ޕީޕަލްސް ނެޝަނަލް ކޮންގްރެސް (ޕީއެންސީ) ގެ މަގާމުތަކަށް ހޮވުނު އަދި އައްޔަނުކުރެވުނު މެންބަރުން މަގާމުގެ އިގުރާރުވެއްޖެ އެވެ.
ޕީއެންސީގެ މަގާމުތަކަށް ހޮވުނު އަދި އައްޔަނުކުރެވުނު ބޭފުޅުން އިގުރާރުވީ ޕާޓީގެ ނިންމުންތަކަށް ބޯލަނބައި، މަގާމުގެ މަސްއޫލިއްޔަތު އަދާކުރުމުގައި އެއްވެސް ފަރާތެއްގެ ނުފޫޒަށް ނުލެނބި، 2028 ވަނަ އަހަރުގެ ރިޔާސީ އިންތިހާބުގައި ވާދަކުރާ ޕީއެންސީގެ ކެންޑިޑޭޓަށް ކާމިޔާބު ހޯދައިދިނުމުގައި އަމިއްލަ އެދުމެއް ނެތި ޕާޓީގެ ލާބަޔާއި މަންފާއަށް މަސައްކަތް ކޮށްދިނުމަށެވެ.
މީގެއިތުރުން މަގާމުގެ ހައިސިއްޔަތުން އެނގޭ ޕާޓީގެ އެންމެހާ ސިއްރު މައުލޫމާތުތައް ރައްކާތެރިކޮށް ދަމަހައްޓައި، ޕާޓީގެ އަގުވެއްޓޭފަދަ އެއްވެސް އަމަލެއް ނުކޮށް، ނަމޫމާ އަހްލާގެއްގެ މަތީގައި ދެމިހުރުމަށްވެސް އެބޭފުޅުން އިގުރާރުވި އެވެ. އެ ބޭފުޅުން މި އިގުރާރުވީ ރައީސް މުހައްމަދު މުއިއްޒުގެ ކުރިފުޅުމަތީގަ އެވެ.
ޕީއެންސީގެ މެންބަރުންގެ މަޖިލީހަށް އެ ޕާޓީގެ ރައީސް، މުހައްމަދު މުއިއްޒު ވަނީ މިނިސްޓަރުން ފެންވަރުގައި ތިއްބެވި ބައެއް ބޭފުޅުންނާއި އެމްޑީންނާއި ސީއީއޯއިން ގޮތުގައި ތިއްބެވި ބައެއް ބޭފުޅުން އައްޔަންކުރައްވާފަ އެވެ. އޭގެއިތުރުން ޕީއެންސީގެ އެކި ގުނަވަންތަކަށް ވެސް މުއިއްޒު އެކި ބޭފުޅުން އައްޔަންކުރެއްވިއިރު، އެ ބޭފުޅުން ވެސް މެންބަރުންގެ މަޖިލީހުގައި ހިމެނިގެންދާނެ އެވެ.
ޕީއެންސީ ކޮންގްރެސްގެ ތެރެއިން އެ ޕާޓީގެ ބައެއް މަގާމުތަކަށް މެންބަރުން އިންތިހާބު ކުރެވިގެންދިޔަ އެވެ. އޭގެތެރެއިން ނާކާމިޔާބުވި ގިނަ ބޭފުޅުންނަށް މުއިއްޒު ވަނީ ޕީއެންސީ ތެރެއިން އެކި މަގާމު ދެއްވާފަ އެވެ.
ޕީއެންސީގެ ކޮންގްރެސް ތެރެއިން އެންމެ ފޯރިގަދަކޮށް ދިޔައީ ނައިބުރައީސް ހޮވުމުގެ އިންތިހާބެވެ. އެ އިންތިހާބުގައި ނާކާމިޔާބުވެވަޑައިގަތީ މާފަންނު މެދު ދާއިރާގެ މެންބަރު، އަސްމާ ރަޝީދު އާއި އެލްޖީއޭގެ ސީއީއޯ، މުހައްމަދު ނިމާލް އެވެ. އަސްމާއަށް ލިބިވަޑައިގެންނެވީ 288 މީހުންނެވެ. ނިމާލްއަށް ވޯޓުދެއްވީ 301 މީހުންނެވެ.
ނައިބުރައީސުންގެ ވޯޓުގައި އެންމެ ގިނަ ވޯޓު ހޯއްދެވީ ޔޫތު މިނިސްޓަރު އަބްދުﷲ ރާފިއުއަށެވެ. އޭނާއަށް 968 ވޯޓު ލިބިވަޑައިގެންނެވިއިރު، ދެވަނައަށް އެންމެ ގިނަ ވޯޓު ލިބިވަޑައިގެންނެވީ 964 ވޯޓާއެކު ފިޝަރީޒް މިނިސްޓަރު، އަހުމަދު ޝިޔާމުއަށެވެ.
ޕީއެންސީގެ މެންބަރުންގެ މަޖިލީހަށްވެސް 18 މެންބަރުން ހޮވާފައިވާއިރު، މެންބަރުންގެ މަޖިލީހަށް އަންހެން މެންބަރުން ވެސް ހޮވި އެވެ. އޭގެއިތުރުން މެންބަރުންގެ މަޖިލީހަށް ޒުވާން މެންބަރުން ވެސް ހޮވާފައިވެ އެވެ.
