ރައީސް އޮފީހުން އިންތިޒާމުކޮށްގެން ބާއްވާ ނޫސްވެރިންގެ ބައްދަލުވުންތަކަށް އަދަދު އާއި އެ ނޫހުގެ އެއްވެސް ނޫސްވެރިއަކަށް ނުވަދެވޭ ގޮތަށް ފިޔަވަޅު އެޅިކަމަށް ބުނެ ވަޓްސެޕް މެދުވެރިކޮށް ފޮނުވި މެސެޖަކީ ރަސްމީ ލިޔުމެއް ކަމަށް އެ އޮފީހުން ބުނެފި އެވެ.
ރައީސް އޮފީހުން ނެރުނު ނޫސްބަޔާނެއްގައި ބުނީ އަދަދު ނޫހަށް ފިޔަވަޅު އެޅިކަން އަންގާފައި ވަނީ މިއަދާ ހަމައަށް ވެސް ރައީސް އޮފީހުގައި މީޑިއާއާ މުއާމަލާތު ކުރުމަށް ބޭނުންކުރާ ރަސްމީ ވަޓްސްއެޕް ގުރޫޕުގައި ކަމަށެވެ.
"ރަސްމީ ވަޓްސްއެޕް ގްރޫޕުގައި ލިޔާ ލިޔުމަކީ މި އޮފީހުން ހިއްސާކުރާ ރަސްމީ އިލެކްޓްރޯނިކް ލިޔުމެއްކަމުން، އަދަދު ނޫހަށް ފިޔަވަޅު އެޅިކަން އެ ވަނީ ލިޔުމުން އެންގިފަ،" ރައީސް އޮފީހުގެ ބަޔާނުގައި ބުންޏެވެ.
ރައީސް އޮފީހުން އެ ބަޔާން ނެރުނީ އެންމެފަހުން ބޭއްވި ނޫސްވެރިންގެ ބައްދަލުވުމުގައި ސަންގު ޓީވީ އާއި ސޯސަލް މީޑިއާގެ ދެ ނޫސްވެރިން ކުރި ސުވާލަށް ރައްދު ދިނުމަށެވެ. ރައީސުލްޖުމްހޫރިއްޔާ މުހައްމަދު މުއިއްޒުއާ އެ ދެ ނޫސްވެރިން ސުވާލުކުރީ ގާނޫނުއަސާސީގެ 16 ވަނަ މާއްދާ އާއި 43 ވަނަ މާއްދާއަށް ރިއާޔަތްކޮށެވެ.
ގާނޫނުއަސާސީގެ 43 ވަނަ މާއްދާގެ (ށ) ގައި ބަޔާންކޮށްފައި ވަނީ އިދާރީ ގޮތުން އަޅާ ފިޔަވަޅެއްގެ ސަބަބުން އެއްވެސް މީހެއްގެ ހައްގަކަށް އުނިކަމެއް ލިބިއްޖެކަމަށް ފެނިއްޖެ ނަމަ، އެ ފިޔަވަޅެއް އެޅި ސަބަބު ލިޔުމުން ލިބުމުގެ ހައްގު އެ މީހަކަށް ލިބިގެންވާ ކަމަށެވެ.
އެ މާއްދާއާ ހަވާލާދީ ސަންގު ޓީވީގެ ނޫސްވެރިޔާ ނަޖާހު މަސްއޫދު ސުވާލުކުރީ އަދަދު ނޫހަށް ރައީސް އޮފީހުން ފިޔަވަޅު އެޅި ސަބަބު ހާމަނުކުރަނީ ކީއްވެތޯ އެވެ.
ރައީސް އޮފީހުގެ ވަޓްސްއެޕް ގްރޫޕަށް ފޮނުވާ މެސެޖުތަކަކީ ރަސްމީ ލިޔުންކަމަށް ބުނެ ބަޔާން ނެރުނީ ނަޖާހުގެ އެ ސުވާލަށް ރައްދުދީ އެވެ.
ގާނޫނުއަސާސީގެ 16 ވަނަ މާއްދާގައި ބަޔާންކޮށްފައި ވަނީ ގާނޫނުއަސާސީގައި ބަޔާންކުރާ އަސާސީ ހައްގެއްގެ ނުވަތަ މިނިވަންކަމެއްގެ އެއްވެސް މިންވަރެއް ހިފެހެއްޓޭނީ ގާނޫނުއަސާސީއާ ތައާރުޒުނުވާ ގޮތެއްގެ މަތީން، ރައްޔިތުންގެ މަޖިލީހުން ފާސްކުރާ ގާނޫނަކުން ކަމަށެވެ.
އެކަން ފާހަަގަކޮށް، ސޯސަލްގެ ނޫސްވެރިޔާ، ނަހުދާ ފާއިޒް ސުވާލުކުރީ ރައީސުލްޖުމްހޫރިއްޔާއަށް ލިބިފައި ނުވާ ބާރެއް ބޭނުންކޮށް އަސާސީ ހައްގުގަތަކުގެ ބާބުގައި ބަޔާންކޮށްފައިވާ ނޫސްވެރިކަމުގެ ހައްގު ހަނިކުރީ ކީއްވެތޯ އެވެ.
އެ ސުވާލުގެ ޖަވާބުގައި ރައީސުލްޖުމްހޫރިއްޔާ މުހައްމަދު މުއިއްޒު ވިދާޅުވީ މި ސަރުކާރުން ހުރިހާ ކަމެއް ވެސް ކުރަނީ ގާނޫނުއަސާސީއާ އެއްގޮތަށް ކަމަށެވެ.
"މި ސަރުކާރުން ހަމަ މި ހުރިހާ ކަމެއް ވެސް މި ކުރަނީ ގާނޫނުއަސާސީއާ އެއްގޮތަށް އިނގޭތޯ؟ ގާނޫނުއަސާސީއާ ހިލާފަށްކުރި އެއްވެސް ކަމެއް އެއްވެސް ނޫސްވެރިއަކަށް ފާހަގައެއް ނުކުރެއްވޭނެ،" މުއިއްޒު ވިދާޅުވި އެވެ.
މުއިއްޒުގެ ވާހަކައަށް ބާރުދީ ރައީސް އޮފީހުގެ ބަޔާނުގައި ބުނީ ރައީސްއޮފީހުގެ އެއްވެސް އުސޫލެއް ނުވަތަ ގަވާއިދަކުން ވެސް ނޫސްވެރިކަމުގެ މިނިވަންކަމުގެ ހައްގު ހަނިވާފަދަ ހާލަތެއް މެދުވެރިއެއް ނުވާނެ ކަމަށެވެ.
