އާދަޔާ ހިލާފަށް ހޫނުގަދަވުމުގެ ސަބަބުން ސްޕެއިންގެ ޖަންގަލިތަކުގައި ރޯވެފައިވާ އަލިފާންގަނޑު ނިއްވާލުމުގެ މަސައްކަތް ކުރަމުން އެބަދެ އެވެ.
ބޭޑާ އަވަށުގެ ވަށައިގެން ރޯވެފައިވާ އަލިފާންގަނޑު ނިއްވުމަށް ސަތޭކައަށްވުރެ ގިނަ ފަޔާ ފައިޓަރުންނާއި މާހިރުން މިހާރު ދަނީ ހަރަކާތްތެރިވަމުންނެވެ.
މި ހާދިސާގައި މިހާތަނަށް 12 މީހަކު މަރުވެފައިވާއިރު، 23 މީހަކު އަދިވެސް ފެނިފައި ނުވާތީ އެ މީހުން ހޯދުމުގެ މަސައްކަތް ދަނީ ކުރަމުންނެވެ.
އޮފިޝަލުން އިންޒާރު ދެއްވާފައިވާ ގޮތުގައި، މި ހާދިސާގައި މަރުވި މީހުންގެ އަދަދު އިތުރުވުން އެކަށީގެންވެ އެވެ.
މި ހޫނު މޫސުމުގައި ޔޫރަޕްގެ ދެކުނުގެ ގައުމުތަކުގެ ފިނިހޫނުމިން 40 ޑިގްރީ ސެލްސިއަސްއަށް އުފުލި، ގިނަ ދުވަސްތަކެއް ވަންދެން ހޫނުގަދަވުމުގެ ސަބަބުން ފްރާންސާއި، ޕޯޗުގަލް އަދި ސްޕެއިންގެ އެކި ސަރަހައްދުތަކުގައި ވަނީ ވަރުގަދަ އަލިފާނުގެ ހާދިސާތައް ހިނގާފަ އެވެ.
މިހާތަނަށް މަދުވެގެން 12 މީހުން މަރުވެފައިވާ މި ހާދިސާއަކީ ސްޕެއިންގެ ތާރީހުގައި ވެސް އެންމެ ގިނަ ބަޔަކު މަރުވި އަލިފާނުގެ ހާދިސާތަކުގެ ތެރޭގައި ހިމެނޭ ހާދިސާއެކެވެ.
ކޮޕާނިކަސް ކްލައިމެޓް ސާވިސްއިން ހާމަކޮށްފައިވާ ގޮތުގައި، މޫސުމަށް އަންނަ ބަދަލުތަކުގެ ސަބަބުން މުޅި ދުނިޔޭގެ ފިނިހޫނުމިން ދަނީ އުފުލެމުންނެވެ. އަދި ޔޫރަޕަކީ ދުނިޔޭގެ އެހެން ބައްރުތަކަށް ވުރެ ދެގުނަ ހަލުވިމިނެއްގައި ހޫނުވަމުންދާ، ދުނިޔޭގައި އެންމެ ހަލުވިކޮށް ހޫނުވަމުން އަންނަ ބައްރެވެ.
މީގެ ސަބަބުން ހޫނު މޫސުމުގައި އާދަޔާ ހިލާފަށް ހޫނުގަދަވުމާއި، ޔޫރަޕްގެ ފެން ލިބޭ މިންވަރަށް ބުރޫއެރުމުގެ އިތުރުން، ކުރިއަށްވުރެ ނުރައްކާތެރި އަދި ބޮޑެތި އަލިފާނުގެ ހާދިސާތައް ހިނގުމަށް ވަނީ މަގުފަހިވެފަ އެވެ.
