ނޭޕާލް-ޓިބެޓް ބޯޑަރު ސަރަހައްދުގައި ފެންބޮޑުވެ ހިނގައިގެން އުޅޭ ހާދިސާގައި އެ ގައުމަށް އެހީވުމަށްޓަކައި އެއް މިލިއަން ރުފިޔާ ހަދިޔާ ކުރަން ދިވެހި ސަރުކާރުން ނިންމައިފި އެވެ.
އޯގަސްޓު 26، ގައި ހިނގި އެ ހާދިސާގައި 1258 މީހުން މިހާތަނަށް ވަނީ މަރުވެފަ އެވެ. އަދި 5000 އަށް ވުރެ ގިނަ މީހުން ގެއްލިގެން ހޯދުމުގެ މަސައްކަތް ދަނީ ކުރަމުންނެވެ. އެތައް ބަޔަކު ވެލިގަނޑުގެ ދަށުގައި ވަޅުލެވިފަ އެވެ.
ނޭޕާލަށް އެއް މިލިއަން ރުފިޔާގެ އެހީތެރިކަމެއް ފޯރުކޮށްދެއްވަން ނިންމަވައި އެކަން އިއުލާން ކުރެއްވީ ރައީސް މުހައްމަދު މުއިއްޒު ކަމަށް ރައީސް އޮފީހުން ބުނެ އެވެ.
"މިއެހީއަކީ ސަރަޙައްދީ އެއްބައިވަންތަކަމަށް ދިވެހިރާއްޖެއިން ދޭ އިސްކަމާއި، ނުރައްކާތެރި ދަނޑިވަޅުތަކުގައި އެއް ގައުމު، އަނެއް ގައުމަށް ހަމްދަރުދީއާއެކު އެހީތެރިވެ، އެ ގައުމަކާއެކު ރާއްޖެއިން ދެމިއޮންނާނެ ކަމުގެ އިތުބާރު ރަމްޒުކޮށްދޭ ކަމެއް،" ރައީސް އޮފީހުން ބުނެފައިވެ އެވެ.
ނޭޕާލްގައި ފެންބޮޑުވާން މެދުވިރިވީ ފަރުބަދައެއްގެ މަތީގައި އޮތް ގްލޭޝިއެއް ނުވަތަ ގަނޑުފެންގަނޑެއް ވެއްޓި، އެއާއެކު ފެނާއި ގަލާއި އެހެންވެސް ތަކެތި ތިރީގައި އޮތް މީހުން ދިރިއުޅޭ ސަރަހައްދަށް ފައިބައިގަނެގެންނެވެ.
އެ ހާދިސާގައި އެ ސަރަހައްދުގެ ފަރުބަދައަކަށް އަޅުކަމަށް ދިޔަ ވަރަށް ގިނަ އަދަދެއްގެ ފަތުރުވެރިން ވަނީ މަރުވެފަ އެވެ. މިހާތަނަށް މަރުވި ފަތުރުވެރިންގެ އަދަދު 700 އަށް ވުރެ ގިނަ އެވެ. އަދި ގެއްލިފައިވާ ފަތުރުވެރިންގެ އަދަދު 2000 އާ ގާތްކުރާ ކަމަށްވެ އެވެ.
