ޕޯޗުގަލްގެ ފުޓްބޯޅަ ތަރި ކްރިސްޓިއާނޯ ރޮނާލްޑޯ އާއި އޭނާގެ ލޯބިވެރިޔާ ޖޯޖީނާ ރޮޑްރިގޭޒް، ގާތްގަނޑަކަށް 10 އަހަރު ދުވަހު އެކުގައި އުޅުމަށް ފަހު ރަސްމީކޮށް ކައިވެނިކޮށްފި އެވެ.
އޮގަސްޓް 11 ވީ އަންގާރަ ދުވަހު "އަސް" މެގަޒިންއާ ހިއްސާކުރި ބަޔާނެއްގައި ބުނެފައިވަނީ، ކްރިސްޓިއާނޯ ރޮނާލްޑޯ އާއި ޖޯޖީނާ ރޮޑްރިގޭޒް މިއަދު ޕޯޗުގަލްގެ ކަސްކައިސްގައި ބޭއްވި ރަސްމިއްޔާތެއްގައި ކައިވެނިކޮށްފައިވާ ކަމަށާއި، މިހާރު އެ ދެމީހުންނަކީ ރަސްމީކޮށް ދެމަފިރިން ކަމަށެވެ. މި ކައިވެނީގެ ރަސްމިއްޔާތަކީ އެ ދެމަފިރިންގެ ފަސް ދަރިން ބައިވެރިވި، ވަރަށް ޕްރައިވެޓް ރަސްމިއްޔާތެކެވެ.
ރޮނާލްޑޯއަށް ޖޯޖީނާ ފުރަތަމަ ފެނުނީ 2017 ވަނަ އަހަރުގެ ކުރީކޮޅު، އޭނާ ގޫޗީ ފިހާރައެއްގެ ސޭލްސް އެސިސްޓެންޓެއްގެ ގޮތުގައި މަސައްކަތް ކުރަމުން ދަނިކޮށެވެ. އަދި އޭގެ ކުޑަދުވަސްކޮޅެއް ފަހުން އެ ދެމީހުން ލޯބީގެ ގޮތުން ގުޅުނެވެ. އާޖެންޓީނާ އާއި އިންގްލެންޑަށް ނިސްބަތްވާ މޮޑެލް ޖޯޖީނާ، 2022 ވަނަ އަހަރު ނެޓްފްލިކްސްއިން ދެއްކި އޭނާގެ ސީރީޒް "އައި އެމް ޖޯޖީނާ" ގައި އެ ދެމީހުންގެ ލޯބީގެ ފެށުން ސިފަކޮށްފައިވަނީ ވަރަށް "ހާއްސަ ފެށުމެއް" ގެ ގޮތުގަ އެވެ.
ރޮނާލްޑޯ އާއި ޖޯޖީނާ އެކުގައި އާންމުންގެ ތެރެއަށް ފުރަތަމަ ނުކުތީ 2017 ވަނަ އަހަރުގެ ޖެނުއަރީ މަހު ޒިއުރިކްގައި ބޭއްވި "ބެސްޓް ފީފާ ފުޓްބޯލް އެވޯޑްސް" ގައެވެ. އަދި އެ އަހަރުގެ މެއި މަހު އެ ދެމީހުން ވަނީ އިންސްޓަގްރާމް މެދުވެރިކޮށް އެމީހުންގެ ގުޅުން ރަސްމީކޮށް އިއުލާންކޮށްފަ އެވެ.
