މުއިއްޒުގެ ސަރުކާރާއެކު ބޭންކް އޮފް މޯލްޑިވްސް ފުނޑިއްޖެ

ބޭންކް އޮފް މޯލްޑިވްސްއަކީ ދިވެހިރާއްޖޭގެ އެންމެ ބޮޑު ބޭންކެވެ. އެއީ އެސެޓާއި ޑިޕޮސިޓް ބޭސްއަށް ބެއްޔަސް ރާއްޖޭގައި ހިންގާ އެންމެ ތަނަވަސް ބޭންކެވެ. ގާތްގަނޑަކަށް 365،000 ކަސްޓަމަރުން އެ ބޭންކުން ހިދުމަތް ހޯދަ އެވެ. 

ބީއެމްއެލް ރާއްޖޭގައި ހިދުމަތްދޭތާ 43 އަހަރުވެއްޖެ އެވެ. ނޮވެމްބަރު 11، 1982، ގައި ބީއެމްއެލް އިފުތިތާހު ކުރި ފަހުން މި ހޭދަވި ހަތަރު ދަހަރު ތެރޭގައި އެނގި، ދަސްވި ފިލާވަޅަކީ ވެރިންގެ ވަކިތަކުން ބީއެމްއެލް ސަލާމަތް ނުކުރެވުނު ކަމެވެ. ބީއެމްއެލް އަބަދު ވެސް މި އޮންނަނީ ސިޔާސީން ހާވާ "ހަޑިތަކުގައި" ޖެހި މަޅިއެއްގައި ބެދިފަ އެވެ. 

ރައީސް މައުމޫން އަބްދުލްގައްޔޫމުގެ ދިގު 30 އަހަރުގެ ވެރިކަމުގައި ބީއެމްއެލްއަށް އަމާޒުވީ ސިޔާސީ ކުލަވަރާއި ނުފޫޒުގައި ޖެހި ލޯނު ދޫކުރިކަމުގެ ތުހުމަތެވެ. ދިވެހިރާއްޖޭގައި މިހާތަނަށް ހިންގި އެންމެ ބޮޑު ވައްކަމުގެ ގޮތުގައި ބެލެވޭ "އެމްއެމްޕީއާރްސީގެ ވައްކަމުގައި" ނެގި ފައިސާތައް ލޯންޑާކޮށްފައި ވަނީ ބީއެމްއެލް މެދުވެރިކޮށެވެ. އެކަން ހިނގީ ރައީސް އަބްދުﷲ ޔާމީންގެ ވެރިކަމުގަ އެވެ. 

މިހާރު، ރައީސް މުހައްމަދު މުއިއްޒުގެ ވެރިކަމުގައި، ބޭންކުގެ "ބޭންކުވަންތަކަން" ގެއްލި، މާލީ ކުރިމަގު ބަނަވެ، ނަގަމުންދާ ސިޔާސީ ފިޔަވަޅުތަކުގެ ސަބަބުން އެތައް ހިދުމަތްތަކަކަށް ބުރޫއަރައިފި އެވެ. އަދި އެންމެ ބޮޑު ގެއްލުމަކީ އާންމުން ބޭންކާމެދު ކުރަމުން އައި އިތުބާރު ގެއްލުމެވެ. 

އިތުބާރު ގެއްލުމުގެ މައިގަނޑު ސަބަބަކީ، ސިޔާސީ އަނގައެއް ފަދައިން ބޭންކުން ދޮގުހެދުމާއި އޮޅުވާލުމުގައި ދޫނުދިނުމެވެ. މިހާރު ބީއެމްއެލްއަކީ "ދިވެހީންގެ ބޭންކް" އެއް ނޫނެވެ.  އެ ބޭންކު ހިންގަނީ އާންމުންނަށް ހިދުމަތެއް، މަންފާއެއް ހޯދައިދިނުމުގެ ބޭނުމަކު ނޫނެވެ. އެއީ މިހާރު ރައީސް މުއިއްޒުގެ ސިޔާސީ ހަތިޔާރެކެވެ. 

25.01.2024 | ބީއެމްއެލްގެ ބޯޑު ހުއްޓުމަކަށް ގެނައުން 

ދިވެހި ސަރުކާރާ ރައީސް މުއިއްޒު ހަވާލުވިތާ މަދު ދުވަސްކޮޅެއްގެ ތެރޭގައި ވެރިކަމުގެ ލޯ ބީއެމްއެލްއަށް ހުއްޓިއްޖެ އެވެ. މުޅި ބޭންކުގެ ކޮންޓްރޯލް އެކީ ހޯދަން ސަރުކާރުން ބޭނުންވި އެވެ. އެކަން ކުރަން ގެނައީ ވަރަށް ވެސް ކުއްލި އަދި ހައިރާންކުރަނިވި ބަދަލެކެވެ. 

ޖެނުއަރީ 25، 2024، ގައި ބީއެމްއެލްގެ ބޯޑުގައި ހިމެނޭ 10 މެންބަރުންގެ ތެރެއިން ފަސް މެންބަރަކު ސަރުކާރުން ވަކި ކުރި އެވެ. އެއީ ކުރީ ސަރުކާރުން އައްޔަންކޮށްފައިވާ މެންބަރުންނެވެ. ވަކި ކުރި މެންބަރުންގެ ތެރޭގައި ބޭންކުގެ އެއިރުގެ ޗެއާމަން ޔޫޝައު ސައީދު ވެސް ހިމެނިވަޑައިގަންނެވި އެވެ. 

ފަސް މެންބަރުންގެ މަގާމު ގެއްލުވާލުމާއެކު ބީއެމްއެލްގެ ހިންގުން ހުއްޓުމަކަށް ދިޔަ އެވެ. އެއީ، ބޯޑުގެ ހިންގުން ހުއްޓުމަކަށް އަތުވެދާނެ ފަދަ ގޮތެއް މެދުވެރިވި ފުރަތަމަ ފަހަރެވެ. 

ބީއެމްއެލްގެ ހިންގާ ގަވާއިދުގެ 58 ވަނަ މާއްދާގައި ބުނެފައި ވަނީ ޑިރެކްޓަރުންގެ އަދަދު އަށަކަށް ވުރެ މަދުވެއްޖެ ނަމަ ނުވަތަ އިންތިހާބުކޮށްފައިވާ ޑިރެކްޓަރުންގެ އަދަދު ދޭކަށް ވުރެ މަދުވެއްޖެނަމަ ކުއްލި ހާލަތެއްގައި މެނުވީ ނުވަތަ ކުންފުނީގެ އާންމު ޖަލްސާއަކަށް ގޮވާލުމަށްޓަކައި މެނުވީ ބޯޑުން އެއްވެސް ފިޔަވަޅެއް ނޭޅޭނެ ކަމަށެވެ. 

