ރަޝިޔާއިން ރާއްޖެއަށް އަންނަ ފަތުރުވެރިން އުފުލާ ފްލައިޓުތަކުގެ އަދަދު އިތުރުކުރަން އެ ގައުމުގެ ސަރުކާރާއެކު އެއްބަސްވުމެއް ހަދައިފި އެވެ.
ރާއްޖެއަށް މިހާރުވެސް އެންމެ ގިނަ ފަތުރުވެރިން ދަތުރުކުރާ އެއް ގައުމަކީ ރަޝިޔާ އެވެ. މިދިޔަ ޖޫން މަހު އެކަނިވެސް އެ ގައުމުން ރާއްޖެއަށް 163،638 ފަތުރުވެރިން ޒިޔާރަތްކުރި އެވެ.
ޓޫރިޒަމް މިނިސްޓަރު، މުހައްމަދު އަމީން އެކްސްގައި ކުރެއްވި ޕޯސްޓެއްގައި ވިދާޅުވީ ރަޝިޔާއިން ރާއްޖެއަށް އަންނަ ފަތުރުވެރިންގެ އަދަދާއި އެ ގައުމުން ރާއްޖެއަށް އަންނަ ފްލައިޓުތަކުގެ އަދަދު އިތުރުކުރުމަށް އެ ޓްރާންސްޕޯޓް އޮފް ރަޝިޔަން ފެޑެރޭޝަންގެ ސްޓޭޓް ސެކްރެޓަރީ، ޑްމީޓްރީ ޒޭރެވް އާއެކު މަޝްވަރާކޮށް އެއްބަސްވުމަކަށް އައިސްފައިވާ ކަމަށެވެ.
"ރާއްޖެއާއި ރަޝިޔާއާ ދެމެދު ވައިގެ ދަތުރުފަތުރުގެ ގުޅުން އިތުރަށް ބަދަހިކުރުމަށް ދެ ގައުމުން ވަނީ އެއްބަސްވެފައި، މި އެއްބަސްވުމުގެ ދަށުން ރަޝިޔާގެ އިތުރު އެއާލައިންތަކުން ރާއްޖެއަށް ދަތުރުތައް ފަށާނެ ކަމަށް ބެލެވޭ،" އަމީން ވިދާޅުވި އެވެ.
ރަޝިޔާއިން ރާއްޖެއަށް އަންނަ ފަތުރުވެރިންގެ އަދަދު މަދުވީ، ކޮވިޑް 19 އާއި ޔޫކްރެއިން ހަނގުރާމައާ ގުޅިގެންނެވެ. އޭގެ ފަހުން ރާއްޖެއަށް އަންނަ ފަތުރުވެރިންގެ އަދަދުތައް ދަނީ މަޑުމަޑުން އިތުރުވަމުންނެވެ.
ރާއްޖެއަށް ރަޝިޔާއިން އަންނަ ފަތުރުވެރިންގެ އަދަދު އިތުރުކުރުމަށް ސަރުކާރުން މަސައްކަތްތަކެއް ކުރަމުން މިދަނީ ރާއްޖޭގެ އިގުތިސާދީ ހާލަތު ގޯސްވެ، ޑޮލަރު އަގު އިންތިހާއަށް އުފުލިފައިވާ ދަނޑިވަޅެއްގަ އެވެ.
