އޫރެއްގެ ހަށިގަނޑުން ނަގައިގެން އިންސާނެއްގެ ގަޔަށް ބަދަލުކުރި ކިޑްނީއެއް، އެ މީހާގެ ހަށިގަނޑުގައި 271 ދުވަސް ވަންދެން މަސައްކަތްކޮށްފައިވާ ކަމަށާއި، މިއީ މިހާތަނަށް ރެކޯޑް ކުރެވުނު އެންމެ ދިގު މުއްދަތު ކަމަށް އެމެރިކާގެ ޑޮކްޓަރުން ބުނެފި އެވެ.
މި އޮޕަރޭޝަން ކުރި ޓިމް އެންޑްރޫސް ބުނި ގޮތުގައި، މި ޓްރާންސްޕްލާންޓުގެ ސަބަބުން އޭނާއަށް އާ އުންމީދެއް ލިބި، ލޭ ސާފުކުރުމަށް ނުވަތަ ޑަޔަލަސިސް ހެދުމަށް ކޮންމެ މަހަކު ހޮސްޕިޓަލަށް ދާންޖެހޭ ދިއުމުން ސަލާމަތްވި އެވެ.
މެސް ޖެނެރަލް ބްރިގަމް ހޮސްޕިޓަލުގެ ޓީމުން ބުނާ ގޮތުގައި، މި ދިރާސާގެ ނަތީޖާއިން ދައްކައިދެނީ އިންސާނެއްގެ ގަޔަށް ބަދަލުކުރާނެ އިންސާނީ ގުނަވަނެއް ލިބެންދެން، އޫރުގެ ގުނަވަންތައް ވަގުތީ ހައްލެއް ނުވަތަ "ބްރިޖެއް" ގެ ގޮތުގައި ބޭނުންކުރެވިދާނެ ކަމެވެ.
ނަމަވެސް، އެންޑްރޫސްގެ ހަށިގަނޑަށް ލެއްވި އޫރުގެ ކިޑްނީ ފަހުން މަސައްކަތް ކުރުން ހުއްޓާލުމުން އެ ނަގަން ޖެހުނެވެ. އެއަށްފަހު އިންސާނެއްގެ ކިޑްނީއެއް ލިބެންދެން އޭނާ ކުޑަ ދުވަސްކޮޅަކަށް އަލުން ޑަޔަލަސިސް ހަދަން ޖެހުނެވެ.
ގުނަވަންތައް ބަދަލުކުރުމަށް ބޭނުންވާ އިންސާނީ ގުނަވަންތައް ލިބުން ދަތިވެފައިވާތީ، ޑޮކްޓަރުންނާއި ސައިންސްވެރިން ދަނީ އެހެން ދިރޭތަކެތީގެ ގުނަވަންތައް އިންސާނުންގެ ގަޔަށް ބަދަލުކުރުން ނުވަތަ "ޒެނޯޓްރާންސްޕްލާންޓޭޝަން" އާ ގުޅޭ ދިރާސާތައް ކުރަމުންނެވެ.
އެމެރިކާގައި އެކަނިވެސް ގާތްގަނޑަކަށް 100،000 މީހުން ކިޑްނީއެއް ލިބޭނެ ދުވަހެއްގެ އިންތިޒާރުގައި ތިބި އިރު، ކޮންމެ އަހަރަކު ކުރެވެނީ އެންމެ 25،000 ޓްރާންސްޕްލާންޓެވެ. އަދި އިނގިރޭސިވިލާތުގައި 7،000 އަށްވުރެ ގިނަ މީހުން ކިޑްނީ ޓްރާންސްޕްލާންޓް ލިސްޓުގައި އެބަތިއްބެވެ.
އެންޑްރޫސްއަށް ކުރިން މައުލޫމާތު ލިބިފައިވާ ގޮތުގައި، ކިޑްނީ ލިބޭ މީހުންގެ ލިސްޓުގެ ކުރިއަށް އެރުމަށް ހަތް އަހަރު ނަގާފާނެ އެވެ. ނަމަވެސް، ޑަޔަލަސިސް ހަދާ މީހުން އާންމުކޮށް ދިރިތިބެނީ އެވްރެޖްކޮށް ފަސް އަހަރު ދުވަހު އެވެ.
ޒެނޯޓްރާންސްޕްލާންޓޭޝަންއަށް އެންމެ އެކަށީގެންވާ ޖަނަވާރަކީ އޫރު ކަމަށް ބެލެވެ އެވެ. އެއީ އޫރުގެ ގުނަވަންތަކުގެ ސައިޒު އިންސާނުންގެ ގުނަވަންތަކާ ގާތްކުރާތީއާއި، އޫރު ގެންގުޅެ ބޮޑުކުރުމުގެ ތަޖުރިބާ ގިނަ އަހަރުތަކެއް ވަންދެން ލިބިފައިވާތީ އެވެ.