ހުލާސާކޮށް އިއްޔެ: ބީއެމްއެލްގެ ޗެއާމަންއާއެކު ބޯޑުގެ ފަސް ޑިރެކްޓަރުން ވަކިކުރުން

އެ ފިޔަވަޅު ސަރުކާރުން އެޅީ ވަރަށް ވިސްނައި، ދުރާލައި ރާވައިގެން ކަމަށް ބަލައިގެން ތިއްބާ، ވަކި ކުރި މެންބަރުންގެ ތެރެއިން ދެ މެންބަރެއް އަލުން ބޯޑަށް އައްޔަން ކުރި އެވެ. އެއީ އަބްދުﷲ ހަސަން އާއި އައިޝަތު ސަޖުނީ އެވެ.

އޭގެ އިތުރުން ޗެއާމަންގެ މަގާމުގައި ހުންނެވި ޔޫޝައު އަލުން ބޯޑަށް އައްޔަން ކުރަން ވެސް ސަރުކާރުން މަސައްކަތް ކުރި އެވެ. ނަމަވެސް ޔޫޝައު ވަނީ އަލުން އެނބުރި މަގާމަށް ވަޑައިގަތުމަށް އިންކާރު ކުރައްވައިފަ އެވެ. 

ބޭންކުގެ ބޯޑުން ވަކި ކުރި ތިން މެންބަރަކަށް އަލުން އެ މަގާމުތައް ދޭން ސަރުކާރުން މަސައްކަތް ކުރީ ބޭންކުގެ ހިންގުން ހުއްޓިފައި އޮތުމުންނެވެ. އެއާއެކު ދެން އުފެދުނު ސުވާލަކީ، ބޯޑުން ފަސް މެންބަރަކު ވަކިކުރިއިރު ބޭންކުގެ ހިންގުން ހުއްޓުމަކަށް އަންނާނެކަން ސަރުކާރަށް ހަމަ ނޭނގުނީތޯ އެވެ. 

22.08.2024 | ސަރުކާރަށް ދީލައިނުލައިގެން އައިޝަތު ނޫރައްދީން ވަކި ކުރުން 

ބީއެމްއެލްގެ ޑެޕިއުޓީ ސީއީއޯގެ މަގާމުގައި ހުންނެވި އައިޝަތު ނޫރައްދީން، ބޭންކުގެ ޑިރެކްޓަރުންގެ ބޯޑުން ވަކި ކުރި ކަމަށް އަންގައި ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އޭނާއަށް އޯގަސްޓް 22، 2024، ގައި ސިޓީއެއް ފޮނުވި އެވެ. 

ބޯޑުން މެންބަރަކު ވަކި ކުރުމަކީ މާ ބޮޑު ކަމަކަށް ސަރުކާރުން ނުދެކުނު ނަމަވެސް އައިޝަތު ނޫރައްދީނުގެ ކޭސް ތަފާތެވެ. 

ފުރަތަމަ ކަމަކީ، އޭނާ ވަކި ކުރުމުގެ ބާރު ހިންގާ ގަވާއިދުގެ ތެރެއިން ސަރުކާރަށް ނުލިބުމެވެ. ހިންގާ ގަވާއިދުގައި ބަޔާންކޮށްފައި އޮންނަނީ، ޑިރެކްޓަރުންގެ ބޯޑުގެ މެންބަރަކު މަގާމުން ވަކި ކުރަން ބޭނުންވެއްޖެ ނަމަ އެކަން ކުރެވޭނީ އާންމު ހިއްސާދާރުންގެ ޖަލްސާއަކުން ފާސްކޮށްގެން ކަމަށެވެ. 

ބޭންކް އޮފް މޯލްޑިވްސްގައި ދިވެހި ސަރުކާރުގެ 51 ޕަސެންޓު ހިއްސާ އޮވެ އެވެ. އެހެންކަމުން، ހިއްސާދާރުންގެ ޖަލްސާއަކަށް ހުށަހަޅައިގެން އައިޝަތު ނޫރައްދީން ވަކި ކުރުމަކީ ސަރުކާރަށް އުނދަގޫ ކަމަކަށް ނުވާނެ އެވެ. 

ބީއެމްއެލްގެ ބޯޑުން އައިޝަތު ނޫރައްދީން އިސްތިއުފާ ދެއްވައިފި

ބޭންކުގެ އެންމެ ގިނަ ދުވަސްވީ މުވައްޒަފުންގެ ތެރޭގައި ހިމެނޭ އައިޝަތު ނޫރައްދީން ބޯޑުން އިސްތިއުފާ ދެއްވީ، އޭނާ ހުންނެވި މަގާމުންނާއި ބޯޑު މެންބަރުކަމުން ވަކިކޮށްފައިވާ ކަމަށް ބުނެ ޕީސީބީން ސިޓީ ފޮނުވާފައި ވަނިކޮށް.

ނަަވެސް މުއިއްޒުގެ ސަރުކާރުން ބޭނުންވީ ހިނދުން ހިނދަށް އޭނާ ވަކި ކުރުމަށެވެ. ޕީސީބީގެ ސިޓީއެއް މެދުވެރިކޮށް އައިޝަތު ނޫރައްދީން ވަކި ކުރީ އެހެންވެ އެވެ. އެކަމަކު، ޕީސީބީގެ ސިޓީއަށް އޭނާ ތަބާވި ކަމެއް ނޭނގެ އެވެ. ގަވާއިދުގައި ބުނާ ގޮތުން ޑިރެކްޓަރުންގެ ބޯޑުން ވަކި ނުވާހާ ހިނދަކު މެންބަރުން އެ މެންބަރުންގެ ޒިންމާ އަދާކުރަންޖެހެ އެވެ. 

ސިޓީ ލިބިވަޑައިގެންނެވިތާ ތިން ވަނައަށް ވީ ދުވަހު އައިޝަތު ނޫރައްދީން، ބީއެމްއެލްގެ ޑިރެކްޓަރުންގެ ބޯޑުން އިސްތިއުފާ ދެއްވި އެވެ. 

އައިޝަތު ނޫރައްދީން ވަކި ކުރުމުގެ ފަހަތުގައި އޮތް ސަބަބެއް ކަމަށް އެއިރު އަޑު ފެތުރުނީ، ސަރުކާރުން ބޭނުންވާހާ ގޮތަކަށް ބޭންކުން ކަން ނުކުރުމެވެ. ސަރުކާރަށް ބޮޑެތި އަދަދުތަކުން ލޯނު ދިނުމާއި އާންމުންނަށް ދޫކުރާ ޑޮލަރުގެ ލިމިޓުތައް ސަރުކާރުން ބޭނުންވާ މިންވަރެއްގައި ހިފެހެއްޓުމަށް ބީއެމްއެލްއަށް ވަރަށް ބޮޑެތި ޕްރެޝަރުތައް އަންނަމުންދިޔަ އެވެ.

