މި ސަރުކާރުން ކުރިއަށްގެންދާ "ބޯހިޔާވެހިކަން އެންމެންނަށް" ސިޔާސަތުގެ ދަށުން ގޯއްޗާއި ފްލެޓަށް އެދި ހުށަހެޅި އެޕްލިކޭޝަންތަކުގެ މައުލޫމާތު ރަނގަޅުކުރަން ދިން މުއްދަތު ހައުސިން މިނިސްޓްރީން 21 ދުވަހަށް އިތުރުކޮށްފި އެވެ.
ހައުސިން މިނިސްޓްރީން ބުނީ ގޯއްޗާއި ފްލެޓަށް ހުށަހަޅާފައިވާ އެޕްލިކޭޝަންތަކުގެ ވެރިފިކޭޝަން ތެރެއިން މިނިސްޓްރީން ދީފައިވާ ނޯޓިސްގައިވާ މައުލޫމާތު ސައްހަ ނޫން ކަމުގައިވާނަމަ އެކަމުގެ ތަފްސީލާއި ކަމާގުޅުންހުރި ލިޔެކިޔުންތައް ހުށަހެޅުމަށް އެޕްލިކަންޓަށް ދޭ މުއްދަތު ހަތް ދުވަހުން 21 ދުވަހަށް އިތުރުކޮށްފައިވާ ކަމަށެވެ.
އެޕްލިކޭޝަން ރަނގަޅުކުރަން ދިން 21 ދުވަހުގެ މުއްދަތުގެ ތެރޭގައި ފާހަކޮށްފައިވާ މައްސަލައަށް ޖަވާބު ހުށަނާޅާނަމަ، އެ އެޕްލިކޭޝަން ޝަރުތު ހަމަނުވާ ކަމަށް ނުވަތަ ހުށަހެޅި ލިޔެކިޔުން ފުރިހަމަނުވާ އެޕްލިކޭޝަނެއްގެ ގޮތުގައި ބަލާނެ ކަމަށް މިނިސްޓްރީން ބުންޏެވެ.
ގޯއްޗާއި ފްލެޓް އެޕްލިކޭޝަނާ ގުޅޭގޮތުން އިތުރު މައުލޫމާތު މިނިސްޓްރީގެ ހެލްޕް ޑެސްކް އަދި ކޯލް ސެންޓަރު 900-400 އަށް އިން ލިބޭނެ ކަމަށް ވަނީ ބުނެފަ އެވެ. އެ ހިދުމަތް ލިބޭނީ ސަރުކާރު ބަންދުނޫން ކޮންމެ ދުވަހެއްގެ ހެނދުނު 9:00 އިން 15:00 އަށެވެ.
ގޯއްޗާއި ފްލެޓް ލިބޭ މީހުން އިވެލުއޭޓްކޮށް ނިންމައި، ގޯއްޗާއި ފްލެޓް ލިބޭ މީހުންގެ ލިސްޓު އަންނަ ޑިސެމްބަރު މަހުގެ ތެރޭގައި ހާމަކުރުމަށް ވަނީ ހަމަޖެހިފައި ކަމަށް މިނިސްޓްރީން ބުންޏެވެ.
އާއިލީ ބޯހިޔާވެިކަން ޕްރޮގްރާމް:
- ޖުމްލަ އެޕްލިކޭޝަން: 45،644
- ފްލެޓް އެޕްލިކޭޝަން: 35،818
- ބިން އެޕްލިކޭޝަން: 9،826
ގޯތިގެދޮރުގެ ޕްރޮގްރާމް:
- ޖުމްލަ އެޕްލިކޭޝަން: 12،861
- ފްލެޓް އެޕްލިކޭޝަން: 112
- ބިން އެޕްލިކޭޝަން: 12،749
އާއިލީ ބޯހިޔާވަހިކަމުގެ ދަށުން ޖުމްލަ 15،000 ބިން އަދި 7،900 ފްލެޓު ދިނުމަށް ވަނީ ހަމަޖެހިފަ އެވެ. އޭގެތެރެއިން ބިންތައް ރަސްމާލެއިން ދިނުމަށް ހަމަޖެހިފައިވާއިރު، ފްލެޓުތައް ދިނުމަށް ހަމަޖެހިފައިވަނީ ހުޅުމާލެއިންނެނެވެ.
އާއިލީ ބޯހިޔާވަހިކަމުގެ ދަށުން ބިން ދޫކުރަނީ މާލޭ ރަށްވެހިންގެ ކެޓެގަރީއަށާއި މާލޭގައި ދިރިއުޅޭތާ 15 އަހަރު ވެފައިވާ އެހެން ރަށްރަށުގެ މީހުންނަށެވެ. އެއީ 1،250 އަކަފޫޓުގެ ބިމެވެ.
މި ސްކީމްގެ ދަށުން މާލޭގެ ރަށްވެހިންނަށް 10،000 ބިން، މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް 3،000 ބިން، މައިމުޅަވުމުގެ ސަބަބުން ގޯތިގެދޮރު މިލްކުކުރުމުން މަހްރޫމްވެފައިވާ ފަރާތްތަކަށް 500 ބިން އަދި މާލޭގެ ހަނި ގޯޅިތަކުގައި ހުރުމުގެ ސަބަބުންނާއި އަދި އެ ބިމެއް ތަރައްގީކުރުމަށް ދަތިވާ ގޯތިތަކާއި ލާޖައްސައިގެން ބައްދަލުކުރާ ފަރާތްތަކަށް 1،500 ބިން ދިނުމަށް ވަނީ ހަމަޖެހިފަ އެވެ.
މާލޭ ރަށްވެހިންނަށް 4،000 ފްލެޓް، މާލޭގައި ރަށްވެހިވެފައިނުވާ މާލޭގައި ދިރިއުޅެމުންދާ ފަރާތްތަކަށް 1،500 ފްލެޓް އަދި ހާއްސަ އިސްކަންދެވޭ ކެޓަގަރީތަކަށް ޖުމްލަ 2،400 ފްލެޓް އާއިލީ ބޯހިޔާވެހިކަމުގެ ދަށުން ދިނުމަށް ވަނީ ހަމަޖެހިފަ އެވެ.
ހާއްސަ އިސްކަންދެވޭ ކެޓަގަރީތަކުގެ ތެރޭގައި ސަރުކާރުގެ އެކި އޮފީސްތަކާއި ފުލުހުންނާއި ސިފައިންނާއި ކަރެކްޝަނަލް ސާވިސް އަދި އެހެނިހެން މުއައްސަސާތައް ވެސް ހިމެނެ އެވެ.