އެހެންނަމަވެސް، އާދައިގެ ފާމެއްގައި އުޅޭ އޫރެއްގެ ކިޑްނީ ނަގައިގެން އިންސާނެއްގެ ގަޔަށް ބަދަލެއް ނުކުރެވޭނެ އެވެ. އެއީ އިންސާނާގެ ދިފާއީ ނިޒާމުން އެއީ ނުރައްކާތެރި އެއްޗެއްކަން ވަގުތުން ދެނެގަނެ، އެ ކިޑްނީ ހަލާކުކޮށްލުމަށް ވަރުގަދަ ހަމަލާއެއް ދޭނެތީ އެވެ. މިފަދަ ހާލަތެއްގައި، ކިޑްނީގެ ސެލްތައް ފަޅައިގެން ގޮސް، އެތެރެއިން ލޭ ގަނޑުވެ، މަދު މިނެޓުކޮޅެއްގެ ތެރޭގައި ކިޑްނީ ކަޅުވެގެންދާނެ އެވެ.
މިކަމަށް ހައްލެއް ހޯދުމަށް، ދިރާސާކުރާ ފަރާތްތަކުން ވަނީ "ޔޫކަޓާން މިނިއޭޗަ" އޫރުތަކެއް އުފައްދާފަ އެވެ. މި އޫރުތަކުގެ ޖީންތަކަށް 69 ބަދަލެއް ގެނެސްފައިވަނީ، އެތަކެތީގެ ގުނަވަންތައް އިންސާނުންގެ ގުނަވަންތަކާ އެއްގޮތް ކުރުމަށެވެ.
މި ބަދަލުތަކުގެ ތެރޭގައި، އިންސާނާގެ ދިފާއީ ނިޒާމަށް ފާހަގަކުރެވޭ އޫރުގެ ސެލްތަކުގެ ބައެއް ސިފަތައް އުނިކުރުމާއި، އޫރުގެ ޓިޝޫތައް ދިފާއީ ނިޒާމަށް ސިއްރުކުރުމަށްޓަކައި އިންސާނީ ޑީއެންއޭގެ ބައެއް އިތުރުކުރުން ހިމެނެ އެވެ. މީގެ އިތުރުން، އޫރުގެ ޑީއެންއޭގެ ތެރޭގައި ފޮރުވިފައި ހުންނަ ވައިރަސްތަކުގެ ސަބަބުން އިންސާނާއަށް ބަލިޖެހުން ހުއްޓުވުމަށްޓަކައި އިތުރު ބަދަލުތައް ވެސް ވަނީ ގެނެސްފަ އެވެ.
ޓިމް އެންޑްރޫސްއަކީ ޓައިޕް 2 ހަކުރުބަލީގެ ސަބަބުން ކިޑްނީ ފެއިލްވެ، ބަލީގެ އެންމެ ފަހު މަރުހަލާގައި ހުރި މީހެކެވެ.
އޭނާގެ ހަށިގަނޑަށް އޫރުގެ ކިޑްނީ ލެއްވީ 25 ޖެނުއަރީ 2025 ގައެވެ. އެއިރު އޭނާގެ އުމުރަކީ 66 އަހަރެވެ.
ލެންސެޓް މެޑިކަލް ޖާނަލްގައި ދާދިފަހުން ޝާއިއުކުރި މައުލޫމާތުތަކުން އެނގޭ ގޮތުގައި، އޭނާގެ ހަށިގަނޑަށް ލެއްވި އޫރުގެ ކިޑްނީ ވަގުތުން މަސައްކަތް ކުރަން ފެށި އެވެ.
އެ ކިޑްނީ 271 ދުވަސް ވަންދެން މަސައްކަތް ކުރުމަށްފަހު، އެ އަހަރުގެ އޮކްޓޫބަރު މަހު ވަނީ ނަގާފަ އެވެ. އެއަށްފަހު ޓިމް 82 ދުވަސް ވަންދެން ޑަޔަލަސިސް ހެދުމަށްފަހު، މިއަހަރުގެ ޖެނުއަރީ މަހު އޭނާއަށް ވަނީ އިންސާނެއްގެ ކިޑްނީއެއް ލިބިފަ އެވެ. މިހާރު އެ ކިޑްނީ ދަނީ ރަނގަޅަށް މަސައްކަތް ކުރަމުންނެވެ.
އޮޕަރޭޝަނަށްފަހު ކުރީކޮޅު، އެންޑްރޫސްގެ ދިފާއީ ނިޒާމުން އެ ކިޑްނީ ބަލައިނުގަންނަން އުޅޭކަމުގެ ނިޝާންތަކެއް ފެނުނު ނަމަވެސް، ބޭސްތަކަށް ބަދަލު ގެނެސްގެން އެކަން ވަނީ ކާމިޔާބުކަމާއެކު ހައްލުކޮށްފަ އެވެ.
ނަމަވެސް، ގާތްގަނޑަކަށް ހަ މަސް ދުވަސް ފަހުން ކިޑްނީގެ ލޭހޮޅިތަކަށް ގެއްލުންވެ، ކިޑްނީ ދުޅަވެ، މަސައްކަތް ހުއްޓެން ފެށި އެވެ.
މިކަން މިހެން ދިމާވި ސީދާ ސަބަބެއް އަދި ސާފެއް ނުވެ އެވެ. ސަބަބަކީ އޫރުގެ ކިޑްނީއަށް ހަމަލާދޭ އެންޓިބޮޑީޒްތަކެއް ހަށިގަނޑުން ފެނިފައި ނުވާތީ އެވެ.
