އިންސާނިއްޔަތަށްޓަކައި ޔޫކްރޭންގައި ކުރަމުންދާ ހަނގުރާމަ ނިމުމަކަށް ގެންނަން ޖެހޭ ކަމަށާއި، ހަނގުރާމަ ހުއްޓުވުމަށް ކުރާ ކޮންމެ މަސައްކަތަކަށް އިންޑިއާއިން އެއްބާރުލުން ދޭނެ ކަމަށް އެ ގައުމުގެ ބޮޑުވަޒީރު ނަރެންދުރަ މޯދީ، ރަޝިޔާގެ ރައީސް ވްލަޑިމިއަ ޕޫޓިންގެ އަރިހުގައި ހޯމަ ދުވަހު ވިދާޅުވެއްޖެ އެވެ.
ކިރިގިސްތާނުގެ ވެރިރަށް ބިޝްކެކްގައި ރައީސް ޕޫޓިންއާއެކު ބޭއްވެވި ރަސްމީ މަޝްވަރާތައް ފަށްޓަވަމުން މޯދީ ވަނީ ޕޫޓިންއަކީ އެމަނިކުފާނުގެ "ގާތް އެކުވެރިއެއް" ގެ ގޮތުގައި ސިފަކުރައްވާފަ އެވެ. އަދި ދެ ގައުމުގެ މަސްލަހަތު އިސްކޮށްގެން އިންޑިއާ އާއި ރަޝިޔާއާ ދެމެދު އޮތް އިގްތިސާދީ ގުޅުން ބަދަހިވަމުންދާ ދިއުމަށް މޯދީ ވަނީ ތައުރީފު ކުރައްވާފަ އެވެ.
ރަޝިޔާއިން 2022 ވަނަ އަހަރު ޔޫކްރޭނަށް އެތައް ހާސް ސިފައިންނެއް ފޮނުވައިގެން ފެށި ހަނގުރާމައާ ގުޅިގެން ހުޅަނގުގެ ގައުމުތަކުން އެ ގައުމާ ދެކޮޅަށް ވަރުގަދަ ދަތިކުރުމުގެ ފިޔަވަޅުތަކެއް އެޅި ނަމަވެސް، ރަޝިޔާގެ ތެޔޮ އެންމެ ގިނައިން ގަންނަ ގައުމުތަކުގެ ތެރޭގައި އިންޑިއާ އާއި ޗައިނާ ހިމެނެ އެވެ. މީގެ ސަބަބުން ރަޝިޔާގެ ބަޖެޓަށް ބޭނުންވާ ފައިސާ ހޯދުމަށް ބޮޑު އެހީތެރިކަމެއް ލިބިގެންދެ އެވެ.
ޝަންހާއީ ކޯޕަރޭޝަން އޯގަނައިޒޭޝަން (އެސް.ސީ.އޯ) ސަމިޓުގެ ހަވާސާގައި ދެ ބޭފުޅުން ދެއްކެވި ވާހަކަފުޅުތަކުގެ ޓްރާންސްކްރިޕްޓް ކްރެމްލިންއިން އާންމުކޮށްފައިވާއިރު، މޯދީ ވިދާޅުވީ ހަނގުރާމަ ހުއްޓުވުމަށް ކުރާ ހުރިހާ މަސައްކަތަކަށް އިންޑިއާއިން ތާއީދުކުރާ ކަމަށާއި، ކުރިއަށް އޮތް ތަނުގައި ވެސް އެ އެއްބާރުލުން ދެމުންދާނެ ކަމަށެވެ.
ރަޝިޔާގެ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި، މޯދީގެ ވާހަކަފުޅަށް ޖަވާބު ދެއްވަމުން ރައީސް ޕޫޓިން ވިދާޅުވީ، އެ މަގުން ކުރިއަށް ދިއުމަށް ރަޝިޔާއިން މަސައްކަތް ކުރަމުންދާ ކަމަށެވެ.
ނަމަވެސް، ރަޝިޔާއިން ހަނގުރާމަ ހުއްޓާލަން ތައްޔާރަށް އޮތީ އެ ގައުމުން ބޭނުންވާ ޝަރުތުތަކެއްގެ މަތިން ކަމަށް ކްރެމްލިންއިން ތަކުރާރުކޮށް ބުނަމުންދާއިރު، ޔޫކްރޭނުން ވަނީ އެއީ ބަލައިގަނެވޭނެ ކަންތައްތަކެއް ނޫން ކަމަށް ބުނެފަ އެވެ.
