އެމެރިކާއިން ރަޝިޔާއަށް އަޅާފައިވާ ދަތިކުރުމުގެ ފިޔަވަޅުތަކުން ރެކިގަތުމަށް ލިޔެކިޔުން އޮޅުވާލައިގެން ރާއްޖެއިން ރަޝިޔާއަށް މުދާ ބޭރުކުރާ ކަމަށް "ގޯ އިންވެސްޓްމަންޓްސް" އަށް ވޯލް ސްޓްރީޓް ޖާނަލް އިން ޝާއިއު ކުރި ތަހުގީގީ ރިޕޯޓެއްގައި ކޮށްފައިވާ ތުހުމަތުތައް އެ ކުންފުނިން ދޮގުކޮށްފި އެވެ.
އެމެރިކާއިން ރަޝިޔާއަށް އަޅާފައިވާ ދަތިކުރުމުގެ ފިޔަވަޅުތަކުން ރެކިގަތުމަށް ހަބެއްގެ ގޮތުގައި ދިވެހިރާއްޖެ ބޭނުން ކުރާ މައްސަލަ ބޮޑުވެ، އެކަން ހުއްޓުވަން އެމެރިކާގެ ސަރުކާރުން ދިވެހި ސަރުކާރަށް ވަނީ އަންގާފަ އެވެ. އެމެރިކާ ސަރުކާރުގެ ކަންބޮޑުވުންތައް ރާއްޖެއާ ހިއްސާކޮށް، ދަތިކުރުމުގެ ފިޔަވަޅުގެ ލިސްޓުގައި ހިމެނޭ މުދާ ރާއްޖެއިން ރަޝިޔާއަށް އެތެރެވުން ހުއްޓުވަން އެ ގައުމުގެ ސަރުކާރުން އެދިފައިވާކަން ހާމަކުރީ ވޯލް ސްޓްރީޓް ޖާނަލްގެ ރިޕޯޓުގަ އެވެ.
އެއާވޭ ބިލްތަކާއި ޝިޕިން ޑޮކިއުމެންޓް އަދި އޮފިޝަލުންގެ އިންޓަވިއުތަކާ ހަވާލާދީ ވޯލް ސްޓްރީޓް ޖާނަލް އިން ރިޕޯޓުކޮށްފައިވާ ގޮތުގައި ރާއްޖެއިން ރަޝިޔާއަށް މުދާ ބޭރު ކުރަނީ ލިޔެކިޔުން އޮޅުވާލައިގެންނެވެ. އެކަމުގައި އިސްކޮށް ޝާމިލުވާ ދިވެހި ދެ ކުންޏެއް އެ ނޫހުން ވަނީ ހާމަކޮށްފަ އެވެ. އެއީ "ގޯ އިންވެސްޓްމަންޓްސް" އާއި "ފްރެއިޓް ކެއާ" އެވެ.
ސެންކްޝަން ލިސްޓުގައި ހިމެނޭ އެއްޗެއް އެކްސްޕޯޓުކުރުމުގައި އެ ކުންފުނީގެ ބައިވެރިވެފައި ނުވާނެ ކަމަށް އޭގެ ތެރެއިން "ގޯ އިންވެސްޓްމަންޓްސް" ގެ އޮފިޝަލަކު އަދަދު އަށް ވަނީ ބުނެފަ އެވެ.
އެ ރިޕޯޓުގައި ބުނެފައިވާ ގޮތުން، ސެންކްޝަން ލިސްޓުގައި ހިމެނޭ މުދާ ރާއްޖެ މެދުވެރިކޮށް ރަޝިޔާއަށް ގެންދަނީ، އެކި ގައުމުތަކުން ރާއްޖެއަށް އިމްޕޯޓު ކުރުމަށްފަހު، ހުޅުލެއިން ފުރާ އޭރޯފްލޯޓުގެ މަތިންދާބޯޓަކުންނެވެ.
ރާއްޖެއިން ރަޝިޔާއަށް އެގޮތަށް އެކްސްޕޯޓު ކުރާ ތަކެތީގެ ތެރޭގައި މިސައިލް ގައިޑެންސް ސިސްޓަމްތަކުގައި ބޭނުން ކުރެވިދާނެ މައިކްރޯޗިޕްސް އާއި ޓްރެކިން ސެޓެލައިޓުތަކަށް ބޭނުންވާ ހާޑުވެއާ އާއި ޖެޓު ފައިޓަރު އަދި ދުރު ރާސްތާގެ މިސައިލަށް ބޭނުންވާ ދަގަނޑު ބޯލްޓު ހިމެނެ އެވެ.
ވޯލް ސްޓްރީޓް ޖާނަލް އިން ރިޕޯޓުކޮށްފައިވާ ގޮތުގައި، ދަތިކުރުމުގެ ފިޔަވަޅުގެ ލިސްޓުގައި ހިމެނޭ މުދާ ރާއްޖެއިން ރަޝިޔާއަށް އެތެރެވާ މައްސަލައިގެ އެމެރިކާ އަދި ޔޫރަޕުން އަންނަނީ ރާއްޖެއަށް ޕްރެޝަރު ކުރަމުންނެވެ. އަދި އެ ރޫޓު ހުއްޓުވަން ދިވެހި ސަރުކާރަށް ޔޫރަޕާއި އެމެރިކާއިން އަންގާފައިވާ ކަމަށް ވެސް އޮފިޝަލަކާ ހަވާލާދީ އެ ނޫހުގައި ރިޕޯޓުކޮށްފައިވެ އެވެ.
