ރައީސް އޮފީހުން ބާއްވާ ނޫސްވެރިންގެ ބައްދަލުވުންތަކުގައި ނޫސްވެރިން ކުރާ ސުވާލުތަކަށް، މޮޑަރޭޓު ކުރުމުގެ ނަމުގައި ސަރުކާރުގެ ތަރުޖަމާނު، މުހައްމަދު ހުސައިން ޝަރީފް ހުރަސްއަޅުއްވައި ކޮންޓްރޯލް ކުރައްވަން މިއަދު ފައްޓަވައިފި އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ކޮންމެ ސުވާލެއް ކުރުމުގެ ކުރިން، ދެން ފުރުސަތު ލިބޭ މީޑިއެއްގެ ނަން އިއުލާނުކުރެއްވީ މުންދު އެވެ. އަދި، ނޫސްވެރިޔާގެ ސުވާލަށް ރައީސުލްޖުމްހޫރިއްޔާ މުހައްމަދު މުއިއްޒު ޖަވާބުދެއްވުމުން، އަލުން ފުރުސަތެއް ދެއްވާނެތޯ ނޫންތޯ ވެސް ނިންމެވީ މުންދު އެވެ.
މިއަދުގެ ނޫސްވެރިންގެ ބައްދަލުވުމުގައި ބައެއް ނޫސްވެރިންނަށް ދެވަނަ ފުރުސަތު ދިނުމަށް ވެސް މުންދު ވަނީ ދެކޮޅު ހައްދަވައިފަ އެވެ.
އެ ގޮތުން ސަންގު ޓީވީގެ ފަރާތުން، މިއަދުގެ ނޫސްވެރިންގެ ބައްދަލުވުމަށް ހާޒިރުވި، ނަޖާހު މަސްއޫދު ކުރި ފުރަތަމަ ސުވާލުގެ ތެރޭގައި ދެ ސުވާލުކުރެއްވިކަމަށް ވިދާޅުވެ މުންދު ވަނީ ދެ ވަނަ ސުވާލުކުރުމުގެ ފުރުސަތު އޭނާއަށް ދިނުމަށް ދެކޮޅު ހަދައިފަ އެވެ.
ރައީސް އޮފީހުން މިގޮތަށް އަމަލުކޮށްފައި ވަނީ އެ އޮފީހުން އާންމުކޮށްފައިވާ އުސޫލާ އެއްގޮތަށް ކަމަށް ބުނެ އެވެ.
ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމަށް ބައެއް ނޫސްތަކަށް ދައުވަތު ވެސް ދީފައެއް ނުވެ އެވެ. އެގޮތުން، ދައުރު ނޫހާއި ރާއްޖެ ޓީވީ އަދި، ހާތާވީސް އޮންލައިން ފަދަ ސަރުކާރަށް ސަނާ ނުކިޔާ ނޫސްތަކަށް މިއަދުގެ ނޫސްވެރިންގެ ބައްދަލުވުމުން ޖާގަ ދީފައެއް ނުވެ އެވެ.
