ސޯޝަލް މީޑިއާގައި މިހާރު އެންމެ ބޮޑަށް ފެތުރެމުންދާ އެއް ޓްރެންޑަކީ ނިދުމުގެ ކުރިން އަނދިރީގައި ފެންވެރުމެވެ. "ޑާކް ޝަވަރިން" ގެ ނަމުން މަޝްހޫރުވެފައިވާ މި އާދައަކީ ފާހާނާގެ ބޮކިތައް ނިއްވާލައިގެން ނުވަތަ ވަރަށް ފަނޑު އަލީގައި ފެންވެރުމެވެ. މިއީ ނިދުމަށް އުނދަގޫވާ މީހުންނަށް އެހީތެރިވެދޭ ކަމެއް ކަމަށް ގިނަ ބަޔަކު ދަނީ ބުނަމުންނެވެ.
މިކަމާ ގުޅޭގޮތުން ސިއްހީ މާހިރުން ވިދާޅުވަނީ އަނދިރީގައި ފެންވެރުމަކީ ސިކުނޑިއާއި ހަށިގަނޑު ނިދުމަށް ތައްޔާރުކޮށްދޭ ކަމެއް ކަމަށެވެ. ނިއުރޯސައިންޓިސްޓެއް ކަމަށްވާ ޑރ. ޝެލްސީ ރޯޝައިބް ވިދާޅުވި ގޮތުގައި، ނިދުމުގެ ކުރިން ހަށިގަނޑުގެ ފިނިހޫނުމިން ކުޑަކޮށް ދަށްވާން ޖެހެ އެވެ. ހޫނު ފެނުން ފެންވެރުމުން ހަށިގަނޑުގެ ފިނިހޫނުމިން މަތިވެ، ފެންވަރައިގެން ނުކުންނަ ވަގުތު އެ ފިނިހޫނުމިން އަވަހަށް ދަށްވެގެންދެ އެވެ. މިއީ ނިދުމުގެ ކުރިން ހަށިގަނޑަށް އަންނަ ގުދުރަތީ ބަދަލާ އެއްގޮތް ކަމެއް ކަމަށްވާތީ، މީގެ ސަބަބުން އަވަހަށް ނިދި އައުމަށް މަގުފަހިވެ އެވެ.
މީގެ އިތުރުން، އަނދިރީގައި ފެންވެރުމަކީ ހަށިގަނޑުން މެލަޓޯނިން އުފައްދައިދޭ މިންވަރު އިތުރުކޮށްދޭ ކަމެކެވެ. މެލަޓޯނިން އަކީ ނިދުމުގެ ވަގުތު ޖެހިއްޖެކަން ސިކުނޑިއަށް އަންގައިދޭ ހޯމޯންއެކެވެ. ލޮލަށް ފެންނަ ގަދަ އަލީގެ ސަބަބުން މި ހޯމޯން އުފެއްދުން ހުއްޓުވާއިރު، އަނދިރީގައި ނުވަތަ ފަނޑު އަލީގައި ފެންވެރުމުން މެލަޓޯނިން އުފެދުމަށް އެހީތެރިވެދީ، ނިދުމަށް ހަށިގަނޑު ތައްޔާރުކޮށްދެއެވެ.
ނަފުސާނީ ދުޅަހެޔޮކަމުގެ ނަޒަރަކުން ބަލާއިރު، މިއީ ސްޓްރެސް ދަށްކޮށްދީ ހިތްހަމަޖެހުން ގެނެސްދޭ ކަމެކެވެ. ނިދުމާ ބެހޭ މާހިރެއްކަމުގައިވާ ޕެޓްރީޝިއާ ރީޑް ވިދާޅުވި ގޮތުގައި، އަނދިރީގައި ފެންވަރާއިރު ލޮލަށް ފެންނަ މަންޒަރުތަކަށްވުރެ ބޮޑަށް، ހަށިގަނޑުގައި ފެން ޖެހޭ އިހުސާސާއި، ސައިބޯނީގެ މީރުވަހާއި، ފެން އޮހޭ އަޑަށް ސަމާލުކަން ދެވެއެވެ. މިއީ މެޑިޓޭޝަން ނުވަތަ ވިސްނުން އެއްކުރާ ކަމެއް ފަދައިން ކުރެވިދާނެ ކަމެކެވެ. މީގެ ސަބަބުން ދުވަހުގެ ވަރުބަލިކަމާއި ކަންބޮޑުވުންތަކުން ސިކުނޑި ދުރުކޮށްދެއެވެ.
ނަމަވެސް، މާހިރުން އިންޒާރު ދެއްވާ ގޮތުގައި މިއީ ނިދުމުގެ ބޮޑެތި ބަލިތަކަށް އޮތް ހައްލެއް ނޫނެވެ. ދާއިމީކޮށް ނިދުމުގެ މައްސަލަ ހުންނަ މީހުން ޑޮކްޓަރެއްގެ އެހީތެރިކަން ހޯދަން ޖެހޭނެ އެވެ. އަދި މިއީ މަޖުބޫރު ކަމެއްގެ ގޮތުގައި ދެކިގެން ކުރުމަކީ އޭގެ ފައިދާ ގެއްލި، އިތުރަށް ހާސްކަން އިތުރުވެދާނެ ކަމެކެވެ.
ގަދައަށް ނިދުމަށްޓަކައި އެހެނިހެން ބައެއް ކަންކަމަށް ސަމާލުކަން ދިނުމަށް ވެސް މާހިރުން ލަފާދެ އެވެ. އޭގެ ތެރޭގައި ކޮންމެ ދުވަހަކުވެސް އެއް ގަޑިއަކަށް ނިދައި ހޭލުމާއި، ނިދުމުގެ ހަ ގަޑިއިރު ކުރިން ކެފެއިން އެކުލެވޭ ބުއިންތަކާ ދުރުވުމާއި، ނިދުމުގެ ތިން ގަޑިއިރު ކުރިން ބަރު ކެއުންތައް ނުކެއުން ހިމެނެއެވެ. އަދި ނިދާ ކޮޓަރިއަކީ އަނދިރި، ފިނި އަދި ހިމޭން ތަނަކަށް ހެދުމަކީ ވެސް މުހިންމު ކަމެކެވެ.
މައުލޫމާތު: ހެލްތުލައިން
