ވެރިކަންކުރާ ޕީއެންސީގެ ތެރޭގައި ހިމޭން އިނގިލާބެއް ހިނގަމުންދާ ކަމަށާއި ދާދި އަވަހަށް މި ހާލަތު ބަދަލުވެގެންދާތަން ފެންނާނެ ކަމަށް ކުރީގެ ރައީސް، އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
ޕީޕަލްސް ނޭޝަނަލް ފްރަންޓު (ޕީއެންއެފް) ގެ އޮފީހުގައި ރޭ ބޭއްވި ޖަލްސާގައި ވާހަކަދައްކަވަމުން ޔާމީން ވިދާޅުވީ ބޭރު ފައިސާއާ ބެހޭ ގާނޫނަށް ގެނައި ބަދަލުތަކާމެދު ހިތްހަމަނުޖެހޭ އެތައް ބަޔަކު ޕީއެންސީގެ މަޖިލިސް މެންބަރުންގެ ތެރޭގައި އެބަތިބި ކަމަށެވެ.
"އެންމެން ތިބީކީ އެމީހުންނާ އެކީގައެއް ނޫން، އަޅުގަނޑަށް އެބަ އެނގޭ އިނގޭތޯ ޑޮލަރު މި މާރުކުރުމާއި މިކަހަލަ ދަތިތަކުގައި އެ ތަނުގައި އެބަތިބި ބްލެކް މާކެޓުން ޑޮލަރު ގަނެގެން ވިޔަފާރިކުރާ މީހުން، އެތަނުގައި އެބަތިބި ސަފާރީ ދުއްވައިގެން ޑޮލަރު ހޯދާ މީހުން، އެމީހުން ތިބީކީ އެއްގޮތަކަށް ވެސް މުއިއްޒުއާ، މަލީހު ވިދާޅުވިހެން މުއިއްޒުއާ އެކީ ގަދަކޮށެއް ނޫން ތިބީކީ، ވަރަށް ރުޅިއައިސްފައި ތިބީ އިނގޭތޯ،" ޔާމީން ވިދާޅުވި އެވެ.
މަޖިލިސް މެންބަރުންގެ ގޮނޑި ގެއްލުވައިލުމުގެ ބާރު ސިޔާސީ ޕާޓީތަކަށް ލިބޭ ގޮތަށް ގާނޫނުއަސާސީއަށް ގެނައި ބަދަލުގެ ސަބަބުން، ޕީއެންސީގެ މެންބަރުންނަށް އިހުސާންތެރިކަމެއް ހިތުގައި ނެތް ކަމަށް ޔާމީން ވިދާޅުވި އެވެ. މަޖިލިސް މެންބަރުންނަކީ ސަރުކާރު ޒިންމާދާރު ކުރުމުގެ ވާޖިބު ކޮނޑުގައި އަޅައިގެން ތިބި ބައެއްކަން ހަނދާންކޮށްދެއްވައި އެމަނިކުފާނު ފާހަގަ ކުރެއްވީ މަޖިލީހަކީ ކޯޓުން ބޭރުން ރައީސުލްޖުމްހޫރިއްޔާއަކު މަގާމުން ވަކިކުރެވޭ ހަމައެކަނި ބާރު ކަމަށެވެ.
"އެތަނުގައި މިހާރު އެ ހިނގަނީ ހަމަ ވަރަށް ސައިލެންޓްކޮށް ހިނގާ އިންގިލާބެއް އެ ހިނގަނީ އިނގޭތޯ؟ ﷲ މިންވަރުކުރައްވާށި، ދާދި ފަސޭހައިން މި ހާލަތު ބަދަލުވެގެންދާތަން އަޅުގަނޑުމެން ބަލަން ތިބޭނަން،" ޔާމީން ވިދާޅުވި އެވެ.
ޔާމީން އެހެން ވިދާޅުވިއިރު، ޕީއެންސީގެ އެތެރޭގައި ހިޔާލުތަފާތުވުންތަކެއް އުޅޭކަމުގެ އަޑުތައް ސޯޝަލްމީޑިއާގައި ވެސް ވަނީ ފެތުރިފަ އެވެ. އެހެންނަމަވެސް، އެއީ ކަނޑައެޅިގެން ދޮގެއް ކަމަށް ވިދާޅުވެ ޕީއެންސީގެ މަޖިލިސް މެންބަރުން ގެންދަވަނީ ރައްދު ދެއްވަމުންނެވެ.
މީގެ ކުރިން ވެސް އެފަދަ އަޑުތަކެއް ފެތުރުމުން ޕީއެންސީގެ ހުރިހާ މެންބަރުންނާއި މިނިސްޓަރުން ވަނީ މުއިއްޒުއާއެކު ގަދަކޮށް ތިބިކަމަށް ވިދާޅުވެ ސޯޝަލްމީޑިއާ ޕޯސްޓުތަކެއް ކުރައްވައިފަ އެވެ.
