މި އަހަރުގެ ދެވަނަ ކުއާޓަރުގެ ތެރޭގައި ސުކޫކާއި ސްވޮޕުގެ ދަރަނި ހިމެނޭހެން ރެކޯޑު އަދަދެއްގެ ދަރަނި އަނބުރާ ދެއްކުމާ އެކީ، ބޭރުގެ ދަރަނި 3.5 ބިލިއަން ޑޮލަރަށް ތިރިވެފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފި އެވެ.
ފިނޭންސުން އާންމުކޮށްފައިވާ އެންމެ ފަހުގެ ޑެޓް ބުލެޓިންގައިވާ ގޮތުގައި 2024 ވަނަ އަހަރުގެ ފަހު ކުއާޓަރުން ފެށިގެން ބޭރުގެ ޖުމްލަ ދަރަނި ހުރީ ހަތަރު ބިލިއަން ޑޮލަރުން މަތީގަ އެވެ. މި މުއްދަތުގެ ތެރޭގައި ދައުލަތުގެ ސީދާ ބޭރު ދަރަނި 2.8 ބިިލިއަން ޑޮލަރަށް އަރާފައިވާއިރު، ގެރެންޓީ ދީފައިވާ ބޭރު ދަރަނި 1.3 ބިލިއަން ޑޮލަރަށް އެރި އެވެ.
މި ސަރުކާރުގެ ފުރަތަމަ ދެ އަހަރުގެ ތެރޭގައި ދަރަނި ބޭރު ދަަރަނި ވަރަށް އުފުލުނު ނަމަވެސް، ގިނަ ދަރަނިތަކެއް ދައްކާފައި ވާތީ، މި އަހަރުގެ ދެ ކުއާޓަރުގައި ވެސް ބޭރު ދަރަނީ ދިޔައީ ދަށަށެވެ. މީގެ ތެރެއިން ވެސް އެންމެ ބޮޑު ދަށްވުމެއް އައީ، ދެ ވަނަ ކުއާޓަރުގެ ތެރޭގައި އެވެ.
މި އަހަރުގެ ދެ ވަނަ ކުއާޓަރުގެ ތެރޭގައި ބޭރުގެ ދަރަނިތައް ދައްކަން 983 މިލިއަން ޑޮލަރު ހަރަދު ކުރި އެވެ. މި ފައިސާގެ ތެރޭގައި ކުރީ ސަރުކާރުން ވިއްކި ސުކޫކުގެ 500 މިލިއަން ޑޮލަރާއި މި ސަރުކާރުން އިންޑިއާގެ ރިޒާވު ބޭންކުން ނެގި 400 މިލިއަން ޑޮލަރުގެ ކަރަންސީ ސްވޮޕް ހިމެނެ އެވެ.
މި ދަރިނިތައް ދެއްކުމާއެކީ ބޭރުގެ ސީދާ ދަރަނި 2.3 ބިލިއަން ޑޮލަރަށް، އަދި ގެރެންޓީ ދީފައިވާ ބޭރުގެ ދަރަނި ވަނީ 1.2 ބިލިއަން ޑޮލަރަށް ތިރިވެފަ އެވެ.
ދައުލަތުގެ ބޭރު ދަރަނި
| Label | Value |
|---|---|
| Q3 2023 | 3,357.8 މިލިއަން ޑޮލަރު |
| Q4 2023 | 3,388.6 މިލިއަން ޑޮލަރު |
| Q1 2024 | 3,373.9 މިލިއަން ޑޮލަރު |
| Q2 2024 | 3,458.6 މިލިއަން ޑޮލަރު |
| Q3 2024 | 3,552.6 މިލިއަން ޑޮލަރު |
| Q4 2024 | 4,043.9 މިލިއަން ޑޮލަރު |
| Q1 2025 | 4,013.2 މިލިއަން ޑޮލަރު |
| Q2 2025 | 4,048.4 މިލިއަން ޑޮލަރު |
| Q3 2025 | 4,033.6 މިލިއަން ޑޮލަރު |
| Q4 2025 | 4,090.4 މިލިއަން ޑޮލަރު |
| Q1 2026 | 4,068.9 މިލިއަން ޑޮލަރު |
| Q2 2026 | 3,594.3 މިލިއަން ޑޮލަރު |
ބޭރު ދަރަނި ދަށަށް ދިޔަ ނަމަވެސް، މި ސަރުކާރުގެ ދައުރުގެ ތެރޭގައި އެތެރޭގެ ދަރަނި ވަރަށް ބޮޑަށް އިތުރުވަމުން އަންނަ ކަމަށް އަދަދުތަކުން ދައްކަ އެވެ.
މި ޖޫން މަހުގެ ނިޔަލަށް އެތެރޭގެ ޖުމްލަ ދަރަނި ވަނީ 97.3 ބިލިއަން ރުފިޔާއަށް އަރާފަ އެވެ. މިއީ ދެ އަހަރާ ބައިގެ ތެރޭގައި 23.6 ބިލިއަން ރުފިޔާގެ އިތުރުވުމެކެވެ. އެތެރޭގެ ދަރަނީގެ 99 ޕަސެންޓަކީ ދައުލަތުގެ ސީދާ ދަރަންޏެވެ. އެތެރޭގެ ދަރަނީގެ ތެރެއިން ގެރެންޓީ ދީފައިވަނީ 579.8 މިލިއަން ރުފިޔާއަށް އެކަންޏެވެ.
އެތެރޭގެ ދަރަނި ދަށަށް ނުދާތީ ބިލިއަން ޑޮލަރާ ގާތްކުރާ އަދަދަކަށް ދަރަނި ދެއްކި ނަމަވެސް ޖުމްލަ ދަރަނިން މަދުަވީ އެންމެ 2.2 ބިލިއަން ރުފިޔާ އެވެ. ދެ ވަނަ ކުއާޓަރު ނިމުނުއިރު ޖުމްލަ ދަރަނީގެ އަދަދަކީ 152.7 ބިލިއަން ރުފިޔާ އެވެ.
މިއީ އިގުތިސޯދުގެ އުފެއްދުންތެރިކަމާ (ޖީޑީޕީއާ) ބަލާއިރު 122.7 ޕަސެންޓެވެ. މި ސަރުކާރުން ވެރިކަމާ ހަވާލުވީ އަހަރު ނިމުނުއިރު ޖީޑީޕީގެ ނިސްބަތުން ދަރަނި ހުރީ 123.6 ޕަސެންޓުގަ އެވެ. މި ދެ އަދަދުގެ ފަރުގު ޕަސެންޓަކަށް ވެސް ނާރަ އެވެ.
ފިނޭންސުން އަންދާޒާ ކުރަނީ މި އަހަރު ނިމޭއިރު ދައުލަތުގެ ޖުމްލަ ދަރަނި ހުންނާނީ 158.8 ބިލިއަން ރުފިޔާގައި ކަަމަށެވެ. މިއީ ޖީޑީޕީގެ ނިސްބަތުން ބަލާއިރު، 127.7 ޕަސެންޓެވެ.
