ކުށް ކުރާ މީހުންނަށް ބޭންކް ކާޑާއި ބޭންކް އެކައުންޓު ދޫކުރާ އާންމު ފަރާތްތަކަށް މަނީ ލޯންޑާ ކުރުމުގެ ދައުވާ އުފުލާނެ ކަމުގެ އިންޒާރު ޕްރޮސެކިއުޓާ ޖެނެރަލް އައްބާސް ޝަރީފް ދެއްވައިފި އެވެ.
"މިހާރު" ނޫހަށް ދެއްވި އިންޓަވިއުއެއްގައި އައްބާސް ވިދާޅުވީ ކުށް ކުރާ މީހުންނަށް އެކައުންޓު ކުއްޔަށް ދޭ މިންވަރު އިތުރުވެފައިވާކަން ފާހަގަވެފައިވާ ކަމަށާއި ދައުވާ ކުރަން ނިންމީ އެހެންވެ ކަމަށެވެ.
"ސްކޭމް މައްސަލަތަކުގައި ވެސް ވަރަށް ބޮޑަށް ފާހަގަވޭ އެހެން މީހުންގެ އެކައުންޓް ބޭނުންކުރާކަން. އެކަން ކުރާ މީހާ ނޫން އެހެން މީހެއްގެ އެކައުންޓްތަކުގެ ތެރެއިން ފައިސާ ދައުރުކުރާކަން، އެހެންވީމާ އެ މައްސަލަތައް ވެސް ސީރިއަސްކޮށް ބަލާފައި ދައުވާކުރުމުގެ ވިސްނުން މިހާރު ހުރީ،" އައްބާސް ވިދާޅުވި އެވެ.
ޕީޖީ އޮފީހުގެ އެހެން އޮފިޝަލަކު ބުނެފައި ވަނީ، ކާޑާއި އެކައުންޓު ކުއްޔަށް ނަގާ ފަރާތުން އެ ތަކެތި ބޭނުންކޮށްގެން ކުށެއްކޮށްފި ނަމަ ކާޑު ނުވަތަ އެކައުންޓުގެ ވެރި ފަރާތަށް ދައުވާ ކުރެވޭނެ ކަމަށެވެ.
"މިސާލަކަށް އެކައުންޓް ނުވަތަ ކާޑު އެހެން މީހަކު ބޭނުންކުރަން ކުއްޔަށް ވިޔަސް ނޫނީ ކުއްޔަށް ނޫން ގޮތަށް ވިޔަސް ދީގެން އެ ކާޑު މެދުވެރިކޮށް ޣައިރުގާނޫނީ އަމަލެއް ކުރާ ހާލަތުގައި ކާޑު މެދުވެރިކޮށް މަނީ ލޯންޑްރިންގެ އަމަލެއް ކުރާ ހާލަތުގައި ކާޑުގެ ވެރިފަރާތަށް މަނީ ލޯންޑްރިންގެ އަމަލަކަށް ހިތްވަރު ދިނުން، މަގުފަހިކޮށްދިނުން، ބައިވެރިވުމުގެ ދައުވާކުރެވޭނެ،" ޕީޖީ އޮފީހުގެ އޮފިޝަލަކު ވިދާޅުވި އެވެ.
އެ މައްސަލައިގައި ފުލުހުން ވެސް އިއްޔެ ބަޔާނެއް ނެރުނެވެ. ބޭރު ފައިސާގެ ވިޔަފާރި ކުރާ ހަ ބިދޭސީއަކު ހައްޔަރު ކުރުމަށްފަހު ނެރުނު ބަޔާނެއްގައި ފުލުހުން ބުނީ، ބިދޭސީންގެ ވަގު ވިޔަފާރިތަކަށް ދިވެހިންގެ ނަމުގައި ހުންނަ އެކައުންޓުތަކާއި ވިޔަފާރިތަކުން މަގުފަހިކޮށްދޭކަން ފާހަގަވީ ޑޮލަރުގެ ވިޔަފާރި ކުރާ ފަރާތްތައް ހޯދަން އެކުލަވާލާފައިވާ ޓާސްކްފޯހަށް ކަމަށެވެ.
"ބައެއް އަމިއްލަ ފަރުދުންގެ ނަމުގައި ހުޅުވާފައިވާ ބޭންކް އެކައުންޓުތަކާއި އަމިއްލަ ފަރުދުންގެ ނަމުގައި ރަޖިސްޓްރީކޮށްފައިވާ ވިޔަފާރިތައް، ބިދޭސީން އިސްވެ ހިންގާ ގާނޫނާ ހިލާފު އަމަލުތަކުން ހޯދާ ފައިސާ ދައުރުކޮށް މުއާމަލާތް ކުރުމަށް، އެފަރާތްތަކާ ހަވާލުކޮށްފައި ހުންނަކަން ފާހަގަވޭ،" އެ ބަޔާނުގައި ބުނެފައިވެ އެވެ.