08.08.2024 | މަރުކަޒީ ބޭންކުގެ އެހީގައި ބީއެމްއެލް ސިޔާސީ ކުރަން ފެށުން 

މޯލްޑިވްސް މަނިޓަރީ އޮތޯރިޓީއަކީ ދިވެހިރާއްޖޭގައި ހިންގާ މާލީ އިދާތާރަކުގެ ބެލެނިވެރި ފަރާތެވެ. ބޭންކުތައް ހިންގަންޖެހޭ ގަވާއިދުތައް ހަދަނީ ވެސް އެމްއެމްއޭ އިންނެވެ. އަދި އެ ގަވާއިދުތަކަށް މާލީ އިދާރާތަކުން ތަބާވޭތޯ ބެލުމަކީ އެމްއެމްއޭގެ ޒިންމާއެކެވެ. 

މަރުކަޒީ ބޭންކުން ހަދާފައި އޮތް އަދި މީގެ ކުރިން އަމަލު ކުރަމުން އައި އުސޫލަކީ، ސިޔާސީ މަގާމެއްގައި ހުރި މީހަކަށް މާލީ އިދާރާއެއްގެ ބޯޑުގައި ނުހުރެވޭ ގޮތް ހެދުމެވެ. ނަމަވެސް އޯގަސްޓު 8، 2024، ގައި ސިޔާސީ ބޭފުޅުން ވެސް ބޭންކުގެ ބޯޑަށް އައްޔަން ކުރެވޭ ގޮތަށް އެމްއެމްއޭއިން ގަވާއިދު އިސްލާހު ކުރި އެވެ.

އެއާއެކު، ސެޕްޓެމްބަރު، 2024، ގައި ރައީސް މުއިއްޒުގެ ކެބިނެޓު ސެކްރެޓަރީ އަހުމަދު އަލީ ހަބީބު ބީއެމްއެލްގެ ބޯޑަށް އައްޔަން ކުރި އެވެ. އެހެންކަމުން، އެމްއެމްއޭގެ ގަވާއިދު އިސްލާހު ކުރީ ހަބީބަށް ބޭންކުން ޖާގައެއް ދިނުމަށް ކަމަށް ބެލުމުގެ ފުރުސަތު އެބަ އޮތެވެ. 

މާލީ އިދާރާތަކުގެ ބޯޑަށް ސިޔާސީ ބޭފުޅުން އައްޔަން ކުރަން ނިންމުމުން، ވަރަށް ގިނަ ބައެއްގެ ފާޑުކިޔުން އެކަމަށް އަމާޒުވި އެވެ. އެކަމަށް ފާޑުވިދާޅުވަމުން ކުރީގެ އިގްތިސާދީ މިނިސްޓަރު ފައްޔާޒް އިސްމާއިލް ވިދާޅުވެފައި ވަނީ  އެ ނިންމުމަކީ މުޅި މާލީ ނިޒާމު ފަހަތަށް ސޮއްސައިލާނެ ނިންމުމެއް ކަމަށެވެ.

"މިހާތަނަށް އެއްވެސް ސަރުކާރަކުން މި ގޮތަށް މިކަން ނުކުރީ މާލީ ނިޒާމުގެ އިންޓެގްރިޓީ ހިފެހެއްޓުމަށް. މި ސަރުކާރުން މިފެންނަނީ މާލީ ނިޒާމު އެތައް އަހަރުތަކެއް ފަހަތަށް ޖައްސާލާ މަންޒަރު،" ފައްޔާޒް ވިދާޅުވެފައިވެ އެވެ. 

އެމްއެމްއޭގެ އެ ނިންމުމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވެސް ފާޑުވިދާޅުވެފައިވެ އެވެ. 

"އަސްލު ހީވަނީ ބޭންކް އޮފް މޯލްޑިވްސްގައި ސިޔާސީ ނުފޫޒު ހިންގަން މަސައްކަތް ކުރެވެނީ. ބޭންކް އޮފް މޯލްޑިވްސްގެ ބޯޑަށް ސްޓޭޓް މިނިސްޓަރު ލެވަލްގެ މީހުން އައްޔަނުކޮށްފައި ސީދާ ސަރުކާރުގެ ނުފޫޒު ބޭންކް އޮފް މޯލްޑިވްސްއަށް ހިންގަން،" އަމީރު ވިދާޅުވި އެވެ.

25.08.2024 | ބީއެމްއެލްގެ ބޮލުގައި ސަރުކާރު ވައްޓާލަން އުޅުން ކަމުގެ ތުހުމަތު

ބޭންކް އޮފް މޯލްޑިވްސްއަށް ދިމާވަމުންދާ މާލީ ދަތިތަކުން ސަލާމަތްވެ، ބޭންކު ސަލާމަތް ކުރަން އޯގަސްޓް 25، 2024، ގައި ބޭންކުން މުހިންމު ފިޔަވަޅެއް އެޅި އެވެ. 

ބޭންކުން ނިންމީ ރުފިޔާ ކާޑުތަކަށް ދޫކުރާ ޑޮލަރު ލިމިޓު އެއްކޮށް ކަނޑާލައި، ކްރެޑިޓް ކާޑަށް ދޫކުރަމުން އައި ލިމިޓު 100 ޑޮލަރަށް ތިރިކުރުމަށެވެ. 

އޭގެ ކުރިން، މެއި، 2024، ގައި ބީއެމްއެލްގެ ސީއީއޯގެ މަގާމުގައި ހުންނެވި ކާލް ސްޓުމަކް ވަނީ އެފަދަ ނިންމުމަމާ ހަމައަށް ދާންޖެހިދާނެ ކަމުގެ ނުސީދާ ސިގުނަލެއް ދެއްވައިފަ އެވެ. 

"ގަންނަން ލިބުނު އަދަދަށްވުރެ އިތުރަށް 333 މިލިއަން ޑޮލަރު ވިއްކިން. މިއީ ދެމެހެއްޓޭނެ ކަމެއްނޫން،" ބީއެމްއެލްގެ އަހަރީ އާންމު ޖަލްސާގައި ވާހަކަ ދައްކަވަމުން ސްޓުމަކް ވިދާޅުވެފައިވެ އެވެ.

ގަންނަން ލިބުނު އަދަދަށްވުރެ އިތުރަށް 333 މިލިއަން ޑޮލަރު ވިއްކިން، މިއީ ދެމެހެއްޓޭނެ ކަމެއް ނޫން: ބީއެމްއެލް ސީއީއޯ

2019 ވަނަ އަހަރުން ފެށިގެން ރާއްޖޭގެ އިގުތިސާދަށް އެހީތެރިވުމުގެ ގޮތުން ކަސްޓަމަރުންނާއި އެމްއެމްއޭ އިން ބީއެމްއެލްއަށް ގަންނަން ލިބުނު ފައިސާގެ އަދަދަށްވުރެ 333 މިލިއަން ޑޮލަރުގެ އިތުރަށް ވިއްކާފައިވާ ކަން ކާލް ފާހަގަކުރެއްވި.

