އިނގިރޭސިވިލާތާއި ޔޫރަޕަށް ފާއިތުވި 30 ވަރަކަށް އަހަރުގެ ތެރޭގައި އެންމެ ފާހަގަކޮށްލެވޭ އިރުކޭތަ އިއްޔެ ފެނިއްޖެ އެވެ. މިއީ ޖީލަކުން އެއްފަހަރު ފެންނަ ފަދަ ނާދިރު ކަމަކަށް ވާއިރު، މި މަންޒަރު އެތައް މިލިއަން ބަޔަކު ބަލާފައިވާނެ ކަމަށް ބެލެވެ އެވެ.
އިނގިރޭސިވިލާތުގައި ތިބެގެން އިރުކޭތަ ބެލި މީހުންނަށް ފެނިފައިވަނީ އިރުގެ ބައެއް ފޮރުވުނު "ޕާޝަލް" އިރުކޭތައެކެވެ. އެ ގައުމުގައި އިރުގެ 90 އިންސައްތައަށް ވުރެ ބޮޑު ބައެއް ހަނދުގެ ނިވަލަށް ވަދެފައިވާ މަންޒަރު ގިނަ ބަޔަކަށް ފެނުނެވެ.
ނަމަވެސް، ގްރީންލޭންޑާއި، އައިސްލޭންޑް އަދި ސްޕެއިންގެ ބައެއް ސަރަހައްދުތަކަށް އިރު އެއްކޮށް ފޮރުވި، މުޅި ސަރަހައްދު އަނދިރިވެގެންދިޔަ ފުރިހަމަ އިރުކޭތައެއްގެ ހިތްގައިމު މަންޒަރުތައް ވަނީ ފެނިފަ އެވެ.
މި ފުރިހަމަ އިރުކޭތައިގެ ދަތުރު ފެށުނީ ރަޝިޔާގެ ސައިބީރިއާގެ އުތުރު ބިތުންނެވެ. އެއީ އާންމުންނާއި ޓެލެސްކޯޕްތަކާ ދުރު، އެކަހެރި ސަރަހައްދެކެވެ.
އެއަށްފަހު، އާކްޓިކް ކަނޑުގެ ވަށައިގެން ދަތުރުކޮށް، އިރުއޮއްސެން އުޅެނިކޮށް މި ކޭތަ އައިސްލޭންޑަށް ފޯރިއެވެ. އަދި އޭގެ ފަހުން ދެކުނަށް ދަތުރުކޮށް، އިނގިރޭސިވިލާތަށް މި ހިތްގައިމު މަންޒަރުގެ ބައެއް ވަނީ ފެނިފަ އެވެ.
އިރުކޭތައެއް ކުރިމަތިވަނީ އިރާއި ދުނިޔެއާ ދެމެދުން ހަނދު ދަތުރުކުރާ ވަގުތުގަ އެވެ. މި ހާލަތުގައި އިރުގެ އަލި އެއްކޮށް ނުވަތަ ބައެއް ދުނިޔެއަށް ނުފެންނާނެހެން ހަނދުން ހުރަސްއަޅައި، ދުނިޔެއަށް ހިޔަނި އެޅެ އެވެ.
ދުނިޔޭގެ ކޮންމެވެސް ސަރަހައްދަކަށް ކޮންމެ 18 މަހަކުން އެއްފަހަރު ކަހަލަ ގޮތަކަށް ފުރިހަމަ އިރުކޭތައެއް ފެނެ އެވެ.
ނަމަވެސް، ވަކި ހާއްސަ ސަރަހައްދަކަށް މިފަދަ ފުރިހަމަ ކޭތައެއް ފެނުމަކީ ވަރަށް ނާދިރު ކަމެކެވެ. އާންމު ގޮތެއްގައި އެއް ސަރަހައްދަކަށް ފުރިހަމަ އިރުކޭތައެއް ފެންނަނީ ގާތްގަނޑަކަށް ކޮންމެ 400 އަހަރަކުން އެއް ފަހަރު އެވެ.
