ރަށްތަކާއި ސިޓީ ކައުންސިލުތަކުގެ އިހުތިސާސުން ބިންތަކާއި ތަންތަން މައި ސަރުކާރުން ބޭނުން އިރެއްގައި ވަކިކޮށް، އެ ތަންތަން ސަރުކާރަށް ނެގޭ ގޮތަށް ގާނޫނަށް ގެންނަން އިސްލާހު ހުށަހެޅީ ރައްޔިތުންގެ ބަންޑާރަ ގޯތިން ވައްކަން ކުރުމަށް ކަމަށް ތުޅާދޫ ކައުންސިލްގެ ރައީސް އަހްމަދު އަފްރާހް ވިދާޅުވެއްޖެ އެވެ.
އަދަދު ނޫހުން ގެނެސްދޭ ރަށު ނޯޓު ޕްރޮގްރާމުގައި އަފްރާހް ވިދާޅުވީ ރައްޔިތުންނާއެކު މަޝްވަރާކޮށް ރައްޔިތުން ހޮވާފައި ތިބި ކަައުންސިލަރުން ލޭންޑް ޔޫޒް ޕްލޭނެއް ފާސްކޮށްފައި އޮއްވައި، ސަރުކާރުން ބޭނުންވެއްޖެ ހިނދެއްގައި އެ ޕްލޭނަށް ބަދަލު ގެނެވޭނަމަ އެއީ ރައްޔިތުންގެ ބަންޑާރަ ގޯތިން ވައްކަން ކުރުން ކަމަށެވެ.
"ރައްޔިތުންނާއެކު ކައުންސިލުން ކުރާ އެންމެ ބޮޑު މަސައްކަތަކީ އެ ރަށެއްގެ ތަރައްގީގެ ޕްލޭން އެކުލަވާލައި އެ ރަށެއްގެ ލޭންޑް ޔޫޒް ޕްލޭން އެކުލަވާލުން އެނގޭތޯ،" އަފްރާހް ވިދާޅުވި އެވެ.
"ދެން ރައްޔިތުން ބަސް ބުނެ ރައްޔިތުންގެ ފަރާތުން އިންތިހާބުވެފައި ފަރާތްތައް ފާސްކޮށްފައި އޮންނަ ލޭންޑް ޔޫޒް ޕްލޭނަކާއި ތަރައްގީގެ ޕްލޭނެއް އޮއްވައި، ސަރުކާރުގެ ވަޒީރުންގެ މަޖިލީހުން ބޭނުންވީމަ ބޭނުންވެއްޖެ ހިނދެއްގައި ބޭނުންވެއްޖެ ތަނެއް އެބޭފުޅުންނަށް ނެންގެވޭނެ އުސޫލެއް އޮތުން އެއީ އަޅުގަނޑަށް ގަބޫލެއް ނުކުރަން އެއީކީ ހަމަ އެކަނި ފޭރުން ކަމަކަށް އެނގޭތޯ. ރައްޔިތުންގެ ބަންޑާރަ ގޯތިން ވައްކަން ކުރުން އެއީ އެނގޭތޯ."
އަފްރާހް ވިދާޅުވީ މުހައްމަދު މުއިއްޒު މަސައްކަތް ކުރައްވަނީ ކައުންސިލްތަކަށް ލިބިފައި އޮތް ހަނި ބާރުވެސް ނަގައިގެން ސެންޓްރަލް ސަރުކާރެއް ކުރިއަށް ގެންދިޔުމުގެ މަސައްކަތް ކަމަށެވެ.
"އަޅުގަނޑަށް ގަބޫލުކުރެވެނީ ކައުންސިލްތަކުގެ ބާރު އެއްކޮށް ކަނޑާލަން މިބޭފުޅުން މަސައްކަތް ކުރައްވަނީ އެނގޭތޯ. ކައުންސިލްތަކަށް ލިބިދީފައި މިހާރު މިއޮތް ކުޑަ ހަނި ބާރުވެސް ހަމަ ނަގައިގެން ސެންޓްރަލް ސަރުކާރެއް ގެންދިޔުމުގެ މަސައްކަތް އެބޭފުޅާ [މުހައްމަދު މުއިއްޒު] އިސްވެ ހުންނަވައި އެކުރައްވަނީ،" އޭނާ ވިދާޅުވި އެވެ.
ކައުންސިލްތަކުން ބަލަހައްޓާ ބިންތައް ރަށްރަށުގެ އިހުތިސާސުން ވަކިކޮށް ސަރުކާރަށް ނެގޭ ގޮތަށް ލާމަރުކަޒީ ގާނޫނަށް ހުށަހެޅި އިސްލާހުގެ ބިލު ހުށަހެޅުއްވީ ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރެވެ. އޭނާއަކީ މިނިވަން މެންބަރެއް ނަމަވެސް މަސައްކަތް ކުރައްވަމުން ގެންދަވަނީ ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އާ އެކީގަ އެވެ.
ބިލުގައި ވަނީ ސަރުކާރުގެ މަޝްރޫއުތައް ހިންގުމަށް ޓަކައި ކައުންސިލެއްގެ އިހުތަސާސްގެ ތެރޭގައި ހިމެނޭ ބިމެއް ނުވަތަ ތަނެއް ވަކިކުރުމަށް ވަޒީރުންގެ މަޖިލީހުން ނިންމުމަށް ފަހު، ކައުންސިލުގެ މިލްކިއްޔާތުން އެ ތަނެއް ވަކިވާނެ ކަމަށެވެ. އަދި، އެ ތަނަކީ ދައުލަތުގެ ފުރިހަމަ ބާރު ހިނގާ ބިމާއި ތަންތަނަށް ވެގެން ދާނެ އެވެ.
ހަމަ އެހެންމެ، ރަށްރަށުގެ ފިޒިކަލް ޑިވެލޮޕްމަންޓު ޕްލޭން ފާސްކުރުމުގެ ކުރިން ވެސް ސަރުކާރުން ތަރައްގީގެ މަޝްރޫއުއެއް ހިންގަން ބިމެއް ހޯދަން އެދޭ ހާލަތްތަކުގައި އެ ބިން ސަރުކާރާ ހަވާލުކުރަން ޖެހެ އެވެ.
އެ ބިލު މަޖިލީހަށް ބަލައިގެންފައިވާއިރު، އިދިކޮޅު އެމްޑީޕީން ބުނަމުން ދަނީ އެ އިސްލާހަކީ ގާނޫނުއަސާސީއާ މުޅީން ހިލާފު ބިލެއް ކަމަށެވެ. ނަމަވެސް، ޕީއެންސީގެ މެންބަރުން ގެންދަވަނީ އެ ބިލު ދިފާއުކުރައްވަމުންނެވެ.
އެ ބިލު މަޖިލީހަށް ބަލައިގެންފައިވާއިރު، އެ ބިލާ ދެކޮޅަށް އާންމުންގެ ތެރެއިން ބަޔަކު ވަނީ ޕެޓިޝަނެއްގައި ސޮއިކުރަން ފަށައިފަ އެވެ. މިހާރު ބަދަލުތަކާ ދެކޮޅަށް ސޮއިކުރަމުން އަންނަ ޕެޓިޝަނުގައި ވަނީ އެ ބިލަކީ ލާމަޒުކަޒީ ގާނޫނޫގެ ރޫހާ ހިލާފު ބިލެއް ކަމަށް ބުނެ އެ ބިލު އަނބުރާ ގެންދަން ގޮވާލާފަ އެވެ.