ޑޮލަރު ލިމިޓު ކަނޑާލަން ބީއެމްއެލް އިން ނިންމި ދުވަހު ހަމަ އެ ނިންމުން ބަދަލު ކުރި އެވެ. އަޖައިބު ކުރުވަނިވި ފަދަ ގޮތަކަށް، ބޭންކުގެ ނިންމުން ބަދަލު ކުރަން މަޖުބޫރު ކުރީ މަރުކަޒީ ބޭންކުންނެވެ. 

"25 އޯގަސްޓު 2024 ގައި އިއުލާނު ކުރި ރާއްޖެއިން ބޭރުގެ މުއާމަލާތު ކުރެވޭ ލިމިޓުތަކަށް ގެނެވުނު ބަދަލުތައް ބޭންކުގެ ރެގިއުލޭޓަރު، މޯލްޑިވްސް މަނިޓަރީ އޮތޯރިޓީގެ އިރުޝާދަށް ބަލައި މިހާރު ވަނީ އަނބުރާ ގެނެވިފަ،" ބީއެމްއެލް ނެރުނު ކުރު ބަޔާނެއްގައި ބުނެފައިވެ އެވެ. 

ހަމަ އެ ދުވަހު، ބޭންކުގެ މާލީ ކަންކަން ބައްޓަން ކުރަންވީ ގޮތުގެ އިރުޝާދު ސީދާ ރައީސް މުއިއްޒު ދެއްވަމުންދާ ކަމަށް އިގްތިސާދީ މިނިސްޓަރު މުހައްމަދު ސައީދު އިއުތިރާފުވެވަޑައިގެންނެވި އެވެ. އަދި ޑޮލަރު ލިމިޓުތައް ކަނޑާލީ ސީދާ މުއިއްޒު އަންގަވާފައިވާ އެންގުންތަކާ ހިލާފަށް ކަމަށް މިނިސްޓަރު ވިދާޅުވި އެވެ. 

"ބީއެމްއެލްއިން މިއަދު އަމަލު އެ ކުރީ ސީދާ ރައީސް އެކަން އެގޮތަށް ނުކުރަން އަންގާފައި އޮއްވައި،" އެ ދުވަހު ބޭއްވި ނޫސްވެރިންގެ ބައްދަލުވުމެއްގައި ސައީދު ވިދާޅުވި އެވެ.

ޖެހިގެން އައި ދުވަހުގެ ރޭ، ބީއެމްއެލްގެ މާލީ ނިންމުން މުޅިން އެހެން ގޮތަކަށް ސަރުކާރުން "އަނބުރާލި" އެވެ. އޯގަސްޓު 26، 2024، ގައި ވެރިކަން ކުރާ ޕީޕަލްސް ނެޝަނަލް ކޮންގްރެސްގެ ހަރުގެއެއްގައި ބޭއްވި ޖަލްސާއެއްގައި ރައީސް މުއިއްޒު ވިދާޅުވީ ބީއެމްއެލް އިން ގެންނަން އުޅުނީ "މާލީ ބަޣާވާތެއް" ކަމަށެވެ. 

"މި ކުރި ކަންތައް، ސަލާމަތް ބުއްދި ހުރި ކޮންމެ މީހަކު މި ދެންނެވި ހުރިހާ ޑޮޓުތަކެއް ގުޅިގެންދާކަން އެނގޭނެ، މިކުރި ކަންތައް މިއީ، ހަމަ ޝިޔާމު [މިނިސްޓަރު އަހުމަދު ޝިޔާމު] ވެސް ފާހަގަކުރެއްވި ގޮތަށް ވާނީ ހަމަ އެޓެމްޕެޑް ކޫއަކަށް، އެކުރި ބަޔަކު ކުރީ،" ރައީސް މުއިއްޒު ވިދާޅުވި އެވެ.

ވަރަށް ހަރުކަށިކޮށް ވާހަކަ ދައްކަވަމުން ރައީސް އެ ރޭ ދެއްވީ، ބީއެމްއެލްގެ އިސް ވެރިންނަށް ފިޔަވަޅު އަޅުއްވާނެ ކަމުގެ އިންޒާރެވެ. 

"މިނިވަން ކަމާ އެކީގައި މިކަން ބަލައި ހުކުމެއް މީހަކަށް އައިސްފިއްޔާ ތަންފީޒު ކުރުމުގައި ފަހަތަކަށް ނުޖެހޭނަން، އެއީ އަދުލުވެރިވުމަކީ،" މުއިއްޒު ވިދާޅުވި އެވެ.

އިއްޔެ ގެންނަން އުޅުނީ ސީދާ ބަގާވާތެއް: ރައީސް މުއިއްޒު

"މި ކުރި ކަންތައް، ސަލާމަތް ބުއްދި ހުރި ކޮންމެ މީހަކު މި ދެންނެވި ހުރިހާ ޑޮޓުތަކެއް ގުޅިގެންދާކަން އެނގޭނެ، މިކުރި ކަންތައް މިއީ، ހަމަ ޝިޔާމު [މިނިސްޓަރު ޝިޔާމު] ވެސް ފާހަގަކުރެއްވި ގޮތަށް ވާނީ ހަމަ އެޓެމްޕެޑް ކޫއަކަށް، އެކުރި ބަޔަކު ކުރީ،"

ބޭންކުގެ ނިންމުން މާލީ ބަޣާވާތަކަށް ވީ ގޮތަކީ، އެ ނިންމުން އިއުލާނު ކުރިއިރު، އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ފަރާތުން، ދިވެހިރާއްޖޭގެ މާލީ ހާލަތާ ބެހޭ ގޮތުން ނޫސްވެރިންގެ ބައްދަލުވުމެއް ބޭއްވުމެވެ. 

"އިއްޔެ އިރު އެރި އިރުގައި މާލީ ބަގާވާތެއް ގެންނަން މި މީހުން އަޑީގައި ތިބެގެން، މާލީ ބަގާވާތެއް ގެންނަން މަސައްކަތް ކުރީ. އެއީ އިއްތިފާގެއް ނޫން. ގައުމީ ބޭންކުން ދިވެހި ރައްޔިތުންގެ ކަރުގަހިފަން އެ ނިންމި ނިންމުން ނިންމި އިރުގައި އެމްޑީޕީގެ ބޭފުޅުން ތިއްބެވީ ޕްރެސް ކޮންފަރެންސެއްގައި،" ޝިޔާމް ވިދާޅުވި އެވެ.