ފުލުހުން ބުނީ ކުށްކޮށްގެން ހޯދާ ފައިސާއިން މުއާމަލާތް ކުރުމަށާއި ދއުރު ކުރަން އެކައުންޓުތަކާއި ވިޔަފާރިތައް ދޫކުރާ ދިވެހިން ހޯދާ އެމީހުންގެ މައްޗަށް ވެސް ފިޔަވަޅު އަޅާނެ ކަމަށެވެ.
"އެއްވެސް ފަރާތެއްގެ ނަމުގައި ހުޅުވާފައިވާ ބޭންކް އެކައުންޓް އެހެން ފަރާތަކުން ހިންގާ ގާނޫނާ ހިލާފު އަމަލުތަކަށް މަގުފަހިކުރުމަށް ދޫކުރުމަކީ އެމީހެއްގެ މައްޗަށް ވެސް ކުށުގެ ބައިވެރިވިއެއްގެ ހައިސިއްޔަތުން ގާނޫނީ ފިޔަވަޅު އެޅިދާނެ ކަމެއް،" ފުލުހުން ބުނެފައިވެ އެވެ. "އަދި މިފަދަ އަމަލުތައް ކުރާ ފަރާތްތައް ހޯދައި ގާނޫނީ ފިޔަވަޅު އަޅަމުންދެންދާނަން."
ޑޮލަރު ވިޔަފާރި ކުރާ ފަރާތްތަކަށް ފިޔަވަޅު އަޅަން ސަރުކާރުން ފަށާފައި މި ވަނީ ދިވެހި ރުފިޔާގެ އަގު ވެއްޓި ޑޮލަރެއްގެ އަގު 23 ރުފިޔާއަށް އަރައިގެން ދިޔުމުންނެވެ. އޭގެ ފަހުން ރައީސް މުހައްމަދު މުއިއްޒު ވަނީ ޑޮލަރުގެ އަގު ހަބަރުތަކުގައި ގެނެސްދިނުން މަނާކޮށްފަ އެވެ.
އޭގެ އިތުރުން، ކަޅު ބާޒާރަށް ޑޮލަރު ވިއްކަނީ ރިސޯޓުތަކުން ކަމަށް ތުހުމަތުކޮށް، ރިސޯޓުތަކަށް ލިބޭ އާމްދަނީގެ 40 ޕަސެންޓު ރުފިޔާއަށް މާރުކުރަންޖެހޭ ގޮތަށް ހެދި އެވެ.
ޑޮލަރު މާރުކުރަން މަޖުބޫރުވާ މިންވަރު އިތުރު ކުރަން މަޖުބޫރުވާ ބިލު ތަސްދީގު ކުރެއްވުމަށްފަހު މުއިއްޒު ވިދާޅުވީ، ރިސޯޓުތަކަކީ ދައުލަތުގެ އެއްޗެހި ކަމަށާއި ރިސޯޓު އޯނަރު މުއްސަނދިވެފައި، އެހެން އެންމެން ދަތިހާލުގައި އުޅެން ދޫކޮށްނުލެވޭނެ ކަމަށެވެ.
"ކީއްވެތޯ ވަކި ބަޔަކު މުއްސަނދިވެފައި އެހެން ހުރިހާ އެންމެން ސަފާކުރަން [ނިކަމެތިކަމުގައި އުޅެން] ޖެހެނީ. ނުޖެހޭނެ އެކަން ކުރާކަށް، އަޅުގަނޑު މިކަމާ އުޅެން ފެށީމާ ބައެއް ބޭފުޅުން ވިދާޅުވި ރާއްޖޭގެ ބަޖެޓު ކުޑަކުރާށޭ، ރައްޔިތުންނަށް ވެފައި ހުރި ވައުދުތައް ހުއްޓާލާށޭ،" ރައީސް ވިދާޅުވި އެވެ.
ރިސޯޓުތަކަށް ލިބޭ އާމްދަނީގެ 40 ޕަސެންޓު ދިވެހި ރުފިޔާއަށް މާރުކުރަންޖެހޭ ގޮތަށް ހަމަޖެއްސިއިރު، ރިސޯޓުތަކުން މުވައްޒަފުންގެ މުސާރަ އާއި ސާވިސް ޗާޖާއި ރިސޯޓު ސަޕްލައި އާއި ތެޔޮ ބިލާއި ޓީޖީއެސްޓީ އާއި އިންކަމް ޓެކްސް އާއި ވިތުހޯލްޑިން ޓެކްސް އާއި އާއި ރަށު ކުއްޔާއި ލޯނުތައް މިހާރު ވެސް ދައްކަނީ ޑޮލަރުންނެވެ.
