ކުއަލަ ލަމްޕޫރު، މެލޭޝިއާ (އޮގަސްޓް 22) - މެލޭޝިއާގެ ކްލަބް، ޖޮހޯރް ޑާރުލް ޓައާޒިމް (ޖޭޑީޓީ) އިން ބަލިނުވެ 109 މެޗު ފުރިހަމަކޮށް ދުނިޔޭގެ ފުޓްބޯޅައިގެ ރެކޯޑެއް މުގުރާލައިފި އެވެ.
ޖޮހޯރު (ޖޭޑީޓީ)، އެންމެ ފަހުން ލީގުގެ މެޗަކުން ބަލިވެފައިވަނީ، 2021 ވަނަ އަހަރު އޭޕްރީލް މަހު އެވެ.
މެލޭޝިއާ ލީގުގައި ރޭ ކުޗިން ސިޓީ އަތުން 3-0 އިން މޮޅުވި މެޗާ އެކު، ލީގު ފުޓްބޯޅައިގައި ޖޮހޯރުން ވަނީ ބަލިނުވެ 109 މެޗު ހަމަކޮށްފަ އެވެ. އެންމެ ފަހުން 12 ސީޒަނުގައި ވެސް މެލޭޝިއާ ލީގު ޗެމްޕިއަންކަން ހޯދި ޖޮހޯރުން މި ވަނީ 32 އަހަރު ވަންދެން އައިވަރީ ކޯސްޓްގެ ކްލަބް، އެސެކް މިމޯސާ އަތުގައި އޮތް ރެކޯޑެއް މުގުރާލައިފަ އެވެ. އެ ޓީމުން ވަނީ، 1989 އިން 1994 އާ ދެމެދު ލީގު ފުޓްބޯޅައިގައި، 108 މެޗު ބަލިނުވެ ފުރިހަމަކޮށްފަ އެވެ.
"މިއީ ތާރީހީ ކާމިޔާބެއް، ހުރިހާ ގޮތަކުން ބެލިޔަސް،" ޖޮހޯރުގެ ކޯޗު، ސްޕެއިންގެ ޒިސްކޯ މުނޯޒް ބުންޏެވެ.
ރޭގެ މެޗަކީ، ޖޮހޯރުން މެލޭޝިއާ ފުޓްބޯޅައިގެ އާ ސީޒަނުގައި ކުޅުނު ފުރަތަމަ މެޗެވެ. ފުރަތަމަ މެޗުގައި މި ރެކޯޑް ހާސިލްވުން ވެގެންދިޔައީ، މިހާރު ޖޮހޯރާ ހަވާލުވެ ހުރި ވަޓްފޯޑާއި ޝެފީލްޑް ވެނެސްޑޭގެ ކުރީގެ ކޯޗު މުނޯޒަށް ލިބިގެންދިޔަ ބޮޑު ހިތްހަަމަޖެހުމެކެވެ.
ޖޮހޯރުން ރޭގެ މެޗު ފަށައިގެން، 11 ވަނަ މިނިޓްގައި ލީޑުނެގި އެވެ. މި ލަނޑު އެ ޓީމަށް ޖަހައިދިނީ، ބްރެޒިލްގެ ކުޅުންތެރިޔާ، ގިލެރްމޭ އެވެ. ދެ ވަނަ ހާފުގެ ކުޅުން ފަށައިގެން 10 މިނިޓް ތެރޭ ޖޮހޯރުގެ ދެ ވަނަ ލަނޑު ޖެހީ ސްޕެއިންގެ މިޑްފީލްޑަރު އަރީބާސް އެވެ. މެޗުގެ ފުރިހަމަ ވަގުތު ހަމަވާން ހަތަރު މިނިޓަށް ވެފައި ވަނިކޮށް ޖޮހޯރުން މި މެޗުގައި ޖެހި ތިން ވަނަ ލަނޑު ޖެހީ، އިރާންގެ ފޯވާޑް، ޝަހާބް ޒަހޭދީ އެވެ.
ފާއިތުވި 15 ވަރަކަށް އަހަރަށް ބަލާއިރު، މެލޭޝިއާގެ ފުޓްބޯޅަ ޑޮމިނޭޓް ކުރަމުން އަންނަ ޖޮހޯރު (ޖޭޑީޓީ) އަކީ މުއްސަނދިކަމާއި ކާމިޔާބަށް ބެލި ނަމަވެސް އެ ގައުމުގެ ފުޓްބޯޅައިގައި މި ވަގުތު އެއް ވަނަ އެވެ. އެ ގޮތުން، އެ ކްލަބް ހިންގަމުން އަންނަ ފަރާތަކީ، ކްރައުން ޕްރިންސް ޓުންކޫ އިސްމާއިލް އިބްނި ސުލްތާން އިބްރާހިމް އެވެ. އޭނާގެ ލީޑަޝިޕްގައި ޖޮހޯރުން 40،000 ސަޕޯޓަރުންގެ ޖާގައިގެ ސްޓޭޑިއަމެއް ވެސް އެޅި އެވެ.
ޖޮހޯރް (ޖޭޑީޓީ)ގެ ސީއީއޯ އަކަށް ހުރީ ސްޕެއިން ގައުމީ ޓީމާއި ލިވަޕޫލްގެ ކުރީގެ ފޯވާޑް، ލުއިސް ގާސިއާ އެވެ. އޭނާ ބުނީ، އެންމެ މަތީ ފަންތީގައި ޔޫރަޕްގައި ވެސް އޭނާ ކުޅެފައިވާއިރު، ބަލިނުވެ، މި އަދަދަށް މެޗު ހަމަކުރުމަކީ އާދަޔާހިލާފު ކަމެއް ކަމަށެވެ.
