ރައީސް އޮފީސް ކުރިމަތީ ތޮށި އާންމު އުޅަނދުތަކަށް ބޭނުން ނުކުރެވޭނެކަން ހައުސިން މިނިސްޓްރީން މިއަދު ހަނދާކޮށްދީފި އެވެ.
ހައުސިން މިނިސްޓްރީން ނެރުނު އިއުލާނެއްގައި ބުނީ ބޮޑުތަކުރުފާނު މަގުގެ ޝަހީދު ހުސައިން އާދަމް ބިލްޑިން އިން ފެށިގެން ދޮށިމޭނާ ބިލްޑިންއާ ހަމައަށް އަލަށް ހަދާފައިވާ އެއްގަމު ތޮއްޓަކީ ޑިފެންސް މިނިސްޓްރީގެ ބޭނުމަށް ހާއްސަކޮށްފައިވާ ސަރަހައްދެއް ކަމަށެވެ.
މިއާއެކު މިއަދުން ފެށިގެން އެ ސަރަހައްދުގައި އެއްގަމު ތޮއްޓަށް ޑިފެންސް މިނިސްޓްރީގެ އުޅަނދުފަހަރު ފިޔަވައި އެހެން އެއްވެސް އުޅަނދެއް ކައިރިކުރުމަކީ މަނާ ކަމެއް ކަމަށް ހައުސިން މިނިސްޓްރީން ބުންޏެވެ.
މީގެކުރިންވެސް ބޭރު ތޮށީގެ ޝަހީދު ހުސައިން އާދަމް ބިލްޑިން އިން ފެށިގެން ދޮށިމޭނާ ބިލްޑިންއާ ހަމައަށް އޮންނަނީ ޑިފެންސަށް ހާއްސަކޮށްފަ އެވެ. ނަމަވެސް ބޮޑުތަކުރުފާނު މަގު ހެދުމުގެ މަޝްރޫއުގެ ދަށުން އެ ސަރަހައްދު ނިންމި ފަހުން ގިނަ އާންމު އުޅަނދުތަކުން ދަނީ އެ ސަރަހައްދު ބޭނުން ކުރަމުންނެވެ.
މާލެ ވަށައިގެން އޮންނަ ބޮޑުތަކުރުފާނު މަގު ހަތަރު ލޭނަށް ފުޅާކުރަން ހިންގާ މަޝްރޫއުގެ ދަށުން ބާސެލޯ ނަސަންދުރާ ހިސާބުން ފެށިގެން އެއް ނަންބަރު ފާލަމާ ހިސާބަށް ނިންމި ހިސާބު މަގުމަތީގައި ވެހިކަލްތައް ޕާކްކުރުން ވަނީ މަނާކޮށްފަ އެވެ.
ބޮޑުތަކުރުފާނު މަގު ފުޅާކުރުމުގެ މަޝްރޫއުގެ ދަށުން އެމްޕީއެލް ހުންނަ ސަރަހައްދުން ފެށިގެން ސުނާމީ ބިނާއާ ހަމައަށް އެ މަގު ތަރައްގީކުރުމުގެ މަސައްކަތް އަންނަ ނޮވެމްބަރު މަހުގެ ނިޔަަލަށް ނިންމާނެ ކަމަށް މުހައްމަަދު މުއިއްޒު ވަނީ ވިދާޅުވެފަ އެވެ.
