ޖަރުމަނުވިލާތުގެ ފްރޭންކްފާޓް އެއާޕޯޓުގައި މަސައްކަތްކުރާ ދެ މުވައްޒަފަކު މަދިރީގެ ޒަރީއާއިން ފެތުރޭ ނުރައްކާތެރި ބައްޔެއް ކަމަށްވާ މެލޭރިއާ ޖެހިގެން މަރުވެއްޖެ އެވެ. މި ބަލި އެ އެއާޕޯޓުގެ ހަ މުވައްޒަފަކަށް ވަނީ ޖެހިފަ އެވެ.
ޖަރުމަނުގެ އާންމު ސިއްހަތާ ބެހޭ އިދާރާތަކުން ގަބޫލުކުރާ ގޮތުގައި، މި ބަލި ފަތުރާ މަދިރިތައް ޖަރުމަނުގެ އެންމެ ބާރުބޮޑު އެއާޕޯޓަށް އެތެރެވީ މަތިންދާބޯޓެއްގަ އެވެ. މި ބަލި އެންމެ ފުރަތަމަ ފާހަގަކުރެވިފައިވަނީ މިދިޔަ ޖުލައި މަހުގެ ތެރޭގަ އެވެ.
"ފްރޭންކްފާޓްގެ އާންމު ރައްޔިތުންނަށް މިކަމުގެ ނުރައްކާ އޮތީ ވަރަށް ކުޑަކޮށް. މި ބައްޔަކީ އިންސާނެއްގެ ހަށިގަނޑުން އަނެއް އިންސާނެއްގެ ހަށިގަނޑަށް ފެތުރޭ ބައްޔެއް ނޫން. މިއީ ހަމައެކަނި މަދިރީގެ ޒަރީއާއިން ފެތުރޭ ބައްޔެއް،" އެ އިދާރާއިން ބުންޏެވެ.
އެއާޕޯޓު ހިންގާ ފްރަޕޯޓް ކުންފުނީގެ ތަރުޖަމާނަކު ބުނީ، މި ބަލި ޖެހިގެން އެއް މުވައްޒަފަކު މަރުވެފައިވާ ކަމަށެވެ. ނަމަވެސް، އާންމު ސިއްހަތާ ބެހޭ އިދާރާތަކުން ބުދަ ދުވަހުގެ ފަހުގެ ވަގުތެއްގައި ހާމަކުރި ގޮތުގައި، ބަލި ޖެހުނު މީހުންގެ ތެރެއިން ދެ މީހަކު ވަނީ މަރުވެފަ އެވެ.
މި ހާދިސާއާ ގުޅިގެން އެއާޕޯޓުގައި މިހާރު ވަނީ މަދިރި ނައްތާލުމަށް ފިޔަވަޅު އަޅާފަ އެވެ. އަދި ހިފޭ މަދިރިތައް ލެބޯޓްރީގައި ތަހުލީލުކޮށް، އެއީ ކޮން ބާވަތެއްގެ އަދި ކޮން ސަރަހައްދަކުން އައި މަދިރިތަކެއްތޯ ދެނެގަތުމުގެ މަސައްކަތް ދަނީ ކުރަމުންނެވެ.
"އަޅުގަނޑުމެން ވާނީ ހުރިހާ މުވައްޒަފުންނަށް މިކަމާ ގުޅޭ ފުރިހަމަ މައުލޫމާތު ފޯރުކޮށްދީފައި. އަދި އެއްވެސް އަލާމާތެއް ފެނިއްޖެ ނަމަ ޑޮކްޓަރަކަށް ދެއްކުމަށް ވަނީ އިރުޝާދު ދީފައި،" ފްރަޕޯޓްގެ ތަރުޖަމާނު ބުންޏެވެ.
މި ބަލިމަޑުކަން ފެތުރެން މެދުވެރިވި ސަބަބު ފްރޭންކްފާޓް ޕަބްލިކް ހެލްތު ޑިޕާޓްމަންޓުން ދަނީ ތަހުގީގު ކުރަމުންނެވެ.
ޖަރުމަނުން މެލޭރިއާ ފެންނަނީ އާންމުކޮށް އެ ބަލި އުޅޭ ގައުމުތަކަށް ދަތުރުކުރާ މީހުންގެ ފަރާތުންނެވެ. އަދި ޖަރުމަނުގެ އެއާޕޯޓެއްގެ ތެރޭގައި މި ބަލި ފެތުރުމަކީ ވަރަށް މަދުން ނޫނީ ނުވާ ކަމެއް ކަމަށް ވެސް އިދާރާތަކުން ބުނެފައިވެ އެވެ.
"ބަލިޖެހުނު މީހުންނަކީ ބޭރަށް ދަތުރުކޮށްފައިވާ ބަޔަކަށް ނުވުމުން، ބަލި ދެނެގަތުން ލަސްވުމުގެ ފުރުސަތު އޮވޭ. ބަލި ދެނެގަތުން ލަސްވުމަކީ ބަލީގެ ނުރައްކާ ބޮޑުވެ، ހާލަތު ގޯސްވާ ކަމެއް،" އެ އިދާރާގެ ރިޕޯޓުގައި ފާހަގަކޮށްފައިވެ އެވެ.
އެއާޕޯޓަކުން މެލޭރިއާ ފެނުނު އެންމެ ފަހު ހާދިސާ ރިޕޯޓްކޮށްފައިވަނީ 2023 ވަނަ އަހަރު، ހަމަ ފްރޭންކްފާޓް އެއާޕޯޓުން ކަމަށް ވެސް އެ އިދާރާއިން ބުނެ އެވެ.
ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) އިން ބުނާ ގޮތުގައި، މެލޭރިއާއަކީ ވަކި ބާވަތެއްގެ މަދިރި އިންސާނުންގެ ގައިގައި ދަތް އެޅުމުގެ ސަބަބުން ފެތުރޭ ބައްޔެކެވެ. މި ބަލި އެންމެ ގިނައިން ފެންނަނީ ހޫނު ގައުމުތަކުންނެވެ.
