މަސްތުވާތަކެތި ވިއްކައި ވިޔަފާރިކުރާ ކަމުގެ ތުހުމަތުގައި މާލެއިން ނުވަ ބިދޭސީއަކު ހައްޔަރުކޮށްފި އެވެ.
ފުލުހުން ބުނީ އެ ނުވަ މީހުން ވެސް ހައްޔަރުކޮށްފައި ވަނީ ޑްރަގް އެންފޯސްމެންޓާއި ކައުންޓާ ނާކޮޓިކްސް އިންޓެލިޖެންސް ގުޅިގެން ހިންގި އޮޕަރޭޝަނެއްގައި މިދިޔަ ބުރާސްފަތި ކަމަށެވެ. އެމީހުން ހައްޔަރުކުރީ ގެސްޓްހައުސްއެއްގެ ތެރެއިން ކަމަށާއި އެ ގެސްޓްހައުސް ބަލައިފާސްކުރިއިރު، އެ ތަނުން މަސްތުވާތަކެތި ކަަމަށް ބެލެވޭ ތަކެތި ފެނިފައިވާ ކަމަށް ފުލުހުން ބުންޏެވެ.
މަސްތުވާތަކެތި ވިއްކާ ވިޔަފާރިކުރާ ކަމުގެ ތުހުމަތުގައި ހައްޔަރުކުރި ހުރިހާ އެންމެންނަކީ ވެސް ބަންގްލަދޭޝްއަށް ނިސްބަތްވާ މީހުން ކަމަށް ފުލުހުން ބުންޏެވެ. މައްސަލައިގެ އިޖުރާއަތުތައް ފުރިހަމަ ކުރުމަށްފަހު، އެ ނުވަ މީހުން ވެސް ޑީޕޯޓުކުރުމަށް މޯލްޑިވްސް އިމިގްރޭޝަނާ ހަވާލުކޮށްފައިވާ ކަމަށް ފުލުހުން ބުންޏެވެ.
އެ މައްސަލަ އިތުރަށް ތަހުގީގުކުރަމުންދާކަމަށް ފުލުހުން ބުންޏެވެ.
މަސްތުވާތަކެތީގެ ވިޔަފާރިކުރާ މައްސަލަތަކުގައި ބިދޭސީން ބައިވެރިވާކަމުގެ ކަންބޮޑުވުން އަބަދުވެސް އޮވެ އެވެ. އަދި، އެފަދަ މައްސަލަތަކުގައި މީގެ ކުރިން ވެސް ބިދޭސީން ހައްޔަރުކޮށްފައިވެ އެވެ.