ގެންނަން އުޅުނު ކަމަށް ސަރުކާރުން ބުނި މާލީ ބަޣާވާތުގެ ތަހުގީގު ފުލުހުން ކުރިއަށްގެންދަނިކޮށް، ބޭންކުގެ ސީއީއޯ ސްޓުމަކް އޭނާގެ ސަލާމަތް ހޯއްދެވުމަށް އޯގަސްޓް 31، 2024، ގައި ޑުބާއީ ފުރާވަޑައިގެންނެވި އެވެ. އަދި ރާއްޖެއިން ބޭރުގައި ހުންނަވާ ސެޕްޓެމްބަރު 9، 2024، ގައި އޭނާ މަގާމުން އިސްތިއުފާ ދެއްވި އެވެ. 

މާލީ ބަޣާވާތް ތަހުގީގު ކުރަނީ ކަމަށް ބުނެ ފުލުހުން މީޑިއާއަށް "މަންޒަރެއް" ދެއްކި އެވެ. ނަމަވެސް ހަގީގަތަކީ، އެ ބުނާ ތަހުގީގެއް ސީރިއަސްކަމާއެކީ ނުހިނގާ ކަމެވެ. އެންމެ ފަހުން މެއި، 2026، ގައި ހާމަވީ އެ ބުނާ މާލީ ބަޣާވާތުގެ ތަހުގީގު ފުލުހުން ފައިލު ކުރި ކަމަށެވެ. ކަން ނިމުނުއިރު ފުލުހުން ބުނީ އެ މައްސަލައިގައި ތަހުގީގު ކުރާނެ ޖިނާއީ ކުށެއް ނެތް ކަމަށެވެ. 

"މި ހިދުމަތުގެ ރިކޯޑްތަކުން ދައްކާ ގޮތުން، 2024 ވަނަ އަހަރު ބޭންކް އޮފް މޯލްޑިވްސްގެ ނިންމުމަކާ ގުޅިގެން އުފެދުނު ކަންތައްތަކާ އެކު ކުރެވުނު ތުހުމަތުތައް ބެލިބެލުމުން، ޖިނާއީ ތަހުގީގެއް ހިންގަންޖެހޭ ފަދަ ހާލަތެއް ނެތުމާ އެކު އެ ކަމަކީ ކްލޯސްކޮށް ނިންމާފައި އޮތް ކަމެއް،" އާރްޓީއައިގެ ޖަވާބަކަށް ފުލުހުން ފޮނުވި ސިޓީއެއްގައި ބުނެފައިވެ އެވެ.

16.10.2024 | ބީއެމްއެލްގެ ސީއީއޯގެ މަގާމަށް ނަޒާހާތްތެރިކަމާމެދު ސުވާލު އުފެދިފައިވާ ބޭފުޅެއް 

ބޭންކުގެ 44 އަހަރުގެ ތާރީހުގައި ސީއީއޯގެ މަގާމަށް ފުރަތަމަ ފަހަރަށް ދިވެއްސަކު އައްޔަން ކުރީ އޮކްޓޯބަރު 16، 2024، ގަ އެވެ. އެ މަގާމަށް އައްޔަން ކުރީގެ ޑެޕިއުޓީ ސީއީއޯ މުހައްމަދު ޝަރީފެވެ. 

ބީއެމްއެލްގެ ސީއީއޯގެ މަގާމަށް ދިވެއްސަކު އައްޔަން ކުރުމަކީ ހާސިލު ކުރެވުނު މުހިންމު ލަނޑުދަނޑިއެއް ކަމަށް އެ ބޭންކުން އެ ދުވަހު ބުންޏެވެ. 

"މިއީ ބޭންކަށާއި ދިވެހިރާއްޖޭގެ މާލީ ދާއިރާއަށްވެސް ހާސިލްކުރެވުނު މުހިންމު ލަނޑުދަނޑިއެއް،" ބީއެމްއެލްއިން ނެރުނު ބަޔާނެއްގައި ބުނެފައިވެ އެވެ.

ބޭންކުގެ ސީއީއޯގެ މަގާމަށް ޝަރީފް އައްޔަން ކުރުމުން މާލީ ދާއިރާގައި މަސައްކަތް ކުރާ ގިނަ ބަޔަކަށް ސިހުން ލިބުނެވެ. ސަބަބަކީ، ބޭންކަކީ އިތުބާރުގެ މައްޗަށް ބިނާވެފައިވާ އިދާރާއަކަށްވާއިރު، ޝަރީފުގެ ނަޒާހާތްތެރިކަމާމެދު ސުވާލު އުފެދިފައިވުމެވެ. 

ބީއެމްއެލް މެދުވެރިކޮށް ހިންގި އެމްއެމްޕީއާރްސީގެ ވައްކަން، މީގެ ކުރިން އޮތް 19 ވަނަ ރައްޔިތުންގެ މަޖިލީހުން ތަހުގީގު ކުރަމުންދިޔަ އިރު އެ މަޖިލީހުގެ ކޮމިޓީއަކުން ވަނީ ޝަރީފް ހާޒިރުކޮށް އޭނާއާ ސުވާލުކޮށްފަ އެވެ. 

ބީއެމްއެލްގެ ފުރަތަމަ ދިވެހި ސީއީއޯ އަކަށް ޝަރީފު

ބީއެމްއެލްގެ ސީއީއޯގެ މަގާމު ހުސްވީ އެ މަގާމާއި އެ ބޭންކުގެ މެނޭޖިން ޑިރެކްޓަރުގެ މަގާމުގައި ކުރިން ހުންނެވި ކާލް ސްޓުމަކް އިސްތިއުފާދެއްވުމުންނެވެ. އާ ސީއީއޯ އައްޔަންކުރީ ކާލް އިސްތިއުފާ ދެއްވިތާ މަހަކަށްވުރެ ގިނަ ދުވަސްފަހުންނެވެ.

ޝަރީފްއާ ސުވާލު ކުރައްވަމުން، އެއިރުގެ ތިމަރަފުށީ ދާއިރާގެ މެންބަރު އަބްދުﷲ ރިޔާޒް ވިދާޅުވި، ބޭންކުން އަމަލު ކުރާ އުސޫލުން އަދި ދެއްވާ ޖަވާބުތަކުން، އެމްއެމްޕީއާރްސީގެ މައްސަލަ ތަހުގީގު ކުރަން ބޭންކުން ހުރަސްއަޅަނީ ކަމަށް ހީވާ ކަމަށެވެ. 

"އެމްއެމްޕީއާރްސީގެ މައްސަލަ ތަހުގީގު ކުރަން ހުރަސް އަޅާ ބައެއްގެ ގޮތުގައި ބީއެމްއެލް މި ފެންނަނީ،" ރިޔާޒް އެ ދުވަހު ވިދާޅުވި އެވެ. 

