ރަޝިއާގެ ރައީސް ވްލަޑިމިއަ ޕޫޓިންއާ އެކު މޮސްކޯގައި ބޭއްވި މަޝްވަރާތަކަށް ފަހު، ޔޫކްރެއިން ހަނގުރާމަ ހުއްޓާލުމާ ގުޅޭގޮތުން ޔޫކްރެއިންގައި ވެސް "އެފަދަ ބައްދަލުވުންތަކެއް" ބޭއްވޭނެ ކަމަށް އުންމީދުކުރާ ކަމަށް އެމެރިކާގެ ދެ މަންދޫބުން ވިދާޅުވެއްޖެ އެވެ.
ވައިޓް ހައުސްއިން ބުނި ގޮތުގައި، ހޮނިހިރު ދުވަހު ރައީސް ޕޫޓިންއާ އެކު މުހިންމު މަޝްވަރާތަކެއް ކުރެއްވުމަށް ފަހު، އެމެރިކާގެ މަންދޫބުން ކަމަށްވާ ސްޓީވް ވިޓްކޮފް އާއި ޖެރެޑް ކުޝްނާ އާދީއްތަ ދުވަހު ޔޫކްރެއިންގެ ކީވްއަށް ވަޑައިގަތުމަށް ވަނީ ހަމަޖެހިފަ އެވެ.
ޔޫކްރެއިން ހަނގުރާމަ ނިމުމަކަށް ގެނައުމުގެ މަސައްކަތްތައް ބާރުސްޕީޑުގައި ކުރިއަށްދާއިރު، އެ މަޝްވަރާތަކުގެ ތަފުސީލު އަދި ސާފުނުވި ނަމަވެސް، ކުރިއަށް އޮތް ހަފުތާތަކުގެ ތެރޭގައި އެކަމާ ގުޅޭ ރަސްމީ އިިއުލާނެއް ކުރާނެ ކަމަށް ބެލެވެ އެވެ.
މިއީ އެމެރިކާގެ ރައީސް ޑޮނަލްޑް ޓްރަމްޕްގެ އިސް މަންދޫބުން ޔޫކްރެއިންގެ ވެރިރަށް ކީވްއަށް ކުރައްވާ ފުރަތަމަ ދަތުރުފުޅެވެ. މި ދަތުރުފުޅާ ދިމާކޮށް، ރަޝިއާގެ ރައީސް ޕޫޓިން އާއި ޔޫކްރެއިންގެ ރައީސް ވޮލޮޑިމިއަރް ޒެލެންސްކީ ވަނީ ތިން ދުވަހުގެ މުއްދަތަށް އެއް ގައުމުން އަނެއް ގައުމުގެ ވެރިރަށަށް ދޭ ހަމަލާތައް މެދުކަނޑާލުމަށް އެއްބަސްވެވަޑައިގެންފަ އެވެ.
ރަޝިއާގެ ދައުލަތުގެ މީޑިއާތަކުން ރިޕޯޓްކޮށްފައިވާ ގޮތުގައި، ހޮނިހިރު ދުވަހު މޮސްކޯގައި ބޭއްވި ބައްދަލުވުން ތިން ގަޑިއިރަށް ދެމިގެންދިޔަ އެވެ. މި ބައްދަލުވުން ބާއްވާފައިވަނީ ރަޝިއާގެ ވެރިރަށުގެ މެދުތެރޭގައި ހުންނަ ޕޫޓިންގެ ރަސްމީ ގަނޑުވަރުގަ އެވެ.
ޕޫޓިންގެ އެޑްވައިޒަރު ޔޫރީ އުޝަކޯވް އެ މަޝްވަރާތައް ސިފަކުރެއްވީ ވަރަށް ބިނާކުރަނިވި އަދި ދެފުށް ފެންނަ އިހުލާސްތެރި ބައްދަލުވުމެއްގެ ގޮތުގަ އެވެ.
ކުޝްނާ އާއި ވިޓްކޮފް މީގެ ކުރިން އެތައް ފަހަރަކު ރަޝިއާއަށް ޒިޔާރަތްކުރައްވާފައިވެ އެވެ. ނަމަވެސް، ފެބްރުއަރީ 2022 ގައި ހަނގުރާމަ ފެށި ފަހުން ޔޫކްރެއިންގެ ވައިގެ ސަރަހައްދު ބަންދުކޮށްފައިވާތީ، އެ ބޭފުޅުން މޮސްކޯއިން ކީވްއަށް ދަތުރުކުރައްވާނެ ގޮތެއް އަދި ސާފެއް ނުވެ އެވެ.
މި މުހިންމު މަޝްވަރާތައް ކުރިއަށްދަނީ ފާއިތުވި މަސްތަކުގައި ރަޝިއާ އާއި ޔޫކްރެއިންއާ ދެމެދު ވައިގެ މަގުން ދޭ ހަމަލާތައް އިންތިހާއަށް އިތުރުވެފައިވާ ދަނޑިވަޅެއްގަ އެވެ.
