ކޮމިޝަނާ އޮފް ސްޕޯޓްސްގެ މަގާމުގައި ހުންނެވި މުހައްމަދު ތޮލާލްގެ އިތުރުން، ކުރިން ކާޑެއްދޫ އެއާޕޯޓު ހިންގުމާ ހަވާލުވެހުރި އަހުމަދު ހަބީބު މިނިސްޓަރުންގެ ފެންވަރުގައި ރައީސް އޮފީހަށް މިއަދު އައްޔަނުކޮށްފި އެވެ.
ތޮލާލް އައްޔަނުކޮށްފައި ވަނީ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް ފޯ ޓާޝަރީ ހެލްތު ސާވިސަސްގެ މަގާމަށެވެ. އެ މަގާމަށް ތޮލާލު އައްޔަނުކުރުމާއެކު ސްޕޯޓްސް ކޮމިޝަނަރުގެ މަގާމު ހުސްވީ އެވެ.
ތޮލާލްއަކީ ރައީސުލްޖުމްހޫރިއްޔާ މުހައްމަދު މުއިއްޒު ވެރިކަމަށް ގެނައުމަށް އެންމެ ކުރީ ސަފުގައި މަސައްކަތް ކުރެއްވި ބޭފުޅެކެވެ. އެގޮތުން، ރިޔާސީ ކެމްޕޭނުގެ ދުވަސްވަރު ޕީޕީއެމް/ ޕީއެންސީގެ ތަރުޖަމާނުކަން ވެސް ކުރެއްވީ އޭނާ އެވެ.
ހަބީބު އައްޔަނުކޮށްފައި ވަނީ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕޮލިސީ އެންޑް މެނިފެސްޓޯގެ މަގާމަށެވެ. އެ މަގާމުގައި ކުރިން ހުންނެވީ މި ސަރުކާރުގެ ހެލްތު މިނިސްޓަރުކަން ވެސް ކުރެއްވި އަބްދުﷲ ނާޒިމް އެވެ. އޭނާ އެ މަގާމުން އިސްތިއުފާދެއްވީ މިއަދު ކަމަށް ބައެއް ނޫސްތަކުގައި ރިޕޯޓުކޮށްފައިވެ އެވެ.
މިނިސްޓަރު ފެންވަރުގައި ރައީސް އޮފީހަށް މިއަދު އައްޔަނުކުރި ހަބީބުއަކީ މީގެ ކުރިން ވިލާ އެއާގެ ޖެނެރަލް މެނޭޖަރެއްގެ މަގާމުގައި ހުންނެވި ބޭފުޅެކެވެ. އޭނާ މީގެ ކުރިން، ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި، މިހާރު ރައީސް މުއިއްޒު މިނިސްޓަރުކަން ކުރެއްވި ހައުސިން މިނިސްޓްރީގައި ސްޓޭޓް މިނިސްޓަރެއްގެ މަގާމު ވެސް އަދާކުރެއްވި އެވެ.