ކޮމިޓީގައި ޝަރީފް ދެއްވި ޖަވާބުތަކާމެދު މެންބަރުން އެއްވެސް ވަރަކަށް ހިތްހަމައެއްނުޖެހުނެވެ. އަދި ރައްޔިތުންގެ މަޖިލީހުގައި ހެކިބަސް ދެމުން ޝަރީފް ދޮގު ހެދި ކަމަށް މާލިއްޔަތު ކޮމިޓީގެ މުގައްރިރު މުހައްމަދު ނާޝިޒް ތުހުމަތު ކުރެއްވި އެވެ. އަދި ސީރިއަސް މައްސަލައެއްގެ ގޮތުގައި އެކަން ނަގައި، މައްސަލަ ތަހުގީގުކޮށްދިނުމަށް މަޖިލީހުން ފުލުހުން ކައިރި އެދުނެވެ. 

 "ބޭންކް އޮފް މޯލްޑިވްސްގެ ޑެޕިއުޓީ ސީއީއޯ މުހައްމަދު ޝަރީފް ކޮމެޓީއަށް ވަޑައިގެން ކޮމިޓީގައި ސައްހަ ނޫން މައުލޫމާތު ދީފައިވާ ކަމަށް މާލިއްޔަތު ކޮމިޓީގެ މުގައްރިރު މަޖިލީހިގެ ރައީސަށް އަންގަވާފައިވާތީ ބޭންކް އޮފް މޯލްޑިވަސްގެ ޑެޕިއުޓީ ސީއީއޯއަށް ތުހުމަތު ކުރެވޭ މި މައްސަލަ ތަހުގީގްކޮށް ދެއްވާ ދައުވާ ކޮށްދިނުމަށް ކަމާބެހޭ މުއައްސަސާއަށް ފޮނުވުމަށް ނިންމާފައިވަނީ،" ޖުލައި، 2019، ގައި މަޖިލީހުގެ އަމީންއާންމު ފާތިމަތު ނިއުޝާ ވިދާޅުވި އެވެ. 

20.11.2024 | އެމްއެމްއޭއަށް ރައީސް އާއި ފަސްޓް ފެމިލީގެ ނުފޫޒު 

މަރުކަޒީ ބޭންކުގެ ގަވަރުނަރު އައްޔަން ކުރަނީ ރައީސުލްޖުމްހޫރިއްޔާ ކަމުގައިވި ނަމަވެސް އެ މަގާމަކީ މިނިވަން މުސްތަގިއްލު މަގާމެކެވެ. ގަވަރުނަރުގެ ޒިންމާއަކީ ސިޔާސީ އޭންގަލަކަށް ވިސްނުމުގެ ބަދަލުގައި ގައުމަށް އެންމެ ރަނގަޅު ގޮތް ހޯދުމެވެ. 

މަރުކަޒީ ބޭންކު ފަދަ މުހިންމު ތަނަކަށް ބޭނުންވާހާ ގޮތެއް ހެދުމަކީ ސިޔާސީ ވިސްނުމެއްގައި ވެސް ކުރަން ހެޔޮވާ ވަރުގެ ކަންކަމެއް ނޫންކަން އެންމެން ވެސް ދަންނާނެ އެވެ. އެކަމަކު، ނޮވެމްބަރު، 2024، ގައި ފެނިގެންދިޔައީ މަރުކަޒީ ބޭންކަށް ވެސް ސަރުކާރުން އިހުތިރާމް ނުކުރި މަންޒަރެވެ. 

އެ ދުވަހު ހިނގި ހާދިސާއަކީ ފުލުހުންގެ ބޮޑު ތަހުގީގު ޓީމަކުން މަރުކަޒީ ބޭންކަށް ވަދެގަނެ، އެތަން ބަލައި ފާސްކުރުމެވެ. ފުލުހުންގެ މަގުސަދަކަށްވީ، ރައީސް މުއިއްޒުގެ އަނބިކަނބަލުން ސާޖިދާ މުހައްމަދުގެ ގާތް ރަހުމަތްތެރިއެއްގެ މައުލޫމާތު "އެކްސް" ގައި ލީކުވުމެވެ. 

ކުރުސީ އަށް މައުލޫމާތު ދިން ބަޔަކު ހޯދަން ފުލުހުން އެމްއެމްއޭއަށް ވަދެ، ބައެއް ސާމާނު ގެންގޮސްފި

މައްސަލައިގެ ތަހުގީގަށް ފުލުހުން ގެންދިޔައީ އެމްއެމްއޭގެ މުވައްޒަފެއްގެ ލެޕްޓޮޕަކާއި ބައެއް ޑޮކިއުމެންޓެވެ.

ސޯޝަލް މީޑިއާ ޕްލެޓްފޯމް އެކްސްގައި އެ ބުނާ މައުލޫމާތެއް ލީކުކޮށްލީ އެނޮނިމަސް ވިސްލްބްލޯވަރު "ހަސަން ކުރުސީ" އެވެ. އޭނާ ތުހުމަތުކޮށްފައި އޮތީ، މަރުކަޒީ ބޭންކުގެ މެނޭޖިން ޑިރެކްޓަރުގެ މަގާމަށް އެއިރު އައްޔަން ކުރި ބޭފުޅާއަށް އެ މަގާމު ލިބުނީ ސާޖިދާއާ އޮންނަ ގުޅުމެއްގެ ސަބަބުން ކަމަށެވެ. 

ސަރުކާރުން ބެލީ، އެ މުވައްޒަފުގެ މައުލޫމާތު ކުރުސީއަށް ލީކުކޮށްލީ އެމްއެމްއޭގެ މުވައްޒަފެއް ކަމަށެވެ. މަރުކަޒީ ބޭންކަށް ފުލުހުން ވަދެގަތީ އެ މައުލޫމާތު ލީކުކޮށްލި ކަމަށް ބުނާ މުވައްޒަފު ހޯދުމަށެވެ. 

އެމްއެމްއޭ ތެރޭގައި ފުލުހުން ހިންގި "ބޮޑު އޮޕަރޭޝަނުގައި"ދެ ދުވަހެއްގެ މަތިން މަރުކަޒީ ބޭންކުގެ އޮފީސް ރެއިޑު ކުރުމަށްފަހު، އެ ތަނުގެ މުވައްޒަފެއްގެ ލެޕްޓޮޕަކާއި ބައެއް ޑޮކިއުމެންޓުތައް ގެންދިޔަ އެވެ. 

