ބަލަމުންދާ މައްސަލައެއްގައި ސުވާލުކުރުމަށް ކަމަށް ބުނެ ކުރީގެ ރައީސް އަބްދުﷲ ޔާމީން އަބްދުލްގައްޔޫމް ފުލުސް އޮފީހަށް ހާޒިރުކުރުމަށް ޗިޓު ހަވާލުކުރަން ފުލުހުން އެ ގެއަށް ހިނގައްޖެ އެވެ.
އަދަދު އަށް އެނގިފައިވާ ގޮތުގައި ޔާމީން ފުލުހަށް ހާޒިރުކުރުމަށް އަންގައި ޗިޓު ހަވާލުކުރަން ދެ ފަހަރެއްގެ މަތިން ފުލުހުން މިރޭ އެ ގެއަށް ދިޔަ އެވެ. އެގޮތުން، ފުލުހުން ފުރަތަމަ އެ ގެއަށް ގޮސްފައި ވަނީ މިރޭ 7:00 ހާއިރު އެވެ. އޭގެ ފަހުން 7:30 އެހާކަށްހާއިރު ވެސް ފުލުހުން އެ ގެއަށް ދިޔަ ކަމަށް މި ނޫހަށް އެނގިފައިވެ އެވެ.
ޔާމީން ފުލުހަށް ހާޒިރުކުރުމަށް އެ މުއައްސަސާއިން މަސައްކަތް ކުރަނީ ބަލަމުންދާ މައްސަލައެއްގައި މައުލޫމާތުގެ ބަޔާނެއް ނެގުމަށް ކަމަށް އެނގިފައިވެ އެވެ. ނަމަވެސް، އެ ޗިޓާ ޔާމީން ހަވާލުވެވަޑައިގެންފައި ނުވާކަމަށް އިތުބާރު ހިފޭ މަސްދަރުތަކުން މި ނޫހަށް ކަށަވަރުކޮށްދީފައިވެ އެވެ.
އެކަމާ ގުޅޭގޮތުން ފުލުހުންގެ ބަހެއް ހޯދުމަށް ގުޅުމުން، "ބަލައިލާނެ" ކަމަށް ބުނުމަށްފަހު އެއްވެސް ޖަވާބެއް ނުދެއްވި އެވެ.
ޔާމީން ފުލުހަށް ހާޒިރުކުރުމަށްޓަކައި ޗިޓު ހަވާލުކުރަން މިރޭ ފުލުހުން އެ ގެއަށް ގޮސްފައިވާއިރު، ޑިސެމްބަރު 2024 ގައި މާފަންނު ގްރީން ބިލްޑިންގްގައި ހިނގި އަލިފާނުގެ ހާދިސާއާ ގުޅުވައި އެމަނިކުފާނު ކުރެއްވި ކުރެއްވި ތުހުމަތުތަކާ ގުޅިގެން، އެމަނިކުފާނަށް އެނގިވަޑައިގަންނަވާ މައުލޫމާތު ސާފުކުރުމަށް ދިވެހި ފުލުހުންގެ ހިދުމަތުގައި އެދިވަޑައިގެންފައިވާ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ރޭ ވަނީ ވިދާޅުވެފަ އެވެ.
ފޭސްބުކްގައި ކުރެއްވި ޕޯސްޓެއްގައި ވިދާޅުވީ، ސަރުކާރުގެ 3 ވުޒާރާއެއް ހިންގަމުންދިޔަ އިމާރާތްތައް އަނދައިގެން ދިޔަ މައްސަލާގައި ދިވެހި ފުލުހުންނާއި އެކުވެރި ގައުމުތަކުގެ މާހިރުން ގުޅިގެން ކުރި ތަހުގީގުން ހޯދިފައިވަނީ އެ ހާދިސާ ހިނގީ ކަރަންޓު ނަރުތަކުގައި ރޯވެގެން ކަމަށެވެ.
އެ މައްސަލައިގައި އެއްވެސް މީހަކަށް ޖިނާއީ ތުހުމަތެއް ކުރެވޭނެ ހެއްކެއް ތަހުގީގަށް ލިބިފައިނުވާ ކަމަށް ފުލުހުން މައުލޫމާތު ދީފައިވާ ކަމަށް އިހުސާން ވިދާޅުވިއެވެ.
ނަމަވެސް، ސެޕްޓެމްބަރު 5، 2026 ގައި ޕީޕަލްސް ނޭޝަނަލް ފްރޮންޓް (ޕީއެންއެފް) އިން ބޭއްވި ޖަލްސާއެއްގައި ޔާމީން ވަނީ އެ އިމާރާތްތަކުގައި އަލިފާން ރޯކޮށްލީ ކަމަށާއި، އެކަން ކުރި މީހާއަކީ ރައީސް މުހައްމަދު މުއިއްޒާ އަރިސް މީހެއްކަން ފުލުހުންނަށް އެނގޭ ކަމަށް ވިދާޅުވެފަ އެވެ.
"އެހެންކަމުން މިމައްސަލާގައި އެމަނިކުފާނަށް އެނގިވަޑައިގަންނަވާ މައުލޫމާތު ސާފުކުރައްވައި، ތަހުގީގުގައި އިތުރަށް ބައްލަވަންޖެހޭ ކަމެއްހުރިނަމަ އެކަން ބެއްލެވުމަށް ދިވެހި ފުލުހުންގެ ހިދުމަތަށް އަޅުގަނޑު ވާނީ ދަންނަވާފަ،" އިހުސާން ވިދާޅުވި އެވެ.
"ހަމަ އެއާއެކު ދިވެހި ފުލުހުންގެ މައްޗަށް ކުރީގެ ރައީސުލްޖުމްހޫރިއްޔާ ކުރެއްވި ތުހުމަތު ތަހުގީގުކޮށް ދެއްވުމަށްއެދި ނޭޝަނަލް އިންޓެގްރިޓީ ކޮމިޝަނަށްވެސް އަޅުގަނޑު ވާނީ ދަންނަވާފަ."
ޑިސެމްބަރު 2024 ގައި ހިނގި އެ އަލިފާނުގެ ހާދިސާގައި ހައުސިން މިނިސްޓްރީ، ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީ ހިންގި އިމާރާތް އެއްކޮށް އަނދައި، މުހިންމު ލިޔެކިޔުންތަކާއި ސާވާތަކެއް ވަނީ ހަލާކުވެފަ އެވެ.
