ވާނުވާއެއް ނޭނގި އެތައް ބައެއްގެ ބީއެމްއެލް އެކައުންޓުތަކުން ބޮޑެތި އަދަދުތަކުން ފައިސާ ކެނޑެމުންދާކަމުގެ ކަންބޮޑުވުން އިތުރުވާން ފަށައިފި އެވެ.
ވާނުވާ ނޭނގި އެކައުންޓުތަކުން ފައިސާ ކެނޑިފައިވާ ކަމަށް ބުނާ އެތައް ބަޔަކު ވަނީ އެ މީހުންގެ ބޭންކު އަކައުންޓުގެ މިނީ ސްޓޭޓްމެންޓުގެ ސްކްރީންޝޮޓުތަކާއެކު ސޯޝަލްމީޑިއާ ފުރާލައިފަ އެވެ. އޭގެ އިތުރުން، ވަރަށް ގިނަ އަދަދެއްގެ ބީއެމްއެލް ކަސްޓަމަރުން ވަނީ އެ މީހުންގެ އެކައުންޓުތަކުން ފައިސާ ކެނޑެމުންދާކަން އަދަދު އަށް ކަށަވަރުކޮށްދީފަ އެވެ.
މި ނޫހާ ބައެއް މީހުން ހިއްސާކުރި މައުލޫމާތުގައި ވާގޮތުން، އެކި މީހުންގެ އެކައުންޓުތަކުން މިއަދު ހެނދުނުން ފެށިގެން ދަނީ ފައިސާ ކެނޑެމުންނެވެ. އެ ފައިސާ ކެނޑެމުން ދަނީ އިންޓަނޭޝަނަލް އޭޓީއެމްތަކުންނެވެ.
އެގޮތުން، ބައެއް މީހުންގެ އެކައުންޓުތަކުން ވަނީ އެކި ފަހަރުމަތިން 25ރ. އާއި 100،000ރ. އާ ހަމައަށް ފައިސާ ކެނޑިފަ އެވެ.
އެކަމާ ބެހޭގޮތުން މައުލޫމާތު ސާފުކުރުމަށް، ބީއެމްއެލްގެ ތަރުޖަމާނު، މުހައްމަދު ސައީދުއަށް މި ނޫހުން ގުޅުމުން ފޯނަށް ޖަވާބެއް ނުދެއްވި އެވެ.
އެކައުންޓުތަކުން ފައިސާ ކެނޑޭ މައްސަލައިގައި ބީއެމްއެލްއަށް ގުޅުމުން ފޯނަށް ޖަވާބު ނުދޭ ކަމަށް ބުނެ ސޯޝަލްމީޑިއާގައި އެ ބޭންކުގެ ކަސްޓަމަރުން ވެސް ދަނީ ކަންބޮޑުވުން ފާޅުކުރަމުންނެވެ.
ބީއެމްއެލްއަށް ގުޅުމުން ފޯނަށް ޖަވާބު ދެއްވާފައި ނުވާއިރު، މިހައިތަނަށް އެ ބޭންކުން އެކަމާ ބެހޭގޮތުން ރަސްމީގޮތުން އެއްވެސް އެއްޗެއް ބުނެފައެއް ނުވެ އެވެ. ނަމަވެސް، މިފަދަ ކަންކަމާ ގުޅިގެން ޝަކުވާ ބޮޑުވެއްޖެ ނަމަ، މީގެ ކުރިން ކުޑަ ވަގުތުކޮޅެއްގެ ތެރޭގައި އާންމުކޮށް އެ ބޭންކުން ރަސްމީ ބަޔާންތައް ނެރެ އެވެ.
