ރަޝިޔާގެ އަމަލުތައް އިތުރަށް ނުރައްކާވަމުންދާ ކަމަށް ބުނެ، ނޭޓޯ އާއި ޔޫރަޕިއަން ކޮމިޝަންގެ އިސްވެރިން އިންޒާރު ދެއްވައި، އެ ގައުމާ ކުރިމަތިލުމަށް ތައްޔާރަށް ތިބި ކަމަށް ވިދާޅުވެއްޖެ އެވެ.
ޖަރުމަނުގެ ލައިޕްޒިގް އެއާޕޯޓަށް ޑްރޯން ބޭނުންކޮށްގެން ދޭން އުޅުނު ހަމަލާއެއް ނާކާމިޔާބުކޮށްލި މައްސަލައިގައި، އެއީ ރަޝިޔާގެ އަމަލެއް ކަމަށް ޖަރުމަނުން ތުހުމަތުކުރިތާ އެއް ދުވަސް ފަހުން، ކޮމިޝަންގެ ރައީސާ އުރުސުލާ ވޮން ޑަ ލޭޔަން ވިދާޅުވީ، ލައިޕްޒިގްގެ ހާދިސާއަކީ ޔޫރަޕްގެ އިއްތިހާދުގެ ބިމުގައި ރަޝިޔާއިން ހިންގި ނުރައްކާތެރި އަމަލެއް ކަމަށެވެ.
ނޭޓޯގެ ސެކްރެޓަރީ ޖެނެރަލް މާކް ރޫޓާ ވިދާޅުވީ، އެމެރިކާ ހިމެނޭހެން އެ އިއްތިހާދުގެ ހުރިހާ ގައުމުތަކެއް އޮތީ ޖަރުމަނާއެކު ސާބިތުކަމާއެކު ކަމަށެވެ.
މިދިޔަ އޮގަސްޓް މަހުގެ 4 ވަނަ ދުވަހު ގޮވާތަކެތި ހަރުކޮށްފައިވާ ޑްރޯންއެއް ބޭނުންކޮށްގެން ޔޫކްރޭންގެ މުދާ އުފުލާ ބޯޓަކަށް ހަމަލާދޭން އުޅުނު ކަމަށް ކުރެވޭ ތުހުމަތުތައް ރަޝިޔާއިން ވަނީ ދޮގުކޮށްފަ އެވެ.
ޖަރުމަނުން އަޅާފައިވާ އާ ދަތިކުރުމުގެ ފިޔަވަޅުތަކަށް ރައްދު ދިނުމުގެ ގޮތުން، ރަޝިޔާގައި ހުންނަ ޖަރުމަނުގެ "ގޯތޭ އިންސްޓިޓިއުޓް" ސަގާފީ މަރުކަޒުތައް ބަންދުކުރާނެ ކަމަށް ރަޝިޔާއިން ވަނީ ބުނެފަ އެވެ.
ލައިޕްޒިގް/ހާލޭ އެއާޕޯޓަށް ފޮނުވާލި ޑްރޯން ރޮބޮޓެއްގެ އެހީގައި ނުގޮވާ ގޮތް ހަދާފައިވާއިރު، ދެވަނަ ޑްރޯންއެއް މުދާ އުފުލާ އެހެން ބޯޓެއްގައި ޖެހިފައިވާ ކަމަށް ބެލެވެ އެވެ.
މީގެ އިތުރުން، ނޭޓޯގެ މުހިންމު މަރުކަޒެއްގެ ގޮތުގައި ބޭނުންކުރާ އަދި ޔޫކްރޭންގެ އެންޓޮނޯވް މަތިންދާބޯޓުތައް ގަވާއިދުން ބޭނުންކުރާ އެ އެއާޕޯޓުން، 10 ދުވަސް ފަހުން ތިންވަނަ ޑްރޯންއެއް ފެނިފައިވާ ކަމަށް ރިޕޯޓުތައް ބުނެ އެވެ.
މި ހާދިސާތަކުގެ ފަހަތުގައި ވަނީ ރަޝިޔާކަން ފުލުހުންގެ ތަހުގީގުތަކާއި އިންޓެލިޖެންސް މައުލޫމާތުން ސާބިތުވާ ކަމަށް ޖަރުމަނު ސަރުކާރުން ހާމަކުރީ މިދިޔަ އަންގާރަ ދުވަހު އެވެ.
ޖަރުމަނުގެ އިންޓީރިއާ މިނިސްޓަރު ވިދާޅުވީ، އެ ޑްރޯން ފަރުމާކޮށްފައިވާ ގޮތާއި، އޭގައި ބޭނުންކޮށްފައިވާ ސާމާނާއި، ގޮވާތަކެތީގެ ބާވަތަކީ ރަޝިޔާއިން މީގެ ކުރިން ހިންގާފައިވާ މިފަދަ އޮޕަރޭޝަންތަކުގައި ބޭނުންކުރާ ތަކެތި ކަމަށެވެ.
