔާ ހޯޒިއާ އާއި، ރެޕް ގްރޫޕް "ނީކެޕް" ގެ އިތުރުން ފޯކް ބޭންޑް "ބިއޯގާ" ހިމެނެ އެވެ. ބިއޯގާ އަކީ މީގެ ކުރިން އެޑް ޝީރަންގެ ޓުއާގައި ވެސް ހުށަހަޅައިދީފައިވާ ބޭންޑެކެވެ.
މެކްލްމޯ ބުނެފައިވާ ގޮތުގައި އޭނާގެ "ފްރީ ޕަލެސްޓައިން" ޓުއާއިން ލިބޭ ހުރިހާ ފައިސާއެއް ހަދިޔާކުރާނީ ފަލަސްތީނުގެ ރައްޔިތުންނަށް އެހީތެރިކަން ފޯރުކޮށްދޭ ޖަމިއްޔާތަކަށެވެ.
މި ޓުއާގެ ދަށުން އޭނާ ދެން ހުށަހަޅައިދޭނީ އަންނަ ބުރާސްފަތި ދުވަހު ފަރަންސޭސިވިލާތުގެ ޕެރިހުގައާއި ހުކުރު ދުވަހު އިނގިރޭސިވިލާތުގެ ލަންޑަނުގަ އެވެ.
