ޓިކްޓޮކް ލައިވްސްޓްރީމެއްގެ ތެރޭގައި އަމިއްލަ ހަށިގަނޑަށް ގެއްލުންދޭ މަންޒަރު ފެނުމާ ގުޅިގެން، އާންމުން އެކަން ރިޕޯޓްކުރުމުން އެމެރިކާގެ މަޝްހޫރު ބްލޮގަރު ޕެރޭޒް ހިލްޓަން ހޮސްޕިޓަލަށް ގެންގޮސް ފަރުވާ ދޭން ފަށައިފި އެވެ.
ކަންބޮޑުވުން ފާޅުކުރި ބައެއް މީހުން، ސޯޝަލް މީޑިއާގައި މީހަކު އަމިއްލަ ނަފްސަށް ގެއްލުންދޭ މަންޒަރު ލައިވްކުރަމުންދާ ކަމަށް ރިޕޯޓްކުރުމާ ގުޅިގެން، މިދިޔަ އަންގާރަ ދުވަހު މިއާމީގައި ހުންނަ ހިލްޓަންގެ ގެއަށް ކަމާބެހޭ ފަރާތްތަކުން ވަނީ ގޮސްފަ އެވެ.
މިއާމީ-ޑޭޑް ޝެރިފްގެ އޮފީހުން މައުލޫމާތު ދިން ގޮތުގައި، އެ މީހާ ވަނީ "ރައްކާތެރިކަމާއެކު ސަލާމަތްކުރެވިފަ އެވެ." އަދި އޭނާ މިހާރު ވަނީ "އެ ސަރަހައްދުގެ ހޮސްޕިޓަލަކަށް ގެންގޮސް، ފަރުވާ ދޭން ފަށާފައި" ކަމަށް ވެސް އެ އޮފީހުން ބުންޏެވެ.
ފުލުހުން އިތުރަށް ބުނި ގޮތުގައި، އެ އިދާރާގެ ކްރައިސިސް ރެސްޕޮންސް ޔުނިޓާއި ނަފްސާނީ ސިއްހަތުގެ މާހިރުން ދަނީ އެ ސަރަހައްދުގައި ހަރަކާތްތެރިވަމުންނެވެ. އަދި އެ މީހާގެ އާއިލާއަށް ބޭނުންވާ އެހީތެރިކަމާއި ވަސީލަތްތައް ފޯރުކޮށްދެމުންދާ ކަމަށް ވެސް ފުލުހުން ބުންޏެވެ.
މާރިއޯ ލަވަންޑޭއިރާ ނުވަތަ ހިލްޓަން، ލައިވްސްޓްރީމް ކުރި ވަގުތު ގޭގައި ހުރީ އޭނާ އެކަނި ކަމަށް ފުލުހުން ކަށަވަރުކޮށްދީފައިވެ އެވެ. އަދި އެ ހާދިސާއަށް ފަހު މާ ގިނައިރުތަކެއް ނުވަނީސް އޭނާގެ ޓިކްޓޮކް އެކައުންޓް ވަނީ ސަސްޕެންޑްކޮށްފަ އެވެ.
ޓިކްޓޮކްގެ ތަރުޖަމާނަކު ބުނި ގޮތުގައި، އެ ކުންފުނީގެ އޮޓޮމޭޓެޑް މޮޑަރޭޝަން ސިސްޓަމްތަކުން ވަނީ އެ ލައިވްސްޓްރީމް ފެށުނުތާ މަދު މިނެޓްކޮޅެއްގެ ތެރޭގައި އެމެރިކާގެ މޮޑަރޭޝަން ޓީމުގެ ސަމާލުކަމަށް އެކަން ގެނެސްފަ އެވެ.
މޮޑަރޭޓަރަކަށް ހެދުނު ގޯހަކުން އެ ވީޑިއޯ ހުއްޓުވުމުގައި ލަސްތަކެއްވި ނަމަވެސް، ފުލުހުންނަށް އެކަން އެންގި ކަމަށާއި، އޭގެ ފަހުން ފެށި އެހެން ލައިވްސްޓްރީމްތައް 90 ސިކުންތު ތެރޭގައި ބަންދުކޮށް، އެ އެކައުންޓް ބޭން ކުރި ކަމަށް ޓިކްޓޮކުން ބުންޏެވެ.
ހިލްޓަން މަޝްހޫރުވެގެން ދިޔައީ 2000 ގެ އަހަރުތަކުގެ ކުރީކޮޅު، އޭނާ ހިންގި މަޝްހޫރު މީހުންގެ ހަބަރުތައް ގެނެސްދޭ ވެބްސައިޓުގެ ސަބަބުންނެވެ. އެ ވެބްސައިޓަކީ ބައެއް ފަހަރު ވަރަށް ބޮޑެތި ބަހުސްތަކެއް އުފެދުނު ސައިޓެކެވެ.
'ޕެރޭޒް ހިލްޓަން' އަކީ އޭނާ ބޭނުންކުރާ ފަންނީ ނަމެކެވެ. މިއީ އެ ދުވަސްވަރު އެންމެ މަޝްހޫރު އެކަކު ކަމަށްވާ ޕެރިސް ހިލްޓަންގެ ނަމާ ގުޅުވައިގެން އޭނާ ހެދި ނަމެކެވެ.
އޭނާގެ ބްލޮގް ޕޯސްޓުތަކުގެ ސަބަބުން މައިލީ ސައިރަސް، ކްލޯއީ ކާޑޭޝިއަން، މިލާ ކޫނިސް އަދި އޭނާގެ ކުރީގެ އެކުވެރިޔާ ލޭޑީ ގާގާ ފަދަ ތަރިންގެ ފާޑުކިޔުން ވަނީ އަމާޒުވެފަ އެވެ.
ނަމަވެސް، ފަހުން ހިލްޓަން ވަނީ އޭނާގެ ކެރިއަރުގެ ކުރީކޮޅު ފެތުރި ހަބަރުތަކާ ގުޅިގެން މައާފަށް އެދިފަ އެވެ. އަދި އިންޓަނެޓް ސަގާފަތާއި ސެލެބްރިޓީ ހަބަރުތައް ގެނެސްދޭ ގޮތަށް އައި ބަދަލާއެކު، އޭނާގެ އޮންލައިން ބްރޭންޑް ބަދަލުކުރުމަށް ވަނީ މަސައްކަތް ކޮށްފަ އެވެ.