12.04.2025 | ބީއެމްއެލް މުއިއްޒުގެ ސިޔާސީ ޓޫލެއްގެ ގޮތުގައި ބޭނުން ކުރަން ފެށުން 

ބީއެމްއެލްގެ ސީއީއޯގެ މަގާމަށް ޝަރީފް އައްޔަން ކުރުމާއެކު ބޭންކުގެ ތެރެއިން ކަންކަން ކުރަން ސަރުކާރަށް ވަރަށް ބޮޑަށް ފަސޭހަވި އެވެ. އަދި އޭގެ ބޭނުން ސަރުކާރުން ރަނގަޅަށް ހިފައި، ބޭންކަކީ ސަރުކާރު ހިންގާ ޕާޓީގެ ސިޔާސީ ގޮތްޕަކަށް ބަދަލުކޮށްލި އެވެ. 

ބޭންކުން އެންމެ ފުރަތަމަ ކުރަން ފެށި ކަމަކީ، ކޮންމެ ރަށެއްގައި އޭޓީއެމް ބަހައްޓައިދޭން ރައީސް މުއިއްޒު ވެވަޑައިގެންނެވި ވައުދު ފުއްދަން މަސައްކަތް ކުރުމެވެ. ސަރުކާރުގެ ވެރިންނާއި ރައީސް މުއިއްޒާއެކު ރާއްޖޭގެ ވަރަށް ގިނަ ރަށްރަށަށް ވަޑައިގެން، މުއިއްޒުގެ ކެމްޕެއިނުގައި ސީދާ ޝަރީފް ބައިވެރިވެވަޑައިގަންނަވަން ފެއްޓެވި އެވެ. 

ބީއެމްއެލް ދެމިއޮންނާނީ ރައީސް މުއިއްޒުގެ ސިޔާސީ މަގުސަތުތައް ހާސިލް ކުރަން ކަމަށް ޝަރީފް އޭޕްރީމް 12، 2025، ގައި ސާފުކޮށް ވިދާޅުވި އެވެ. 

"ދެމެހެއްޓެނިވި އިގުތިސާދީ ކުރިއެރުމާއި ފުދުންތެރިކަން ހޯދައިދިނުމާއި އިޖުތިމާއީ ދުޅަހެޔޮކަމާއި ތައުލީމީ ޖީލެއް ބިނާކުރުން ފަދަ ސަރުކާރުގެ މުހިންމު ލަނޑުދަނޑިތައް ހާސިލްކުރުމަށް ހިންގޭ މުހިއްމު މަޝްރޫއުތަކުގައި ބީއެމްއެލްއިން ބައިވެރިވާނެ، އެހީތެރިވެދޭނެ،" ޝަރީފު ވިދާޅުވި އެވެ.

ހުލާސާކޮށް އިއްޔެ: ރައީސް މުއިއްޒުގެ ސިޔާސަތު ތަންފީޒުކޮށް ދޭން ބީއެމްއެލް ތައްޔާރަށް!

ޝަރީފްގެ އެ ވާހަކަތަކަށްފަހު، ބޭންކު ސިޔާސީވެއްޖެ ކަމަށް ތަޖުރިބާކާރުންނާއި އާންމުން ބުނަން ފެށުމުން، ބޭންކު ސިޔާސީވުން ޝަރީފް ދިފާއު ކުރެއްވި އެވެ. 

"އާދެ، ބޭންކު ސިޔާސީ ވެއްޖެކަމަށް ބުނެ ބަޔަކު ދައްކާ ވާހަކަތަކާ ގުޅޭގޮތުން ވެސް އެއްޗެއް ދަންނަވައިލަން އަޅުގަނޑު ބޭނުން، ރަނގަޅު ސިޔާސަތެއްގެ ދަށުން ހިންގޭ ތަރައްގީގެ ޕްރޮޖެކްޓުތަކަށާއި އާންމު ފަރުދުންގެ ކުރިއެރުމަށް ހަރުދަނާ ބޭންކިން އުސޫލުތަކުގެ ދަށުން ބޭންކުން ކަންތައްތައް ކުރުމަކީ އެއީ ސިޔާސީވުން ކަމަށް އަޅުގަނޑު ނުދެކެން،" އޮކްޓޯބަރު 29، 2025، ގައި ޝަރީފް ވިދާޅުވި އެވެ.

ރިކޯޑު ހަދަން ބީލަމަށް ނުލާ ބަހާލާ 200 އަށްވުރެ ގިނަ ޕްރޮޖެކްޓަށް ފަންޑުކުރަނީ ބީއެމްއެލް "ފެލައިލައިގެން"

މިއީ ރަށްރަށުގައި ކައުންސިލު އިމާރާތްތައް އަޅަން އާރުސީސީއާ ހަވާލުކުރި މަޝްރޫއަށް ބޭނުންވާ 631 މިލިއަން ރުފިޔާ ހަމަޖައްސަން ލޯނު ދިން މޮޑެލް. އެ ޕްރޮޖެކްޓަށް ބޭނުންވާ ފައިނޭންސިން ހަމަޖައްސައިދިނީ ސަރުކާރުން ގެރެންޓީ ދީގެން.

އޭގެ ފަހުން މިއަދާ ހަމައަށް ވެސް ބޭންކުން އަންނަނީ ސަރުކާރުގެ ސިޔާސީ ކަންކަމަށް އެއްބާރުލުން ދެމުންނެވެ. ސިޔާސީ ގޮތުން ބީއެމްއެލް އިން ކުރި އެންމެ ބޮޑު ކަމަކީ ސަރުކާރުން މިދިޔަ އަހަރު ފަހުކޮޅު ބަހާލި، 200 ޕްރޮޖެކްޓަށް ފައިނޭންސިން ހަމަޖައްސައިދިނުމެވެ. 

ނޮވެމްބަރު، 2025، ގައި ސަރުކާރުން ބަހާލި 200 ޕްރޮޖެކްޓު ލިބުނު ކުންފުނިތަކުގެ ތެރޭގައި ކަރުދާސް ކުންފުންޏާއި ސަރުކާރާ ސިޔާސީ ގޮތުން ގުޅިފައި ތިބި އެތައް ކުންފުންޏެއް ހިމެނެ އެވެ. އެފަދަ ކުންފުނިތަކަށް ދޭ ލޯނު އަނބުރާ ނުދެއްކިޔަސް ބޭންކަށް ކުރެވޭނެ މާ ބޮޑު ކަމެއް ނޯންނާނެ އެވެ. އެކަމަކު، ސިޔާސީ ނިންމުމެއް ވީމާ އެގޮތަށް ބޭންކުން ކުރިއަށްދިޔައީ އެވެ. 

ބޭންކާމެދު ބައެއް ބޭފުޅުން ވިދާޅުވެފައިވާ ވާހަތައް!

