"ރައްޔިތުންގެ އަޑު" ޕްރޮގްރާމުގެ ދަށުން ރައީސުލްޖުމްހޫރިއްޔާ މުހައްމަދު މުއިއްޒު ބައްދަލުކުރައްވާ މީހުންގެ ކުށުގެ ރެކޯޑު ރައީސް އޮފީހުން ބަލަމުންދާކަން އެނގިއްޖެ އެވެ.
އަދަދު އާ ވާހަކަ ދެއްކި އިތުބާރު ހުރި މަސްދަރަކުން ބުނީ، މި ޕްރޮގްރާމުގައި ބައިވެރިވާ މީހުންގެ ކުށުގެ ރެކޯޑު ސާފުކުރަން ކޮންމެ ފަހަރަކު ވެސް އެދެނީ ރައީސް އޮފީހުން ކަމަށެވެ. ކުށުގެ ރެކޯޑު ބަލަނީ ބައިވެރިންނަށް ސިއްރުން ކަމަށް ވެސް އޭނާ ބުންޏެވެ.
"ބައްދަލުކުރާ މީހުންނަށް ވެސް މިކަމެއް ނޭނގޭ. އުސޫލުގައި އެ ވާހަކަ ބަޔާންކޮށްފައެއް ވެސް ނެތް،" އޭނާ ބުންޏެވެ.
ރައީސް އޮފީހުން އާންމުކޮށްފައިވާ އުސޫލުގައި ބަޔާންކޮށްފައިވާ ގޮތުންނަމަ، "ރައްޔިތުންގެ އަޑު" ޕްރޮގްރާމުގައި ބައިވެރިވުމަށް ހުށަހަޅަންޖެހެނީ، އެ މީހެއްގެ ނަން، އައިޑީ ކާޑުގެ ކޮޕީ، ދާއިމީ އެޑްރެސް، މިހާރު އުޅޭ އެޑްރެސް، ނިސްބަތްވާ ދާއިރާ، ފޯން ނަންބަރު، އީމެއިލް އަދި ވާހަކަ ދައްކަން ބޭނުންވާ މައުލޫއު އެވެ.
އާންމުކޮށްފައިވާ އުސޫލުގައިވާ ގޮތުން، ބައިވެރިވާން އެދޭ މީހާއާ ގުޅޭ މިނޫން އިތުރު މައުލޫމާތެއް ހޯދާނެ ކަމަކަށް ބަޔާންކޮށްފައެއް ނުވެ އެވެ.
ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީން ފަރުދުންގެ ޒާތީ މައުލޫމާތު ރައްކާތެރިކޮށްދީފައިވާތީ، ހުއްދައެއް ނެތި ޒާތީ އެއްވެސް މައުލޫމާތެއް ހޯދައި ބެލުމަކީ ގާނޫނީ ގޮތުން ކުރެވޭނެ ކަމެއް ނޫނެވެ.
މިކަމާ ގުޅޭ ގޮތުން ރައީސް އޮފީހުގެ ބަހެއް ހޯދުމަށް ކުރި މަސައްކަތުން އެ އޮފީހުގެ ބަހެއް އަދި ވަނީ ލިބޭ ގޮތް ނުވެފަ އެވެ.
