މަސްތުގެ ހާލަތުގައި ހުރެ ވަޒީފާއަށް ނިކުމެ، އިންޑޮނޭޝިއާގެ ވެރިރަށް ޖަކާޓާއަށް 26 ކިލޯގެ އެމްޑީއެމްއޭ އެތެރެކުރި ކަމުގެ ތުހުމަތުގައި މެލޭޝިއާގެ ޕައިލެޓަކު ހައްޔަރުކޮށްފި އެވެ.
އިންޑޮނޭޝިއާގެ ކަސްޓަމްސް އޮފީހުން ބުނީ އުމުރުން 39 އަހަރުގެ މި ޕައިލެޓް ހައްޔަރުކޮށްފައިވަނީ މިދިޔަ ބުދަ ދުވަހު ޖަކާޓާގެ މައި އެއާޕޯޓުން ކަމަށެވެ.
"އެމްއެސް" ގެ ނަމުން އައިޑެންޓިފައި ކޮށްފައިވާ މި ޕައިލެޓަކީ މެލޭޝިއާ އެއާލައިންސްގެ ބޯޓެއް ކުއާލަލަމްޕޫރުން ޖަކާޓާއަށް ދުއްވި މީހެއް ކަމަށް އެ އޮފީހުން ބުންޏެވެ.
ޖިނާއީ ތުހުމަތު ކުރެވޭ މި ޕައިލެޓް ޖަކާޓާއަށް 26 ކިލޯގެ އެމްޑީއެމްއޭ އެތެރެކުރީ ފޮއްޓެއްގައި ކަމަށާއި، އެއީ ކާކުކަން ނޭނގޭ މީހަކު 50،000 ރިންގިޓް (12,239.90 ޑޮލަރު) ގެ އިނާމެއް ދޭނެ ކަމަށް ބުނުމުން ކުރި ކަމެއް ކަމަށް ކަސްޓަމްސް އޮފީހުން މައުލޫމާތުދެ އެވެ.
ޕައިލެޓްގެ ކުޑަކަމުދާ ތަކެތި ޓެސްޓުކުރުމުން އޭނާ ހުރީ ކޮކެއިން އާއި މެތައެމްފަޓަމިންއަށް ޕޮޒިޓިވްވެ، މަސްތުގެ ހާލަތުގައިކަން އެނގުނެވެ. އަދި މި މައްސަލައާ ގުޅިގެން އިންޑޮނޭޝިއާ އާއި މެލޭޝިއާގެ ކަމާބެހޭ އިދާރާތަކުން ދަނީ މުއާމަލާތު ކުރަމުންނެވެ.
އިންޑިނޭޝިއާގެ ކަސްޓަމުން ބުނީ މި ޕައިލެޓަކީ މަސްތުވާތަކެތި އުފުލައިދޭ "ކޫރިއަރެއް" ގެ ގޮތުގައި މަސައްކަތްކުރި މީހެއް ކަމަށެވެ.
މި މައްސަލަ ތަހުގީގު ކުރަމުންދާތީ އެކަމާ ގުޅޭ ގޮތުން ވަކި އެއްޗެއް ބުނަން މެލޭޝިއާ އެއާލައިންސް އިން އިންކާރު ކުރި ނަމަވެސް، އެ ކުންފުނިން ބުނީ މުވައްޒަފުންގެ ފަރާތުން ފެންނަ މިފަދަ އެއްވެސް ނޭދެވޭ އަމަލެއް ބަލައިނުގަންނަ ކަމަށާއި، މިހާރު އެތެރޭގެ ތަހުގީގެއް ފަށާފައިވާ ކަމަށެވެ. އަދި ކަމާބެހޭ އިދާރާތަކަށް ފުރިހަމަ އެއްބާރުލުން ދޭނެ ކަމަށް ވެސް އެ އެއާލައިނުން ބުނެފައިވެ އެވެ.
އިންޑޮނޭޝިއާއަކީ މަސްތުވާތަކެއްޗާ މެދު ވަރަށް ހަރުކަށި ގާނޫނުތަކެއް ގެންގުޅޭ ގައުމެކެވެ. އެގޮތުން 2015 ވަނަ އަހަރު، ބާލީން ހެރޮއިން ބޭރުކުރަން އުޅުނު "ބާލީ ނައިން" ޑްރަގް ރިންގުގައި ހިމެނޭ އޮސްޓްރޭލިއާގެ ދެ މީހަކަށް އެ ގައުމުން ވަނީ މަރުގެ އަދަބު ދީފަ އެވެ.
