އިނގިރޭސިވިލާތުގެ އަމީރު ހެރީ އާއި އަނބިކަނބަލުން މޭގަން މާކަލް އަނބުރާ އިނގިރޭސިވިލާތަށް ދިރިއުޅުން ބަދަލުކުރަން ނިންމާފައިވާ ކަމަށް ބުނެފި އެވެ.
ޑެއިލީ ޓެލެގްރާފް އަދި ދަ ސަން ނޫހުން އެންމެ ފުރަތަމަ ރިޕޯޓްކޮށްފައިވާ ގޮތުގައި، ހެރީ އާއި މޭގަން އެމެރިކާ ދޫކޮށް މި މަހުގެ ފަހުކޮޅު އިނގިރޭސިވިލާތަށް ބަދަލުވާނެ އެވެ. އެ ދެމަފިރިން ދިރިއުޅުމަށް ހަމަޖެހިފައިވަނީ ލަންޑަނުން ބޭރުގައި ހުންނަ، ޝާހީ އާއިލާއާ ގުޅުމެއް ނެތް އަމިއްލަ ގެއެއްގަ އެވެ.
އެ ދެމަފިރިންގެ ދެ ދަރިން ކަމަށްވާ އުމުރުން ހަތް އަހަރުގެ އާޗީ އާއި ފަސް އަހަރުގެ ލިލިބެޓް، އަންނަ ސެޕްޓެމްބަރު މަހު އިނގިރޭސިވިލާތުގެ ސްކޫލަކަށް ކިޔަވަން ދާން ފެށުމަށް މިހާރު ވަނީ ނަން ނޯޓުކޮށްފަ އެވެ.
އިނގިރޭސިވިލާތަށް ދިރިއުޅުން ބަދަލުކުރަން ނިންމިކަން ރަސްގެފާނު ޗާލްސްއަށް އަންގާފައިވަނީ މިދިޔަ އާދީއްތަ ދުވަހު އެވެ. ނަމަވެސް، ހެރީ ނުވަތަ މޭގަން އަލުން ޝާހީ ޒިންމާތަކާ ހަވާލުވުމަށް މިހާތަނަށް އެއްވެސް ރޭވުމެއް ނެތެވެ.
މި އަހަރުގެ ޖުލައި މަހު އެ ދެމަފިރިންނާއި އެމީހުންގެ ދަރިން ރަސްގެފާނު ޗާލްސްގެ ހައިގްރޯވް ގެކޮޅުގައި ރަސްގެފާނާ ބައްދަލުކުރި ނަމަވެސް، އެ ދަތުރުގައި ދިރިއުޅުން ބަދަލުކުރުމާ ގުޅޭގޮތުން މަޝްވަރާކޮށްފައި ނުވާކަން ވަނީ އެނގިފަ އެވެ.
އެ ދެމަފިރިން އިނގިރޭސިވިލާތް ދޫކޮށް، ޝާހީ ޒިންމާތަކުން ވަކިވީ 2020 ވަނަ އަހަރުގެ ކުރީކޮޅު އެވެ. އަދި އެ އަހަރުގެ މާޗް މަހު އެމީހުން ވަނީ އެމެރިކާގެ ކެލިފޯނިއާގައި ދިރިއުޅެން ފަށާފަ އެވެ.
އޭގެ ފަހުން އާއިލީ ގުޅުންތަކަށް ވަނީ ވަރަށް ބޮޑަށް ބުރޫއަރާފަ އެވެ. ނަމަވެސް، މިދިޔަ ޖުލައި މަހު ރަސްގެފާނު ޗާލްސް އާއި ރާނީ ކެމިލާއާ ބައްދަލުކުރުމަކީ އެ ގުޅުން ރަނގަޅުވުމަށް އެޅުނު މުހިންމު ފިޔަވަޅެކެވެ.
