ބޭންކް އޮފް މޯލްޑިވްސް (ބީއެމްއެލް) އަށް މި އަހަރުގެ ފުރަތަމަ ކުއާޓަރުގައި ލިބުނު ވަރުގެ އާމްދަނީއެއް ދެވަނަ ކުއާޓަރުގައި ނުލިބުނު ނަމަވެސް، އެ ކުއާޓަރުގައި ލިބުނު ފައިދާ މައްޗަށް ޖައްސާލާފައިވާ ކަމަށް އެ ބޭންކުގެ ކުއާޓަލީ ރިޕޯޓުން ދައްކައިފި އެވެ.
ބީއެމްއެލްގެ ސެކަންޑް ކުއާޓާ ރިޕޯޓް، އެއީ މި އަހަރުގެ އޭޕްރިލްގައި ޖޫންއަަށް ނިމުނު ކުއާޓަރުގައި، އެ ބޭންކަށް އާމްދަނީގެ ގޮތުގައި ލިބުނީ 1.5 ބިލިއަން ރުފިޔާ އެވެ. މިއީ މި އަހަރުގެ ފުރަތަމަ ކުއާޓަރުގައި އެ ބޭންކަށް ލިބުނު ވަރަށް ވުރެ 89 މިލިއަން ރުފިޔާ މަދު އަދަދެކެވެ.
ކުއާޓަރުންކުއާޓަރަށް ބަލާއިރު ބީއެމްއެލްގެ އާމްދަނީ ދަށްވީ، އިންޓްރެސްޓާރި އިންޓްރެސްޓު ފަދަ އެހެނިހެން އާމްދަނީ 882.4 މިލިއަން ރުފިޔާއިން 955.3 މިލިއަން ރުފިޔާއަށް އިތުރުވީއިރު، ފީތަކާއި ކޮމިޝަންތަކުން ލިބޭ އާމްދަނީ 662.7 މިލިއަން ރުފިޔާއިން 532.5 މިލިއަން ރުފިޔާއަށް މަދުވުމުންނެވެ.
ބީއެމްއެލްއަށް ނިމުނު ކުއާޓަރުގައި ސާފު ފައިދާ މަތިކުރެވުނީ، ހިންގުމުގެ ހަރަދުތައް ކުޑަކޮށް، ހިންގުމުގެ ފައިދާ އިތުރުކުރުމުންނެވެ. އެ ބޭންކަށް ދެ ވަނަ ކުއާޓަރުގައި 646.4 މިލިއަން ރުފިޔާ ސާފު ފައިދާވި އެވެ. މިއީ މި އަހަރުގެ ފުރަތަމަ ކުއާޓަރާއި މިދިޔަ އަހަރުގެ ދެ ވަނަ ކުއާޓަރަށް ވުރެ ވެސް ބޮޑު އަދަދެކެވެ.
ޖުމްލަކޮށް ބަލާއިރު، ބީއެމްއެލްގެ ރިޕޯޓުން އަންގައިދެނީ ބީއެމްއެލްގެ ވިޔަފާރި ވަރަށް ރަނގަޅު ކަމަށެވެ. އެ ބޭންކަށް ރަނގަޅު އާމްދަނީއަކާއި ސާފު ފައިދާއެއް ލިބެމުންދާއިރު، ކަސްޓަމަރުންގެ ޑިޕޮސިޓުތަކާއި ލޯނު ދޫކުރާ މިންވަރު ދަނީ އިތުރުވަމުންނެވެ.
ނިމުނު ކުއާޓަރުގައި ބީއެމްއެލްގެ ބެލެންސް ޝީޓުން އެންމެ ބޮޑު ބަދަލެއް އައި އެއް ދާއިރާއަކީ ބޭންކުގެ ބޮރޮއިން ނުވަތަ ދަރަނީގެ ގޮތުގައި ނެގި ފައިސާ އެވެ. ބީއެމްއެލްއިން ދަރަންޏަށް ނަގާފައިވާ ފައިސާ ވަނީ ފުރަތަމަ ކުއާޓަރު ނިމުނުއިރު ހުރި، 854.8 މިލިއަން ރުފިޔާއިން ދެ ބިލިއަން ރުފިޔާއަށް ވުރެ އިތުރުވެފަ އެވެ.
އޭގެ އިތުރުން، ބީއެމްއެލްއިން ނިމުނު ކުއާޓަރުގެ ތެރޭގައި އިންވެސްޓުމަންޓު ހަރަކާތްތަކަށް ގިނަ އަދަދަކަށް ފައިސާ ހަރަދުކޮށްފައިވާ ކަމަށް ވެސް ރިޕޯޓުން ފާހަގަވެ އެވެ. އެ ގޮތުން އިންވެސްޓުކުރުމުގެ ހަރަކާތްތަކަށް 4.4 ބިލިއަން ރުފިޔާ ހަރަދުކޮށްފައިވާއިރު، ބެލެވޭ ގޮތުގައި މި އިންވެސްޓިން ފައިސާއަކީ ބޭންކުގެ ސަބްސިޑަރީ، ބީއެމްއެލް އެފޯޑަބަލް ހޯމް ލީސިިން ކުންފުނިން އެކި ކޮންޓްރެކްޓަރުންނާ ހަވާލުކޮށްގެން ހިންގަމުން އަންނަ ހައުސިން ޕްރޮޖެކްޓުތަކަށް ހިނގި ހަރަދެވެ.
ބީއެމްއެލްއިން ދެ ވަނަ ކުއާޓަރުގައި ނެރުނު ނާތީޖާއާއެކީ އެ ބޭންކުން ވަނީ މި އަހަރުގެ ފުރަތަމަ ބައިގައި 1.2 ބިލިއަން ރުފިޔާއަށް ވުރެ ބޮުޑު އަދަދެއް ސާފު ފައިދާގެ ގޮތުގައި ހޯދާފަ އެވެ.
