ބޭންކް އޮފް މޯލްޑިވްސް (ބީއެމްއެލް) އިން އެ ބޭންކުގެ އިދާރީ އޮނިގަނޑަށާއި އެގްޒެކެޓިވް ޓީމުގެ މެންބަރުންގެ ދައުރަށްވެސް ބަދަލުތަކެއް ގެނެސްފި އެވެ.
ބީއެމްއެލްގެ ހިންގުމުގެ އޮނިގަނޑަށް ގެނައި ބަދަލުތަކުގެ ތެރެއިން ސީނިއާ މެނޭޖްމަންޓް ޓީމުގެ ހަތަރު މެންބަރަކު ވަނީ ކުރިއަށް އޮތް ހަ މަސް ދުވަހުގެ މުއްދަތަށް އެ ބޭފުޅުންގެ މަގާމުތަކާ ގުޅުންހުރި އެހެން ދާއިރާތަކާ ހަވާލުވެވަޑައިގެންފަ އެވެ.
މިގޮތުން ބީއެމްއެލްގެ ޗީފް ކޮމާޝަލް އޮފިސަރަކަށް އައިޝަތު ޒަމްރާ ޒާހިރު، ޗީފް މާކެޓިން އޮފިސަރަކަށް މޫސާ ނިމާލް، ޗީފް ރިސްކް އޮފިސަރަކަށް ރަޝްފާ ޖައުފަރު އަދި ޗީފް ކްރެޑިޓް އޮފިސަރަކަށް ގެރީ ލޯޓަން ވަނީ ހަމަޖައްސާފަ އެވެ.
މި ބަދަލުތަކާ ގުޅިގެން ބީއެމްއެލްގެ ސީއީއޯ އަދި އެމްޑީ މުހައްމަދު ޝަރީފް ވިދާޅުވީ އިސް މަގާމުތަކުގެ ދައުރުތަކަށް ވަގުތީ ގޮތުން ގެނައި ބަދަލަކީ ލީޑަޝިޕް ވަރުގަދަކުރުމަށްޓަކައި ކުރެވޭ އިންވެސްޓްމަންޓެއް ކަމަށާއި ތަޖުރިބާކާރު ވެރިންނަށް އެ ބޭފުޅުންގެ ދާއިރާއާ ގުޅުންހުރި އެހެން ދާއިރާތަކުގެ ތަޖުރިބާ ހޯދައިދިނުމަކީ، އެ ބޭފުޅުންގެ ހުނަރު އިތުރުވުމުގެ އިތުރުން މުޅި މުއައްސަސާއަށް ލިބޭނެ ވަރަށް ބޮޑު ކުރިއެރުމެއް ކަމަށެވެ.
މުއިއްޒުގެ ސަރުކާރާއެކު ބޭންކް އޮފް މޯލްޑިވްސް ފުނޑިއްޖެ
މިހާރު، ރައީސް މުހައްމަދު މުއިއްޒުގެ ވެރިކަމުގައި، ބޭންކުގެ "ބޭންކުވަންތަކަން" ގެއްލި، މާލީ ކުރިމަގު ބަނަވެ، ނަގަމުންދާ ސިޔާސީ ފިޔަވަޅުތަކުގެ ސަބަބުން އެތައް ހިދުމަތްތަކަކަށް ބުރޫއަރައިފި އެވެ. އަދި އެންމެ ބޮޑު ގެއްލުމަކީ އާންމުން ބޭންކާމެދު ކުރަމުން އައި އިތުބާރު ގެއްލުމެވެ.
"މި ބަދަލުތަކަކީ ބޭންކުގެ ކުރިއެރުމަށްޓަކައި ގެނެވޭ ބަދަލުތަކެއް. ބޭންކު މިވަގުތު އޮތީ ހަރުދަނާ މާލީ ހާލަތެއްގައި. އަދި އަޅުގަނޑުމެންގެ މަގުސަދަކީ ކަސްޓަމަރުންނަށް ދެވޭ ހިދުމަތްތައް އިތުރަށް ފުރިހަމަކޮށް، ބޭންކުގެ ކުރިއެރުން ހަލުވިކުރުން،" އޭނާ ވިދާޅުވި އެވެ.
ބީއެމްއެލް އިން ބުނީ މި ބަދަލުތަކަކީ މިއީ ބޭންކުގެ ދެމެހެއްޓެނިވި ކުރިއެރުމަށާއި، ކަސްޓަމަރުންނާ އޮންނަ ގުޅުން އިތުރަށް ބަދަހިކޮށް، ޚިދުމަތުގެ ފެންވަރު މަތީ ދަރަޖައަކަށް ގެންދިއުމަށް އެކުލަވައިލާފައިވާ ދުރުރާސްތާގެ ސްޓްރެޓެޖިކް އަމާޒުތަކާ އެއްގޮތަށް ބޭންކުގެ މަސައްކަތްތައް ބައްޓަންކުރުމަށް އެޅުނު މުހިންމު ފިޔަވަޅެއް ކަމަށެވެ.
ބޭންކުގެ އެތެރޭގެ ހިންގުމަށް ގެނެވުނު ބަދަލުތަކުން ކަސްޓަމަރުންނަށް ބޭންކުން ފޯރުކޮށްދޭ ޕްރޮޑަކްޓްތަކާއި ހިދުމަތްތަކަށް ނުވަތަ މިހާރު މުއާމަލާތް ކުރަމުންދާ އުސޫލުތަކަށް އެއްވެސް ބަދަލެއް ނާންނާނެ ކަމަށް ބީއެމްއެލްއިން ބުންޏެވެ.
ބޭންކް އޮފް މޯލްޑިވްސްއަކީ ދިވެހިރާއްޖޭގެ އެންމެ ބޮޑު ބޭންކެވެ. އެއީ އެސެޓާއި ޑިޕޮސިޓް ބޭސްއަށް ބެއްޔަސް ރާއްޖޭގައި ހިންގާ އެންމެ ތަނަވަސް ބޭންކެވެ. ގާތްގަނޑަކަށް 365،000 ކަސްޓަމަރުން އެ ބޭންކުން ހިދުމަތް ހޯދަ އެވެ.
އެ ބޭންކުން ދެމުންދާ ހިދުމަތްތަކާ ގުޅޭގޮތުން ފަހަކަށް އައިސް އާންމުންގެ ނުރުހުން އެ ބޭންކަށް ވަނީ އަމާޒުވެފަ އެވެ. އެގޮތުން ބީއެމްއެލް މެދުވެރިކޮށް ހަދާ އޮންލައިން ޕޭމަންޓްތައް ލިމިޓްކުރުމާއި، ޓީޓީ ހެދުމުގައި ދިމާވާ ދަތިތަކުގެ އިތުރުން ބޭންކުން ވިޔަފާރިތަކަށް ޑޮލަރު ހޯދުމަށް ދިމާވާ ދަތިތައް ހިމެނެ އެވެ.
