ބަޖެޓު ސަޕޯޓަށް ފައިސާ ހޯދަން ކުރީ ސަރުކާރުން ސްޓޭޓް ބޭންކް އޮފް އިންޑިއާއަށް ވިއްކި 150 މިލިއަން ޑޮލރުގެ ޓީ-ބިލުތަކަށް އެރި 45 މިލިއަން ޑޮލަރުގެ އިންޓްރެސްޓު ދެއްކީ އެ ގައުމުން ކަމަށް އިންޑިއާ ސަރުކާރުން މިއަދު ބުނެފި އެވެ.
މީގެ ހަތް އަހަރު ކުރިން 2019 ވަނަ އަހަރު ނެގި އެ ލޯނުގެ އިންޓްރެސްޓް ދެއްކީ އިންޑިއާ ސަރުކާރުންކަން ކަށަވަރުކޮށްދެއްވީ އެގައުމުގެ އެކްސްޓާނަލް އެފެއާޒް މިނިސްޓްރީގެ ތަރުޖަމާނު ރަންދިރް ޖައިސްވާލް އެވެ.
"މި ޓްރެޝަރީ ބިލުތަކުގެ ޕްރިސިޕަލް އެމައުންޓު ދެއްކީ ދިވެހި ސަރުކާރުން. އެކަމަކު މި ހުރިހާ ޓްރެޝަރީ ބިލަކަށް މިދިޔަ ފަސް އަހަރު ޖެހުނު އިންޓްރެސްޓް ދެއްކީ އިންޑިއާއިން. އިންޑިއާ ސަރުކާރުން ދެއްކީ ގާތްގަނޑަކަށް 45 މިލިއަން ޑޮލަރު،" ޖައިސްވާލް ވިދާޅުވި އެވެ.
ޓީ-ބިލުތައް ފައިސާ ދެއްކީ، ފައިސާ ދެއްކުން ހަ ފަހަރެއްގެ މަތިން ފަސް ކުރުމަށްފަހު އެވެ. އެ ލޯނުގެ ފުރަތަމަ ޕޭމަންޓު ދެއްކީ ޖެނުއަރީ، 2024، ގަ އެވެ. އެއީ 50 މިލިއަން ޑޮލަރެވެ. ދެ ވަނަ ޕޭމަންޓަށް ވެސް ހަމަ 50 މިލިއަން ޑޮލަރު ދެއްކީ މެއި 11، 2026، ގަ އެވެ.
އިންޑިއާއަށް ދައްކަންޖެހޭ 50 މިލިއަން ޑޮލަރު ދެއްކުމަށްފަހު ވެރިކަން ކުރާ ޕީޕަލްސް ނެޝަނަލް ކޮންގްރެސް އިން އިއްޔެ ވަނީ އުފާ ފާޅުކޮށްފަ އެވެ. އަދި ސަރުކާރުގެ ވަރަށް ގިނަ އޮފިޝަލުން ސޯޝަލް މީޑިއާގައި ވެސް އެ ވާހަކަ ދެއްކި އެވެ.
ނަމަވެސް އެ ދަރަނި އަދާކުރުމުން ދައުލަތުގެ ރިޒާވް މައިނަސްވެފައިވާ ކަމުގެ އަޑުތައް ދަނީ ފެތުރެމުންނެވެ. ކުރީގެ ރައީސް މުހައްމަދު ނަޝީދު ވިދާޅުވީ އެ ދަރަނި ދެއްކީ ބީއެމްއެލްގައި ހުރި އާންމުންގެ ޑޮލަރު ބޭނުންކޮށްގެން ކަމަށެވެ.
އެއާއެކު، ވިޔަފާރިވެރިން މުދާ ގަންނަން ބޭރަށް ޑޮލަރު ނުފޮނުވޭކަމުގެ އަޑުތައް ވެސް ވަނީ ގަދަވެފަ އެވެ. އަދި ވިޔަފާރިވެރިންގެ އަމިއްލަ ޑޮލަރު ސަރުކާރުގެ ބޭނުމަކަށް ނަގާފައިވާ ކަމަށް ބޭންކުން އަންގަމުންދާ ބުނެ ވެސް ބައެއް މީހުން ދަނީ ކަންބޮޑުވުން ފާޅު ކުރަމުންނެވެ.
"ދައުލަތުގެ ރިޒާވްގައި އެއްވެސް މިންވަރަކަށް ޑޮލަރު ނެތް. ޓީ-ބިލްގެ 50 މިލިއަން ޑޮލަރު ދެއްކީ ބީއެމްއެލްގައި ހުރި އާންމުންގެ ފައިސާއިން. ވިޔަފާރިވެރިން، އާންމުން ތަކެތި ގަންނަން ބީއެމްއެލްއަށް ޑޮލަރު ޖަމާކުރީމަ އެ ޑޮލަރު ސަޕްލަޔަރުންނަށް ނުދަނީ ސަރުކާރުން އެ ފައިސާ ނަގާތީ،" ނަޝީދު ވިދާޅުވި އެވެ.
