މި ސަރުކާރުން ކުރިއަށްގެންދާ "ބޯހިޔާވެހިކަން އެންމެންނަށް" ސިޔާސަތުގެ ދަށުން ގޯއްޗާއި ފްލެޓް ލިބޭ މީހުންގެ ލިސްޓު ޑިސެމްބަރުގައި އާންމުކުރާނެ ކަމަށް ހައުސިން މިނިސްޓްރީން ބުނެފި އެވެ.
ޕީއެސްއެމްގެ ރާއްޖެމިއަދު ޕްރޮގްރާމުގައި ހައުސިން މިނިސްޓްރީގެ ސްޓޭޓް މިނިސްޓަރު އަހްމަދު ނާޒިމް ވިދާޅުވީ ރައީސް މުހައްމަދު މުއިއްޒުގެ ނިންމެވުމާ އެއްގޮތަށް ގޯއްޗާއި ފްލެޓް ލިބޭ މީހުން އިވެލުއޭޓްކޮށް ނިންމައި، ގޯއްޗާއި ފްލެޓް ލިބޭ މީހުންގެ ލިސްޓު އަންނަ ޑިސެމްބަރު މަހުގެ ތެރޭގައި ހާމަކުރުމަށް ހަމަޖެހިފައިވާ ކަމަށެވެ.
"58،000 ފޯމު ވެރިފައިކުރަން ރައީސުލްޖުމްހޫރިއްޔާ މިހާރު ނިންމަވާފައި މިއޮތީ މި އަހަރުގެ ޑިސެމްބަރު މަހުގައި ދާއިމީ ލިސްޓް އިއުލާންކުރަން. މާނައަކީ ފްލެޓް ނުވަތަ ގޯތި ލިބޭ ފަރާތްތަކުގެ ލިސްޓު އަޅުގަނޑުމެން އާންމުކުރާ ގޮތަށް މިއޮތީ ޑިސެމްބަރު މަހަށް ތާވަލުކޮށްފައި،" އޭނާ ވިދާޅުވި އެވެ.
އަހްމަދު ނާޒިމް ވިދާޅުވީ ވިދާޅުވީ ފޯމްތައް އިވެލުއޭޓްކުރާއިރު ބަލާނީ ފޯމުތަކުގައި ހިމަނާފައިވާ މައުލޫމާތަކީ ސައްހަ މައުލޫމާތުތައް ކަމަށާއި މައުލޫމާތުގެ ފުށުއެރުމެއް އުޅޭނަމަ އެކަން އެޕްލިކަންޓަށް އެންގުމުގެ ކަންކަން މިހާރު ކުރިއަށްދާ ކަމަށެވެ. އެގޮތުން ހަތް ދުވަހުގެ މުއްދަތުގެ ތެރޭގައި އެކަމެއް ސާފުކޮށްދޭންޖެހޭނެ ކަމަށް އޭނާ ވިދާޅުވި އެވެ.
އާއިލީ ބޯހިޔާވެިކަން ޕްރޮގްރާމް:
- ޖުމްލަ އެޕްލިކޭޝަން: 45،644
- ފްލެޓް އެޕްލިކޭޝަން: 35،818
- ބިން އެޕްލިކޭޝަން: 9،826
ގޯތިގެދޮރުގެ ޕްރޮގްރާމް:
- ޖުމްލަ އެޕްލިކޭޝަން: 12،861
- ފްލެޓް އެޕްލިކޭޝަން: 112
- ބިން އެޕްލިކޭޝަން: 12،749
އާއިލީ ބޯހިޔާވަހިކަމުގެ ދަށުން ޖުމްލަ 15،000 ބިން އަދި 7،900 ފްލެޓު ދިނުމަށް ވަނީ ހަމަޖެހިފަ އެވެ. އޭގެތެރެއިން ބިންތައް ރަސްމާލެއިން ދިނުމަށް ހަމަޖެހިފައިވާއިރު، ފްލެޓުތައް ދިނުމަށް ހަމަޖެހިފައިވަނީ ހުޅުމާލެއިންނެނެވެ.
އާއިލީ ބޯހިޔާވަހިކަމުގެ ދަށުން ބިން ދޫކުރަނީ މާލޭ ރަށްވެހިންގެ ކެޓެގަރީއަށާއި މާލޭގައި ދިރިއުޅޭތާ 15 އަހަރު ވެފައިވާ އެހެން ރަށްރަށުގެ މީހުންނަށެވެ. އެއީ 1،250 އަކަފޫޓުގެ ބިމެވެ.
މި ސްކީމްގެ ދަށުން މާލޭގެ ރަށްވެހިންނަށް 10،000 ބިން، މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް 3،000 ބިން، މައިމުޅަވުމުގެ ސަބަބުން ގޯތިގެދޮރު މިލްކުކުރުމުން މަހްރޫމްވެފައިވާ ފަރާތްތަކަށް 500 ބިން އަދި މާލޭގެ ހަނި ގޯޅިތަކުގައި ހުރުމުގެ ސަބަބުންނާއި އަދި އެ ބިމެއް ތަރައްގީކުރުމަށް ދަތިވާ ގޯތިތަކާއި ލާޖައްސައިގެން ބައްދަލުކުރާ ފަރާތްތަކަށް 1،500 ބިން ދިނުމަށް ވަނީ ހަމަޖެހިފަ އެވެ.
މާލޭ ރަށްވެހިންނަށް 4،000 ފްލެޓް، މާލޭގައި ރަށްވެހިވެފައިނުވާ މާލޭގައި ދިރިއުޅެމުންދާ ފަރާތްތަކަށް 1،500 ފްލެޓް އަދި ހާއްސަ އިސްކަންދެވޭ ކެޓަގަރީތަކަށް ޖުމްލަ 2،400 ފްލެޓް އާއިލީ ބޯހިޔާވެހިކަމުގެ ދަށުން ދިނުމަށް ވަނީ ހަމަޖެހިފަ އެވެ.
ހާއްސަ އިސްކަންދެވޭ ކެޓަގަރީތަކުގެ ތެރޭގައި ސަރުކާރުގެ އެކި އޮފީސްތަކާއި ފުލުހުންނާއި ސިފައިންނާއި ކަރެކްޝަނަލް ސާވިސް އަދި އެހެނިހެން މުއައްސަސާތައް ވެސް ހިމެނެ އެވެ.
