މާބަނޑު ދުވަސްވަރު ޖެހޭ ހަކުރު ބަލި ނުވަތަ "ޖެސްޓޭޝަނަލް ޑައިބެޓީސް" އިން ރައްކާތެރިވުމަށް ކަސްރަތުގެ ތަފާތު ބާވަތްތައް އެހީތެރިވެދޭ ކަމަށް ބެލެވުނު ނަމަވެސް، މިކަމާ ގުޅޭ ސާފު ހެކިތައް މިހާތަނަށް ހުރީ ވަރަށް މަދުންނެވެ.
ނަމަވެސް، "އެކްޓާ އޮބްސްޓެޓްރިޝިއާ އެޓް ގައިނަކޮލޮޖިކާ ސްކެންޑިނޭވިކާ" މަޖައްލާގައި ޝާއިޢުކޮށްފައިވާ ދިރާސާއަކުން ދައްކާ ގޮތުގައި، ބާރު ބޭނުންކޮށްގެން ކުރާ ކަސްރަތު ނުވަތަ "ސްޓްރެންތް ޓްރެއިނިން" ހެދުމަކީ މާބަނޑު ދުވަސްވަރު ހަކުރު ބަލި ޖެހުމުގެ ފުރުސަތު ކުޑަކޮށްދޭ ކަމެކެވެ.
ޖުމްލަ 209 މާބަނޑު އަންހެނުން ބައިވެރިކޮށްގެން ކުރިއަށްގެންދިޔަ މި ކްލިނިކަލް ޓްރަޔަލްގައި، ބައިވެރިން ވަނީ ބަނޑަށް 12 ހަފުތާއާއި 14 ހަފުތާއާ ދެމެދުގެ މުއްދަތުން ފެށިގެން، 36 ހަފުތާ ފުރެންދެން ނުވަތަ ވިހެއުމާ ހަމައަށް ސްޓްރެންތް ޓްރެއިނިން ޕްރޮގްރާމެއް ފުރިހަމަކޮށްފަ އެވެ.
މި ދިރާސާގެ ނަތީޖާއަށް ބަލާއިރު، ކަނޑައެޅިފައިވާ އުސޫލުން ސްޓްރެންތް ޓްރެއިނިން ފުރިހަމަކުރި މީހުންގެ ތެރެއިން އެއްވެސް މީހަކަށް މާބަނޑު ދުވަސްވަރުގެ ހަކުރު ބަލި ޖެހިފައެއް ނުވެ އެވެ. އެއާ ޚިލާފަށް، އެއްވެސް ކަސްރަތެއް ނުކުރާ "ކޮންޓްރޯލް ގްރޫޕް" ގެ ބައިވެރިންގެ ތެރެއިން 7.3 އިންސައްތަ މީހުންނަށް އެ ބަލި ޖެހިފައިވެ އެވެ.
މީގެ އިތުރުން، ކަސްރަތު ކުރި މީހުންނަށް ލިބުނު ކުދިންގެ ބަރުދަން އާދަޔާ ޚިލާފަށް އިތުރުވުމުގެ އެއްވެސް މައްސަލައެއް ފާހަގަވެފައި ނުވާއިރު، ކަސްރަތު ނުކުރާ ގްރޫޕްގެ 6.3 އިންސައްތަ ކުދިންގެ ބަރުދަން ހުރީ އާދަޔާ ޚިލާފަށް އިތުރުވެފަ އެވެ.
ސްޓްރެންތް ޓްރެއިނިން ހެދި މީހުންގެ ދިރިއުޅުމުގެ ފެންވަރަށް ބޮޑު ކުރިއެރުމެއް ލިބިފައިވާކަން ފާހަގަކުރެވުނުއިރު، މާބަނޑު ދުވަސްވަރު ދިމާވާ އުނދަގޫތައް އެމީހުންނަށް ކުރިމަތިވި މިންވަރު މަދުވެފައިވާ ކަމަށް އެމީހުން ރިޕޯޓްކޮށްފައިވެ އެވެ. އަދި ކަސްރަތު ކުރުމުގެ ސަބަބުން ދުވަސް ނުފުރާ ވިހެއުން ފަދަ އެއްވެސް ނުރައްކާތެރި ސިއްހީ މައްސަލައެއް ކުރިމަތިވެފައި ނުވާކަން ވެސް މި ދިރާސާއިން ވަނީ ކަށަވަރުވެފަ އެވެ.
ސްޕެއިންގެ ސެން ސެބަސްޓިއަންގައި ހުންނަ "ހޮސްޕިޓަލް ޔުނިވަސިޓޭރިއޯ ޑޮނޮސްޓިއާ" ގެ ޑޮކްޓަރެއް ކަމަށްވާ ޓެރޭސާ އީ. ސަންޓާ ކްރޫޒް ވިދާޅުވި ގޮތުގައި، މި ހޯދުންތަކުން އެނގެނީ މާބަނޑު ދުވަސްވަރު ތަރުތީބުކޮށް ސްޓްރެންތް ޓްރެއިނިން ހެދުމަކީ ހަކުރު ބަލީގެ ނުރައްކާ ކުޑަކޮށްދީ، މައިމީހާގެ ދުޅަހެޔޮކަން އިތުރުކޮށްދޭ ކަމެއް ކަމެވެ.
މި ހޯދުންތައް އިތުރަށް ކަށަވަރު ކުރުމަށާއި، މާބަނޑު މީހުންނަށް ދެވޭ އާންމު ސިއްހީ ފަރުވާގެ ތެރޭގައި މިފަދަ ކަސްރަތުތައް އެންމެ ފުރިހަމައަށް ހިމަނާނެ ގޮތް ދެނެގަތުމަށް އިތުރު ދިރާސާތައް ބޭނުންވާ ކަމަށް ވެސް އޭނާ ފާހަގަކުރެއްވި އެވެ.
މައުލޫމާތު: މެޑިކަލް އެކްސްޕްރެސް
