ނޭޕާލަށް ކުރިމަތިވި ނުރައްކާތެރި ފެންބޮޑުވުމުގެ ހާދިސާއާ ގުޅިގެން، އެ ގައުމުގެ ރަސުވަގަދީ ހައިޑްރޯޕަވާ ޕްލާންޓުގެ ބިމުގެ އަޑީގައި ޗެމްބަރެއްގައި ތާށިވެފައިވާ ގިނަ ބަޔަކު، ހަފުތާއެއް ފަހުން ވެސް ދިރިތިއްބާ ފެނުމުގެ ފުރުސަތު ބޮޑު ކަމަށް ނޭޕާލް އިލެކްޓްރިސިޓީ އޮތޯރިޓީގެ އޮފިޝަލަކު ބުދަ ދުވަހު ވިދާޅުވެއްޖެ އެވެ.
ނޭޕާލް އިލެކްޓްރިސިޓީ އޮތޯރިޓީގެ ބޯޑު މެންބަރު އަމްޝޫ ކިރަން ޝާހީ ރޮއިޓާސް ނިއުސް އެޖެންސީއަށް މައުލޫމާތު ދެއްވަމުން ވިދާޅުވީ، ރަސުވަގަދީ ހައިޑްރޯޕަވާ ޕްލާންޓުގެ ބިމުގެ އަޑީގައިވާ ޓަނަލްގެ ތެރޭގައި ހުރި ކޮޓަރިއެއް ފަދަ ތަނެއްގައި 46 މަސައްކަތްތެރިން ތާށިވެފައިވާ ކަމަށް ބެލެވޭ ކަމަށެވެ.
އެ މީހުން ތާށިވެފައި ތިބި ތަނުގެ ތެރޭގައި ކާބޯތަކެއްޗާއި ފެން ހުރުމުގެ ސަބަބުން، ހަފުތާއެއް ވެފައިވީ ނަމަވެސް އެ އެންމެން ވެސް ދިރިތިބޭނެ ކަމުގެ ވަރަށް ބޮޑު ޔަގީންކަމެއް އެބައޮތް ކަމަށް ޝާހީ ވިދާޅުވި އެވެ.
ޗައިނާ އާއި ނޭޕާލް ގުޅޭ ބޯޑަރު ކައިރީގައި ފަރުބަދައަކުން ސްނޯ ފައިބައިގެން އައި ގަނޑުފެނާއި، ހިލަޔާއި، ޗަކަ އަދި ކުނިބުނިތަކުގެ ސަބަބުން ކުރިމަތިވި ނުރައްކާތެރި ފެންބޮޑުވުމުގައި ހަލާކުވި ހައިޑްރޯޕަވާ މަޝްރޫއުތަކުން މިހާތަނަށް 279 މީހަކު ނޭޕާލްގެ ކަމާބެހޭ އިދާރާތަކުން ވަނީ ސަލާމަތްކޮށްފަ އެވެ.
ނަމަވެސް، މި ހާދިސާގައި ގެއްލުނު މީހުންގެ ތެރެއިން މަދުވެގެން 639 މީހަކު އަދިވެސް ނުފެނިވާއިރު، އޭގެ ތެރެއިން ބައެއް މީހުން ތާށިވެފައި ތިބީ ހައިޑްރޯޕަވާ މަޝްރޫއުތަކާ ގުޅިފައިވާ ޓަނަލްތަކުގެ ތެރޭގައި ކަމަށް ބެލެވެ އެވެ. އެ މީހުން ހޯދުމަށްޓަކައި ނޭޕާލާއި، އިންޑިއާ އަދި ޗައިނާގެ ރެސްކިއު ޓީމުތަކުން ދަނީ ކޮނުމުގެ މަސައްކަތް ކުރަމުންނެވެ.
