މެލޭޝިއާގެ ބޮޑުވަޒީރު އަންވަރު އިބްރާހީމް ބައެއް މެޑިކަލް ޓެސްޓުތަކާއި ފަރުވާތަކެއް ފުރިހަމަކުރައްވަމުން ގެންދަވާ ކަމަށާއި، ކުރިއަށް އޮތް ދެ ދުވަހު އެމަނިކުފާނު އޮންނަވާނީ ޑޮކްޓަރުންގެ ބެއްލެވުމުގެ ދަށުގައި ކަމަށް އިއުލާންކޮށްފަ އެވެ.
ބޮޑުވަޒީރު އަންވަރު އިބްރާހީމްގެ ޕްރެސް ސެކްރެޓަރީ ތުންކޫ ނަޝްރުލް އަބައިދާ ނެރުއްވި ބަޔާނެއްގައި ވިދާޅުވީ، މެޑިކަލް އެކްސްޕާޓުންގެ ޓީމަކުން ކަނޑައަޅާފައިވާ ޓެސްޓުތަކާއި ފަރުވާތައް ބޮޑުވަޒީރު މިހާރު ފުރިހަމަކުރައްވަމުން ގެންދަވާ ކަމަށެވެ. ނަމަވެސް އެއީ ކޮން ކަހަލަ ފަރުވާތަކެއް ކަމުގެ އިތުރު ތަފުސީލެއް އެ ބަޔާނުގައި ހާމަކޮށްފައެއް ނުވެ އެވެ.
އެ ބަޔާނުގައި އިތުރަށް ބުނެފައިވަނީ، ބޮޑުވަޒީރަށް ދިގު އުމުރެއް އަދި ދުޅަހެޔޮ ސިއްހަތެއް މިންވަރުކުރައްވައި، ވީ އެންމެ އަވަސް ފުރުސަތެއްގައި ރަސްމީ މަސައްކަތްޕުޅުތަކަށް އެނބުރި ވަޑައިގަތުމުގެ ތައުފީގު ދެއްވުން އެދި ދުއާކޮށްދިނުމަށް އެދޭ ކަމަށެވެ.
މިދިޔަ ހޯމަ ދުވަހު 79 އަހަރު ފުރުނު އަންވަރު އިބްރާހީމަކީ 2022 ވަނަ އަހަރުން ފެށިގެން މެލޭޝިއާގެ ބޮޑުވަޒީރުކަން ކުރައްވަމުން ގެންދަވާ ބޭފުޅެކެވެ. އޭނާއަކީ މީގެ ކުރިން ވެސް ކޮނޑުހުޅާއި ބުރަކަށީގެ އާލާސްކަންފުޅުތަކެއް ތަހައްމަލު ކުރައްވަމުން ގެންދަވާ ބޭފުޅެކެވެ.
އެގޮތުން، ކޮނޑުހުޅާއި ބުރަކަށީގެ ރިހުމުގެ ސަބަބުން 2018 ވަނަ އަހަރު ވެސް އަންވަރު އިބްރާހީމް ހޮސްޕިޓަލުގައި އެޑްމިޓްކޮށްގެން ފަރުވާ ދީފައިވެ އެވެ. އަދި ބުރަކަށީގެ ރިހުމުގެ ސަބަބުން މިދިޔަ ނޮވެމްބަރު މަހު މެލޭޝިއާގެ ޕަހަންގް ސްޓޭޓަށް ކުރައްވަން އޮތް ދަތުރުފުޅެއް ވެސް ވަނީ ކެންސަލް ކުރައްވާފަ އެވެ.
ހޮސްޕިޓަލުން މީގެ ކުރިން ނެރުނު ބަޔާނެއްގައި ބުނެފައިވާ ގޮތުގައި، މި އަހަރުގެ ޖެނުއަރީ މަހު ހެދި އާންމު މެޑިކަލް ޗެކަޕްތަކަށް ފަހު، ބޮޑުވަޒީރުގެ ސިއްހީ ހާލަތު ރަނގަޅު ކަމަށް ޑޮކްޓަރުން ވަނީ ލަފާދެއްވާފަ އެވެ.