ލައިޕްޒިގް ހަމަލާއާ ގުޅިގެން ތުހުމަތުކުރެވޭ ދެ މީހަކު ދެނެގަނެވިފައިވާ ކަމަށް ރިޕޯޓުތައް ބުނެ އެވެ. އޭގެ ތެރޭގައި ޓޫރިސްޓް ވިސާގައި އެތެރެވި ރަޝިޔާގެ ޕާސްޕޯޓް އޮތް ބެލަރޫސް މީހަކާއި، ލެޓްވިއާ އަދި ރަޝިޔާގެ ޕާސްޕޯޓް އޮތް މީހަކު ހިމެނެ އެވެ. ދެވަނަ މީހާ ބާލިންއަށް އައީ މަތިންދާބޯޓެއްގައި ކަމަށާއި، އޭނާ ފުރައިގެން ދިޔައީ ހަމަލާ ދޭން އުޅުނު ދުވަހުގެ ދެ ދުވަސް ކުރިން ކަމަށްވެ އެވެ.
ބާލިންގައި ހުންނަ ރަޝިޔާގެ ކޮންސިއުލޭޓާއި، ރަޝިޔާގެ ސަގާފީ މަރުކަޒު "ރަޝިއަން ހައުސް" ބަންދުކުރާނެ ކަމަށް ޖަރުމަނުން ވަނީ ބުނެފަ އެވެ. ޖަރުމަނުން ތުހުމަތުކުރާ ގޮތުގައި އެ މަރުކަޒަކީ ރަޝިޔާ ސަރުކާރުގެ ޕްރޮޕަގަންޑާ ފެތުރުމަށް ބޭނުންކުރާ ތަނެކެވެ.
ނަމަވެސް، ރަޝިޔާގެ ފޮރިން މިނިސްޓްރީން ބުނީ ޖަރުމަނުން ކުރާ ތުހުމަތުތަކަށް ބާރުދޭ އެއްވެސް ހެއްކެއް ދެއްކިފައި ނުވާ ކަމަށެވެ.
ރަޝިޔާގެ ފޮރިން މިނިސްޓަރު ސަރްގޭ ލަވްރޯވް އިއުލާން ކުރެއްވި ގޮތުގައި، ޖަރުމަނުގެ އަމަލުތަކަށް ރައްދު ދިނުމުގެ ގޮތުން މޮސްކޯ، ސެއިންޓް ޕީޓަސްބާގް އަދި ޔެކަޓެރިންބާގްގައި ހުންނަ "ގޯތޭ އިންސްޓިޓިއުޓް" މަރުކަޒުތައް ބަންދުކުރާނެ އެވެ.
ޖަރުމަނުން ކުރާ "އަސާސެއް ނެތް ތުހުމަތުތައް" ރަޝިޔާއިން ގަބޫލުނުކުރާކަން އެންގުމަށްޓަކައި، ޖަރުމަނުން ރަޝިޔާއަށް ކަނޑައަޅާފައި ހުންނަވާ ޗާޖޭ ޑިއެފެއާޒް ބާންޑް ފިންކޭ ވަނީ ރަޝިޔާގެ ފޮރިން މިނިސްޓްރީއަށް ހާޒިރުކޮށްފަ އެވެ.
ރަޝިޔާގެ ރައީސް ވްލަޑިމިއާ ޕޫޓިން ވަނީ ޖަރުމަނުގެ ފިޔަވަޅުތަކަކީ ބޮޑު ގޯހެއް ކަމަށާއި، އެއީ ޖަރުމަނު ރައްޔިތުންގެ މަސްލަހަތާ ސީދާ ދެކޮޅު ކަމެއްގެ ގޮތުގައި ސިފަކުރައްވައި އެކަން ކުށްވެރިކުރައްވާފަ އެވެ.
ޖަރުމަނާއެކު އޮތް ގުޅުން މޮސްކޯއިން ކަނޑާލަން ތައްޔާރަށް އޮތްތޯ ސުވާލުކުރުމުން، ރަޝިޔާގެ ޑެޕިއުޓީ ފޮރިން މިނިސްޓަރު އެލެގްޒެންޑާ ގްރުޝްކޯ ވިދާޅުވީ އެއީ "ވެދާނެ" ކަމެއް ކަމަށެވެ. ނަމަވެސް މިވަގުތަށް ޑިޕްލޮމެޓިކް މަގުން ކަންކަން ހައްލުކުރަން ފުރުސަތު ދޭނެ ކަމަށް އޭނާ ވިދާޅުވި އެވެ.
