ރިޔާދު، ސައުދީ އަރަބިއްޔާ (ސެޕްޓެމްބަރު 14) - ކާރު އެކްސިޑެންޓެއްގައި މިދިޔަ އަހަރު މަރުވި، ޕޯޗުގީސް ފޯވާޑް، ޑިއޯގޯ ޖޮޓާ އަށް އިހުތިރާމް ކުޑަކޮށް ޝުއޫރުފާޅުކުރި ސަަޕޯޓަރުންނަށް އުމުރު ދުވަަހުގެ ސަސްޕެންޝަނެއް ދޭން ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ގޮވާލައިފި އެވެ.
މިދިޔަ އަހަރުގެ ޖުލައި މަހު ތިން ވަނަ ދުވަހު ކާރު އެކްސިޑެންޓެއްގައި މަރުވި އުމުރުން 28 އަހަރުގެ ޖޮޓާގެ ނަން ބޭނުންކޮށް، ސައުދީ ޕްރޯ ލީގުގައި އަލް ހިލާލް އަށް ކުޅޭ ޕޯޗުގަލްގެ މިޑްފީލްޑަރު ރުބެން ނެވޭސްއާ ވަނީ ދިމާކޮށްފަ އެވެ. އެ ގޮތުން، މިދިޔަ ހޮނިހިރު ދުވަހު، އަލް ހިލާލުން 6-0 އިން އަލް ތާވޫން ބަލިކުރި މެޗުގައި، ނެވޭސް އަށް ބޯޅަ ލިބޭ ކޮންމެ ފަހަރަކު، އަލް ތާވޫންގެ ސަޕޯޓަރުން ވަނީ "ޖޮޓާ"ގެ ނަން ގޮވައި، ނެވޭސް އަށް އުނދަގޫކުރަން މަސައްކަތްކޮށްފަ އެވެ.
"ލީގުން އެބަޖެހޭ މި ކަހަލަ ކަންކަމަށް ފިޔަވަޅު އަޅަން. މިއީ ފުޓްބޯޅަ އެއް ނޫން. ކޮންމެ ކަމެއްގައި ވެސް ހައްދެއް އޮންނަން ވާނެ. މިހެއް އުޅޭ މީހުންނަށް ދުވަހަކު ދަނޑަށް ވަނުމުގެ ފުރުސަތު ލިބިގެން ވެސް ނުވާނެ،" ރޮނާލްޑޯ، ސޯޝަލް މީޑިއާގައި ލިޔެފައިވެ އެވެ.
ޖޮޓާއާ އެކު ޕޯޓޯ އާއި ވުލްވްސް އަށް ކުޅުނު ނެވޭސް، މިހާރު ޕޯޗުގަލް ގައުމީ ޓީމުގައި ބޭނުންކުރަމުން އަންނަނީ ޖޮޓާ ކުރިން ބޭނުންކުރި 21 ނަމްބަރެވެ. ޖޮޓާ، މީގެ ކުރިން ދިން ގިނަ އިންޓަވިއުތަކުގައި ފާހަގަކޮށްފައިވާ ގޮތުގައި އޭނާގެ އެންމެ ގާތް އެކުވެރިޔާ އަކީ ނެވޭސް އެވެ. ރޮނާލްޑޯ އަކީ އެ ދެ ކުޅުންތެރިންގެ ކެޕްޓަން އަދި ލީޑަރެއްގެ ގޮތުގައި ފެންނަ ފަރާތެވެ.
އަލް ތާވޫންއާ ދެކޮޅަށް ކުޅުނު މެޗަށް ފަހު، ދިން އިންޓަވިއުއެއްގައި ނެވޭސް ބުނެފައިވަނީ، ޖޮޓާގެ ނަން އެ ގޮތަށް ބޭނުންކޮށްފައި އެ މީހުން މައާފަށް ނޭދި އަޅުކަން ކުރަން ދިއުމަކީ ވެސް ލަދުވެތި ކަމެއް ކަމަށެވެ.
އަލް ހިލާލުން މި ކަމާ ގުޅިގެން ނެރުނު ބަޔާނެއްގައި ބުނެފައިވަނީ، މިއީ އެއް ގޮތަކަށް ވެސް ފުޓްބޯޅައިގައި ހިނގައިގެންވާނެ ކަމެއް ނޫން ކަމަށެވެ. އަނެއްކޮޅުން، އަލް ތާވޫނުން ބަޔާނެއް ނެރެ ބުނެފައިވަނީ، މިއީ އެއްވެސް ސިފައެއްގައި އެ ކްލަބްގެ ފަރާތުން އައި ކަމެއް ނޫން ކަމަށާއި އެ ކްލަބް ތަމްސީލް ކުރާ ބައެއްގެ ފަރާތުން މި ފަދަ ކަމެއް ފެންނަން އެއްވެސް ގޮތަކަށް ނޭދޭ ކަމަށެވެ.
ސައުދީ ފުޓްބޯޅަ ފެޑެރޭޝަން އާއި ސައުދީ ޕްރޯ ލީގުން އަންނަނީ މިކަން ހިނގައިދިޔަ ގޮތް ތަހުގީގުކުރަމުންނެވެ. އަދި، މި ކަމުގައި ޝާމިލުވާ ބަޔަކަށް ފިޔަވަޅު އަޅާނެ ކަމަށް ވަނީ ބުނެފަ އެވެ.
ސްޕެއިނުގެ ޒަމޯރާ ޕްރޮވިންސްގައި ހިނގި މި އެކްސިޑެންޓްގައި ޖޮޓާގެ އިތުރުން، އޭނާގެ ކޮއްކޮ، އަންޑްރޭ ސިލްވާ، 24، ވެސް ކާރުގައި އިނެވެ. އެކްސިޑެންޓްވެ، ލަމްބޯގިނީ ކާރުގައި އަލިފާން ރޯވިއިރު، ޖޮޓާގެ އިތުރުން، އަންޑްރޭ ވެސް މަރުވިއިރު، އޭނާ އަކީ ޕޯޗުގަލް ދެ ވަނަ ޑިވިޝަނުގައި، ޕެނަފިއޭލް އަށް ކުޅެމުން އަންނަ ކުޅުންތެރިއެކެވެ.
