އިންޑޮނޭޝިއާގެ އެކި ކަންކޮޅުތަކުން 107،000 އަށް ވުރެ ގިނަ ހެކްޓަރުގެ ބިން އަނދަމުން ދާތީ، އެ ގައުމުގެ ސަރުކާރުން އެ އަލިފާންގަނޑުތައް ކޮންޓްރޯލް ކުރުމަށް އަވަސް ފިޔަވަޅުތަކެއް އަޅަމުން އެބަދެ އެވެ.
އަލިފާން ނިއްވުމުގެ މަސައްކަތަށް އެހީތެރިވުމުގެ ގޮތުން ކަމާބެހޭ އިދާރާތަކުން މިހާރު ވަނީ އާޓިފިޝަލްކޮށް ވާރޭ ވެއްސުމަށް "ކްލައުޑް-ސީޑިންގް" މަތިންދާބޯޓުތައް ބޭނުންކުރަން ފަށާފަ އެވެ. އަދި އަލިފާނުގެ އަސަރުކޮށްފައިވާ ޕްރޮވިންސްތަކުގެ ބައެއް ސްކޫލްތަކުގެ ކިޔެވުން މެދުކަނޑާލާފައިވާތާ މިހާރު ވަނީ ތިން ދުވަސް ވެފަ އެވެ.
ދެކުނު އިރުމަތީ އޭޝިއާގެ އެހެން ގައުމުތަކެކޭ އެއްފަދައިން، އިންޑޮނޭޝިއާއަށް ވެސް މި އަހަރު ވަނީ އާދަޔާ ހިލާފަށް ހޫނުގަދަވެ، ހޫނު މޫސުން ދިގުލައިގެން ގޮސްފަ އެވެ.
މި އަލިފާންގަނޑުތަކުގެ ސަބަބުން އުފެދުނު ދުމުގެ އަސަރު މެލޭޝިއާގެ ބައެއް ސަރަހައްދުތަކަށް ވެސް ވަނީ ކޮށް ފައެވެ. އެގޮތުން، ބުދަ ދުވަހު މެލޭޝިއާގެ ސަރަވަކް ސްޓޭޓްގެ ކުޑަ ރަށެއްގައި ސިއްހަތަށް ނުރައްކާތެރި މިންވަރަކަށް ވައި ނުސާފުވި އެވެ.
އިންޑޮނޭޝިއާގެ ކަމާބެހޭ ފަރާތްތަކުން އަލިފާން ނިއްވުމުގެ މަސައްކަތް ބޮޑަށް އަމާޒުކުރަމުން ދަނީ ހަ ޕްރޮވިންސަކަށެވެ. އެއީ ޖަމްބީ، ސައުތު ސުމަޓްރާ، ވެސްޓް ކަލިމަންޓަން، ސެންޓްރަލް ކަލިމަންޓަން، ސައުތު ކަލިމަންޓަން އަދި ރިއާއު އެވެ.
އެންމެ ބޮޑަށް އަސަރުކޮށްފައިވާ ހަ ޕްރޮވިންސްގެ އިތުރުން، އީސްޓް ޖާވާގައި ހުންނަ މައުންޓް ބްރޯމޯ ނޭޝަނަލް ޕާކުގައި ވެސް ގާތްގަނޑަކަށް ހަފުތާއެއް ވަންދެން އަލިފާން ރޯވެފައި އޮތެވެ. މި އަލިފާންގަނޑު ހޯމަ ދުވަހު ނިއްވާލެވުނު އިރު، އެ ޕާކުގެ 550 ހެކްޓަރުގެ ބިން ވަނީ އަނދާފަ އެވެ.
ކަމާބެހޭ އިދާރާތަކުން ވަނީ މައުންޓް ބްރޯމޯގެ އަލިފާން ފަރުބަދަ ކައިރިން އަލިފާން ރޯވެދާނެ އާ ސަރަހައްދުތަކެއް ހުރިކަމުގެ އިންޒާރު ވެސް ދީފަ އެވެ. ފަތުރުވެރިންގެ މެދުގައި މަގުބޫލު މި ސަރަހައްދު އޮގަސްޓް މަހުގެ 8 ވަނަ ދުވަހުން ފެށިގެން ވަނީ ޒިޔާރަތްކުރާ މީހުންނަށް ބަންދުކޮށްފަ އެވެ.