ޝަރީފުގެ ފަހަތުން ގާނޫނު ދާނެ

"އެއީ އާންމު ރައްޔިތުންގެ ހިއްސާ އޮންނަ ތަނެއް. ބޯޑަށް ނުގެންގޮސް މިކަންކަން މިކުރަނީ. ބޭންކް އޮފް މޯލްޑިވްސްގައި މިހާރު ހުރި ޝަރީފަށް އެނގެންވާނެ ސަރުކާރު ބަދަލުވެއްޖެއްޔާ އޭނަގެ ފަހަތުން ގާނޫނު ދާނެ. އެކަމެއް ނުކުރެވޭނެ އޭނައަކަށް."
"އެއީ ރައީސުލްޖުމްހޫރިއްޔާ އޮފީހުގެ ފައިނޭންސް ޑިޕާޓްމަންޓެއް ނޫން ބޭންކް އޮފް މޯލްޑިވްސްއަކީ. އެއީ ރައްޔިތުންގެ ބޭންކް އެނގޭތޯ. މިހާރު ބޭންކް އޮފް މޯލްޑިވްސް އިން ބޮޑެތި ޑިޕޮޒިޓަރުން ފައިސާ ނެރޭ ހިސާބުގައި އެތިބީ،" ޔާމީން ވިދާޅުވި އެވެ.

ކުރީގެ ރައީސް އަބްދުﷲ ޔާމީން - ނޮވެމްބަރު 1، 2025

ބީއެމްއެލްއަކީ ޓެރަރިސްޓު ޖަމާއަތަކަށް ހަދައިފި

"އެ ތަހުގީގަށް ބަލާލާއިރު ބޭންކް އޮފް މޯލްޑިވްސްއަކީ ޓެރެރިސްޓް އޯގަނައިޒޭޝަނެއް ގޮތަށް ފުލުހުންގެ ބަޔާނަށް ބަލައި މާނަކުރެވޭނަމަ، އަޅުގަނޑު ދަންނަވާނީ އެންމެ ދިވެހި ރައްޔިތަކު ވެސް މާދަމާއިން ފެށިގެން ބެންކަށް ފައިސާ ޖަމާ ނުކުރާށޭ. ބެންކަށް ފައިސާ ލައިފިއްޔާ އެ ފައިސާ އަނބުރާ ލިބިދާނެ ކަމުގެ އެއްވެސް ޔަގީންކަމެއް ނެތޭ."

ކެންދޫ ދާއިރާގެ މެންބަރު މައުރޫފް ޒާކިރު - އޯގަސްޓު 26، 2024

މާލީ ނިޒާމުގެ އިތުބާރު ގެއްލެނީ

"މި ކަމުގެ ސަބަބުން ބައިނަލްއަގުވާމީ މުޖުތަމައުގެ މެދުގައި އަޅުގަނޑުމެންގެ މާލީ ނިޒާމާ މެދު ނޭދެވޭ ވިސްނުމެއް އުފެދިގެންދާނެކަން ޔަގީން.""މާލީ ނިޒާމުގައި ނުތަނަވަސްކަން އުފެދި، ދައުލަތުގެ މާލީ ހާލާތާ މެދު ބޮޑެތި ކަންބޮޑުވުންތަކެއް އުފެދިފައިވާ މި ދަނޑިވަޅުގައި، މިއީ ކަންބޮޑުވާ ފަދަ ޒިންމާދާރުކަން ކުޑަ އަމަލެއް."

ކުރީގެ އިގްތިސާދީ މިނިސްޓަރު ފައްޔާޒް އިސްމާއިލް އޯގަސްޓު 24، 2024 

ބޭންކުގަ ފައިސާ ބަހައްޓަން ޖެހިލުންވޭ

"އަނެއްކާ އެންގެވީމަ މުޅި އެތި ބަދަލުވީ. މިވެސް އަޖައިބެއްކަހަލަ ކަމެއް. އަޅުގަނޑަށް މިއަދު ތިން އީމެއިލް ބޭންކް އޮފް މޯލްޑިވްސް އިން ފޮނުވި. ފުރަތަމަ އެތީގަ އޮތީ އެއް ވާހަކައެއް. ދެވަނަ އެތީގަ އޮތީ އެހެން ވާހަކައެއް. ތިންވަނަ އެތީގަ އޮތީ މުޅިން އެހެން ވާހަކައެއް.""އަނެއްކާ އެންގެވީމަ މުޅި އެތި ބަދަލުވީ. މިވެސް އަޖައިބެއްކަހަލަ ކަމެއް. އަޅުގަނޑަށް މިއަދު ތިން އީމެއިލް ބޭންކް އޮފް މޯލްޑިވްސް އިން ފޮނުވި. ފުރަތަމަ އެތީގަ އޮތީ އެއް ވާހަކައެއް. ދެވަނަ އެތީގަ އޮތީ އެހެން ވާހަކައެއް. ތިންވަނަ އެތީގަ އޮތީ މުޅިން އެހެން ވާހަކައެއް."

ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ - އޯގަސްޓު 25، 2024

ބޭންކު ސިޔާސީ ކުރުން ހުއްޓުވަންޖެހޭ

"ބޭންކް އޮފް މޯލްޑިވްސް ހަބޭހަށް އެ ޕޮލިޓިސައިޒް އެ ކުރަނީ. މިކަން ގޯސް. މިއީ ހަމަ ބޮޑު ގޯހެއް. ސެންޓްރަލް ބޭންކުގެ [އެމްއެމްއޭގެ] ގަވަރުނަރަކަށް އެ ހުރީ މިކަންކަން އެނގޭ ވަރުގެ މީހެއް. [އަހުމަދު] މުނައްވަރު އެ ހުރީ އެނގޭތޯ. އޭނަ އެބަޖެހޭ މިކަން ހުއްޓުވަން ނޫނިއްޔާ މަގާމުން ދުރަށްދާން، މިކަހަލަ ކަމެއްގައި އުޅޭކަށް ނުޖެހޭނެ އިނގޭތޯ."

ކުރީގެ ރައީސް އަބްދުﷲ ޔާމީން - ސެޕްޓެމްބަރު 19، 2024 

ބީއެމްއެލްއަށް ކުރާ އިތުބާރު ގެއްލިއްޖެ 

"ސަރުކާރުން ވިޔަސް ބީއެމްއެލްއަށް އޮތް އިތުބާރު ގެެއްލޭ ފަދަ އެއްވެސް ކަމެއް ކޮށްގެން ނުވާނެ. ބީއެމްއެލްއަށް ކުރާ އިތުބާރު ގެއްލިއްޖެނަމަ އެއީ މުޅި މުޖަތަމައަށް ލިބޭނެ ބޮޑު ދެރައެއް. އެއީ ރައްޔިތުންގެ ބޭންކު."

ކުރީގެ ރައީސް އިބްރާހިމް މުހައްމަދު ސޯލިހު - ސެޕްޓެމްބަރު 18، 2024