ކުރީ ސަރުކާރުން ހިންގި ބިންވެރިޔާ ސްކީމްގެ ދަށުން ހުޅުމާލެ ފޭސް 2 އިން ދޫކުރި ބިންތައް ވިޔަފާރިތަކަށް ހާއްސަކުރަން ހުއްދަ ދިނުމަކީ މި ސަރުކާރުން ގެންގުޅޭ ވިސްނުމެއް ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު މިރޭ ވިދާޅުވެއްޖެ އެވެ.
ހިޔާ ޓަވަރުތަކުގައި ލިފްްޓް ހަރުކޮށް ނިންމުން ފާހަގަކުރަން ބޭއްވި ރަސްމިއްޔާތުގައި މުއްތަލިބު ވިދާޅުވީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުމާލޭގައި ތިބި ރައްޔިތުންނަށް ހިދުމަތް ދިނުމަށް އެކަށީގެންވާ ބިންތަކެއް ނެތުމާއެކު، އެ ތަނުން ބޯހިޔާވެހިކަމަށް ނިމިދިޔަ ސަރުކާރުން ދޫކޮށްފައިވާ ބިންތައް ވިޔަފާރިކުރެވޭނެ ގޮތް ތަނަވަސް ކޮށްދޭން ޖެހޭ ކަމަށެވެ.
"އަޅުގަނޑުމެން އެބަޖެހޭ ރައްޔިތުންނަށް ދޫކޮށްފައިވާ ބިންތަކުގައި ވިޔަފާރީގެ އުސޫލުން ތަރައްގީކޮށްގެން އެ ބިންތަކުން ފައިދާ ހޯދައި، މިތަނުގައި އުޅޭ ރައްޔިތުންނަށް ހިދުމަތް ލިބޭނެ މަގުވެސް ތަނަވަސްކޮށްދޭން. މިވަގުތު އެ ބިންތަކަކީ ވަރަށް ބޮޑަށް ތަޅުއެޅުވިފައި ހުރި ބިންތަކެއް. ހަމައެކަނި ދިރިއުޅުމަށްޓަކައި ވަކި ގޮތަކަށް ތަރައްގީ ކުރުމުގެ ހުއްދަ މިދެވެނީ،" މުއްތަލިބު ވިދާޅުވި އެވެ.
މުއްތަލިބު ވިދާޅުވީ ސަރުކާރުގެ ވިސްނުމަކީ ބޯހިޔާވެހިކަމަށް ދޫކުރި ބިންތަކުގައި އަމިއްލަ ފަރާތްތަކުން އިންވެސްޓުކޮށްގެން ޕްރީ ސްކޫލް، ކްލިނިކް ނުވަތަ ޝޮޕިން ކޮމްޕްލެކްސް ފަދަ ތަންތަން އަޅައިގެން ފައިދާ ހޯދޭނެ މަގު ތަނަވަސްކޮށްދިނުން ކަމަށެވެ.
"އެހެންނަމަވެސް ސަރުކާރުގެ ވިސްނުމަކީ އަމިއްލަ ފަރާތްތަކުން އިންވެސްޓުކޮށްގެން ކުރާ ކަންތައްތަކުން، އަމިއްލަ ފަރާތްތަކުގެ ބިންތައް ބޭނުންކޮށްގެން ހުޅުމާލޭގެ ފޭސް 2 ގައި އުޅޭ ރައްޔިތުންނަށް އެއީ ޕްރީ ސްކޫލެއް ކަމުގައިވީ ނަމަވެސް އެއީ ކްލިނިކްތަކެއް ކަމުގައިވީ ނަމަވެސް އެއީ ޝޮޕިން ކޮމްޕްލެކްސްތަކެއް ކަމުގައިވީ ނަމަވެސް އެހެނިހެން ވިޔަފާރީގެ ކަންތައްތައް ކަމުގައިވީ ނަމަވެސް އެކަންތައްތައް އެބަޖެހެއޭ ހޯދުމުގެ ފުރުސަތު ލިބެން،" މުއްތަލިބު ވިދާޅުވި އެވެ.
މާލޭގައި ހުރި ބިންތަކުގައި ވިޔަފާރި ބޭނުމަށް އެކި ކަންކަން ކުރެވޭކަން ފާހަގަކުރައްވާ މުއްތަލިބު ވިދާޅުވީ ހުޅުމާލޭގައި ހުރި ބިންތަކުގައިވެސް އެފަދަ ބޭނުންތައް ކުރެވޭނެ މަގު ތަނަވަސްކޮށްދޭން ޖެހޭ ކަމަށެވެ. އެއާއެކު ހުޅުމާލެ ފޭސް 2 ގެ ރައްޔިތުންނަށް ފައިދާވެ، އެތަން ތަރައްގީކުރަން ވެސް ފަސޭހަވެގެންދާނެ ކަމަށް މިނިސްޓަރު ވިދާޅުވި އެވެ.
ނިމދިޔަ އެމްޑީޕީގެ ވެރިކަމުގައި ހިންގި ބިންވެރިޔާ ސްކީމްގެ ދަށުން ހުޅުމާލެ ފޭސް 2 އިން 1،409 ގޯތި އަދި ހުޅުމާލެ ފޭސް 3 އިން 699 ގޯތި ދޫކޮށްފައިވެ އެވެ. އޭގެތެރެއިން ގިނަ އަދަދެއްގެ ގޯތި މިހާރު ވަނީ ހަވާލުކޮށް ނިންމާފަ އެވެ.
ބޯހިޔާވަހިކަން ނޫން ބޭނުންތަކަށް ބިންވެރިޔާ ގޯތިތައް ބޭނުންކުރަން ހުއްދަ ދޭން އުޅޭއިރު، އެ ބިންތަކުގައި އިމާރާތްކުރެވޭނެ ގޮތް ފަހިކޮށްދިނުމަކީ މި ސަރުކާރުގެ ވައުދެކެވެ. މި ވައުދު ފުއްދުމުގެ "ހިޔާވެހި" ނަމުގައި ފައިނޭންސިން ސްކީމެއް ތައާރަފުކުރި އެވެ. ނަމަވެސް، މި ސްކީމު އޮތް ގޮތުން ޝަރުތު ހަމަވީ މަދު ބަޔެކެވެ.
