ހަށިގަނޑުގެ ބަރުދަން ލުއިކުރުމާއި، ލުއިކުރާ ބަރުދަން އެގޮތުގައި ހިފެހެއްޓުމަކީ ވަރަށް އުނދަގޫ ކަމެކެވެ. ސައިންސްވެރިން މިހާރު ވަނީ މީގެ ސަބަބެއް ކަމަށް ވެދާނެ ކަމެއް ހޯދާފަ އެވެ.
މީދާ ބޭނުންކޮށްގެން ހެދި ދިރާސާއަކުން ދައްކާ ގޮތުގައި، މާބޮޑަށް ފަލަވުމުގެ ސަބަބުން "މެކްރޯފޭޖަސް" ކިޔާ ދިފާއީ ސެލްތަކަށް ދާއިމީ ބަދަލުތަކެއް އާދެ އެވެ. މީގެ ސަބަބުން ސަރުބީގެ ޓިޝޫތައް އާންމު ހާލަތުގައި މަސައްކަތް ކުރުމަށް އެހީތެރިވެދޭ ނިޒާމަށް ބުރޫއަރަ އެވެ.
އެންމެ ފާހަގަކޮށްލެވޭ ކަމަކީ، މާބޮޑަށް ފަލަވެފައިވާ މީދާތަކަށް ސަރުބީ މަދު ކާނާ ދޭން ފެށުމުން ވެސް މި ބަދަލުތައް ސެލްތަކުގައި ދެމިހުރުމެވެ. މިއީ ބަރުދަން ލުއިކުރުމަށް އެ މީދާތަކަށް އުނދަގޫވި ސަބަބު ކަމަށް ވެދާނެ ކަމަށް ދިރާސާގައި ބުނެފައިވެ އެވެ.
ދިރާސާ ކުރި ފަރާތްތަކުން ބުނާ ގޮތުގައި، ސެލްތަކުގައި ހުންނަ މި "އޮބީސިޓީ މެމޮރީ" ނުވަތަ ފަލަވުމުގެ ހަނދާނުގެ ސަބަބުން، ހަށިގަނޑުގެ ސަރުބީ ވިރުވައިލުމަށް ހުރަސްއަޅާ ސަބަބު ބަޔާންކޮށްދެވިދާނެ އެވެ.
ފަލަވުމާ ގުޅޭ ޖެނެޓިކްސް މާހިރެއް ކަމަށްވާ ޑރ. އަމެލީ ބޮންފޮންޑް ބީބީސީ ސައިންސް ފޯކަސްއަށް ވިދާޅުވީ، މީދާ ބޭނުންކޮށްގެން ހެދި މި ތަޖުރިބާތަކުން ސެލްތަކުގައި ފަލަވުމުގެ ހަނދާން ހަރުލާފައި ހުންނަ ގޮތުގެ "އާ" އަދި "ބާރުގަދަ ހެކިތަކެއް" ލިބިފައިވާ ކަމަށެވެ.
ސަރުބީގެ ޓިޝޫތަކުގައި ހުންނަ މެކްރޯފޭޖަސް ސެލްތަކުން ގިނަ މަސައްކަތްތަކެއް ކުރެ އެވެ. އޭގެ ތެރޭގައި މަރުވެފައިވާ ސެލްތައް ނައްތާލުމާއި، ސަރުބީ ވިރުވައިލުމަށް އެހީތެރިވެދޭ މާއްދާތައް އަލުން ހޯދައިދިނުން ހިމެނެ އެވެ.
ނަމަވެސް، މި ސެލްތައް އާންމު ގޮތެއްގައި މަސައްކަތް ކުރުމަށްޓަކައި "އަލްޓަނޭޓިވް ސްޕްލައިސިން" ކިޔާ މަރުހަލާއެއް ފުރިހަމަކުރަން ޖެހެ އެވެ. މިއީ ސެލްތަކުގައި ހުންނަ ޖެނެޓިކް ކޯޑުތަކުގެ ކޮޕީ ނަގައި، ތަފާތު ގޮތްގޮތަށް އެ އަތުރާލުމަށް އެހީތެރިވެދޭ މަރުހަލާއެކެވެ. މިކަމުގެ ސަބަބުން އެންމެ ޖީނަކުން ތަފާތު ބަޔޮލޮޖިކަލް މޮލިކިއުލްތައް އުފައްދައިދޭއިރު، މިއީ ސެލްތަކުގެ އާންމު މަސައްކަތްތަކަށް ކޮންމެހެން ބޭނުންތެރި ކަމެކެވެ.
ދިރާސާވެރިން މާބޮޑަށް ފަލަ މީދާތަކުގެ ސަރުބީގައި ހުރި މެކްރޯފޭޖަސް ސެލްތައް ތަހުލީލު ކުރިއިރު، ހިކިކޮށް ތިބި މީދާތަކާ ހިލާފަށް، ފަލަ މީދާތަކުގެ ސެލްތަކުގައި މި މަރުހަލާ ކުރިއަށް ދިއުމުގައި ދާއިމީ މައްސަލަތަކެއް ހުރިކަން ފާހަގަކުރެވުނެވެ.
މި ޓީމުން ދެން ދިރާސާކުރީ އިންސާނުންގެ ހަށިގަނޑުގައި ވެސް މިފަދަ ކަމެއް ހިނގާތޯ ބެލުމަށެވެ. ފަލަ މީހުންނާއި ހިކި މީހުންގެ ސަރުބީގެ ޓިޝޫ ސާމްޕަލްތައް ތަހުލީލު ކުރިއިރު، އިންސާނުންގެ މެކްރޯފޭޖަސް ސެލްތަކުން ވެސް މިފަދަ ތަފާތުތަކެއް ފެނިފައިވެ އެވެ.
އެހެންނަމަވެސް، ޑރ. ބޮންފޮންޑް ވިދާޅުވީ އިންސާނުންގެ ޓިޝޫ ބޭނުންކޮށްގެން ހެދި ތަޖުރިބާތަކާ މެދު ސުވާލު އުފެދޭ ކަމަށާއި، އެއީ މި ދިރާސާގައި ހުރި "ބޮޑު އުނިކަމެއް" ކަމަށެވެ. އޭނާ ވިދާޅުވި ގޮތުގައި މި ހޯދުންތައް ބިނާވެފައިވަނީ ހަމައެކަނި ގުޅުންތަކެއްގެ މައްޗަށެވެ. އަދި އުމުރާއި ޖިންސު ފަދަ މުހިންމު ކަންކަމަށް މި ދިރާސާގައި ރިއާޔަތްކޮށްފައި ނުވާކަން އޭނާ ފާހަގަކުރެއްވި އެވެ.
މައުލޫމާތު: ބީބީސީ ސައިންސް ފޯކަސް
