ސަރުކާރު ކުންފުނި (އެސްއޯއީ) ތަކުގެ މުވައްޒަފުންނަށް އެ ކުންފުނިތަކުގެ ވެރިން ގުޅައި ސަރުކާރު ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) އަށް ސޮއިކުރަން މަޖުބޫރުކޮށް، ވަޒީފާގެ ބިރު ދައްކަން ފަށައިފި އެވެ.
އެސްއޯއީއެއްގެ މުވައްޒަފެއް އަދަދު އަށް ބުނީ އޭނާއަށް ގުޅި ކުންފުނީގެ މެނޭޖަރު ބުނީ ޕީއެންސީއަށް ވީހާވެސް އަވަހަށް ވަނުމަށް ކަމަށެވެ. އެގޮތުން ޕީއެންސީއަށް ނުވަދެއްޖެނަމަ އެ މުވައްޒަފެއްގެ ވަޒީފާ ގެއްލޭނެ ކަމަށްވެސް މެނޭޖަރު ބުނި ކަމަށް އޭނާ ބުންޏެވެ.
"މެނޭޖަރު ގުޅީ. ގުޅާފައި ބުނީ ޕީއެންސީއަށް ވަންނަން. ހުރިހާ މުވައްޒަފުންނަށް ދަނީ ގުޅަމުން. ޕާޓީއަށް ނުވަދެއްޖެއްޔާ ވަޒީފާ ގެއްލޭނެ ކަމަށްވެސް ދަނީ ބުނަމުން،" އޭނާ ބުންޏެވެ.
އެ މުވައްޒަފު މި ނޫހަށް ބުނީ އޭނާ އެއްވެސް ސިޔާސީ ޕާޓީއެއްގައި އުޅެން ބޭނުން ނުވާ ކަމަށާއި ޕާޓީއަށް ވަންނަން މަޖުބޫރުކުރުމަކީ ވަރަށް ބޮޑަށް ކަންބޮޑުވާ ކަމެއް ކަމަށެވެ.
ޕީއެންސީއަށް ގިނަ އަދަދެއްގެ މެންބަރުން ވެއްދުމަށް އެ ޕާޓީން ދަނީ މަސައްކަތް ކުރަމުންނެވެ. އެގޮތުން ދައުލަތުގެ ވަސީލަތްތައް ބޭނުންކޮށްގެން ގިނަ އަދަދެއްގެ މީހުން ވަގަށް އެ ޕާޓީއަށް ވެއްދި މައްސަލައެއްވެސް ފެންމަތިވެފައިވެ އެވެ.
ޕީއެންސީގެ އަމާޒަކީ އެއްލައްކަ މެންބަރުން އެ ޕާޓީއަށް ވެއްދުން ކަމަށްވާއިރު، އެ އަމާޒަށް މިހާތަނަށް ވާސިލުވެވިފައެއް ނުވެ އެވެ. ޖޫން 30، ގެ ނިޔަލަށް އެ ޕާޓީގެ ދަފްތަރުގައި ތިބީ 67،579 މެންބަރުންނެވެ. އެ މުއްދަތާ ހަމައަށް އިދިކޮޅު އެމްޑީޕީގައި ތިބީ 55،399 މެންބަރުންނެވެ.
އެސްއޯއީތަކުން ގިނަ އަދަދެއްގެ މުވައްޒަފުން ދަނީ ވަކިކުރަމުންނެވެ. އޭގެ ތެރޭގައި ގިނައީ ޕީއެންސީއަށް ނިސްބަަތްނުވާ މުވައްޒަފުންކަން ފާހަގަކުރެވެ އެވެ. އެކަމާ ގުޅިގެން ރަށްރަށުގައި އިހުތިޖާޖުތައްވެސް ދަނީ ކުރިއަށް ގެންދަމުންނެވެ.
ހޯމަ ދުވަހު ނޫސްވެރިންނާ ބައްދަލުކުރައްވައި ރައީސް މުހައްމަދު މުއިއްޒު ވިދާޅުވީ އެސްއޯއީތަކުގެ ހިންގުން ހަރުދަނާކުރުމަށް ކުރާ މަސައްކަތުގެ ދަށުން، 6،000 އަށްވުރެ ގިނަ މުވައްޒަފުން ވަކިކުރާނެ ކަމަށެވެ.
އެސްއޯއީތަކުން 14،733 މުވައްޒަފުން ކަނޑާލަން ނިންމާފައިވާ ކަމަށާއި، އޭގެ އަސަރު 50،000 އަށްވުރެ ގިނަ މީހުންނަށް ކުރާނެ ކަމަށް އިދިކޮޅު އެމްޑީޕީން ކުރިން ވަނީ ބުނެފަ އެވެ.
ޕީސީބީން ނެރެފައިވާ ސާކިއުލާއެއްގައި ބުނެފައި ވަނީ 33 ޕަސެންޓު މުވައްޒަފުން މަދުކުރަނީ ކުންފުނިތަކުގެ މުވައްޒަފުންގެ އަދަދު ކުންފުންޏާ އެކަށީގެންވާ މިންވަރަކަށް ކަނޑައެޅުމުގެ ސިޔާސަތުގެ ދަށުން ކަމަށެވެ.
ޕީސީބީން މިދިޔަ އެޕްރީލް 18 ގައި ނެރެފައިވާ ސާކިއުލާއަކާ ހަވާލާދީ، މި ހިނގާ ޖުލައި 13، ވަނަ ދުވަހުން ފެށިގެން ކުރިއަށް އޮތް ތިން މަސްދުވަހުގެ ތެރޭގައި މި ލަނޑުދަނޑި ހާސިލުކުރުމަށް ސަރުކާރު ހިއްސާވާ ހުރިހާ ކުންފުނިތަކަށް މިހާރު ވަނީ އަންގާފަ އެވެ.
މި ނިންމުމާ އެއްގޮތަށް ކުންފުނިތަކުން އަމަލުކުރަމުންދާ ގޮތް ވަރަށް ގާތުން މޮނިޓަ ކުރުމަށް ޕީސީބީން ވަނީ ނިންމާފަ އެވެ. އެގޮތުން، ކުންފުނިތަކުގެ ސައިޒަށް އަންނަ ބަދަލުތައް ކޮންމެ ހަފްތާއެއްގެ އާދިއްތަ ދުވަހު ފޮނުވަމަށް ވެސް ޕީސީބީގެ ސާކިއުލަގައި ބުނެފައިވެ އެވެ.
