އަދުލާން ސަލާމަތްކޮށްދިނީ އޭނާގެ ކޮމްޕިއުޓަރުން ފެނުނީ ކުޑަކުދިންގެ އޮރިޔާން ކާޑުކަން ސާތިބުނުކޮށްދެވޭނެ ކަމަށް ބުނެ

ކުޑަކުދިންގެ އޮރިޔާން ކާޑާއި ކުޑަކުދިންނަށް ޖިންސީ ގޯނާ ކުރާ މަންޒަރު ފެންނަ ފޮޓޯ އާއި ވީޑިއޯ ގެންގުޅުނު އާދަމް އަދްލާން ލަތީފް، 22، ސަލާމަތްކޮށްދިނީ، އޭނާގެ އަތުން ފެނުނީ ކުޑަކުދިންގެ އޮރިޔާންކަން ސާބިތުނުކޮށްދެވޭތީ ކަމަށް ޕްރޮސެކިއުޓާ ޖެނެރަލް އައްބާސް ޝަރީފުގެ އޮފީހުން ނެރުނު ބަޔާނެއްގައި ބުނެފި އެވެ. 

ފުލުހުން ހިންގި ބޮޑު އޮޕަރޭޝަނެއްގެ ތެރެއިން މިދިޔަ މެއި މަހު އަތުލައިގަތް އަދުލާންގެ މައްޗަށް ފުރަތަމަ އައްބާސް އުޅުއްވީ ދައުވާ ނުކުރާށެވެ. އަދުލާނުގެ މައްޗަށް ދައުވާ ކުރީ އެ މައްސަލަ ރިވިއު ކުރަން ފުލުހުން އެދުމުންނެވެ. 

އެ މައްސަލައިގައި ޕީޖީ އޮފީހުން މިއަދު ނެރުނު ނޫސް ބަޔާނެއްގައި ބުނެފައި ވަނީ، އެއްވެސް އަދަބެއް ނުލިބޭ ގޮތަށް އަދްލާން ދޫކޮށްލަން ނިންމީ އޭނާ ގެންގުޅުނީ ކުޑަކުދިންގެ އޮރިޔާންކަން ސާބިތުކޮށްދެވޭ މިންވަރަށް ހެކި ނެތުމުން ކަމަށެވެ. 

 "އާދަމް އަދްލާން ލަތީފްއާ ގުޅުވައިލެވޭ ޑިވައިސްތަކުން އޮރިޔާންކާޑު ފެނިފައިވީ ނަމަވެސް، އެއީ ކުޑަކުދިންގެ އޮރިޔާންކާޑުކަން ސާބިތުކޮށްދެވޭ މިންވަރަށް ހެކި ހޯދިފައިނުވޭ،" އެ ބަޔާނުގައި ބުނެފައިވެ އެވެ.

އަދުލާނުގެ އަތުން ފުލުހުން ހޯދި ކޮމްޕިއުޓަރުތަކުން، ހުތުރުކަން ބޮޑު އަދި އަނިޔާވެރި މަންޒަރުތައް ރައްކާކޮށްފައި ހުއްޓެވެ. އޭގެ ތެރޭގައި، ކުޑަކުދިންނަށް ޖިންސީ ގުނަވަންތަކަށް އަނިޔާ ކުރާ މަންޒަރު ވެސް ހިމެނެ އެވެ.

"މި މައްސަލައިގެ ތަހުގީގަށް އޭނާގެ އަތުން ހިފެހެއްޓި އިލެކްޓްރޯނިކް ވަސީލަތްތަކުގެ ފޮރެންސިކް ތަހުލީލުތައް ހެދިއިރު، ކުޑަކުދިންގެ ބަރަހަނާ މަންޒަރުތައް ހިމެނޭ ގިނަ އަދަދެއްގެ ފޮޓޯ އާއި ވީޑިއޯ އެ ތަކެތިން ވަނީ ފެނިފަ. މީގެ ތެރޭގައި ކުޑަކުދިންނަށް ޖިންސީ ގޯނާކުރާ މަންޒަރުތައް ދައްކުވައިދޭ ވީޑިއޯތައް ވެސް ހިމެނޭ،" އެ މައްސަލައިގައި ފުލުހުން މީގެ ކުރިން ބުނެފައިވެ އެވެ. 

ފުލުހުން ބުނީ އޭނާއަކީ ކުޑަކުދިންގެ އޮރިޔާން ފޮޓޯ ވިއްކާ ނެޓްވޯކެއްގެ މީހެއް ކަމަށެވެ. އޭނާ ފޮޓޯ ވިއްކަމުންދިޔައީ ކްރިޕްޓޯ ކަރެންސީ ބޭނުންކޮށްގެން ކަމަށް ވެސް ފުލުހުން ބުނެ އެވެ. ހައްޔަރު ކުރުމުގެ ކުރިން އޭނާ ވަޒީފާ އަދާ ކުރީ މޯލްޑިވިއަންގަ އެވެ. ނަމަވެސް އެ މައްސަލަ ފެންމަތިވުމުން އޭނާ ވަނީ ވަޒީފާއިން ވަކިކޮށްފަ އެވެ. 

އޭގެ އިތުރުން، ލައިގެން ހުރި ޖަނގިޔަލުގެ ތެރެއިން މަސްތުވާތަކެތި ފެނުނު މީހަކަށް ދައުވާ ކުރުމަށްފަހު ވެސް ސަރުކާރުން ވަނީ އޭނާ ސަލާމަތްކޮށްފަ އެވެ. ސަލާމަތްކޮށްދިން މީހާއަކީ ވެރިކަން ކުރާ ޕީއެންސީގެ މެންބަރެކެވެ.