ސަރުކާރުގެ ތަރައްގީގެ މަޝްރޫއުތައް ހިންގުމަށްޓަކައި ރަށްތަކާއި ސިޓީ ކައުންސިލުތަކުގެ އިހުތިސާސުގައި ހިމެނޭ ބިންތައް މައި ސަރުކާރުން ބޭނުން އިރެއްގައި ނެގޭ ގޮތަށް ލާމަރުކަޒީ ގާނޫނަށް ހުށަހަޅާފައިވާ އިސްލާހާ ދެކޮޅަށް ހުށަހެޅި ޕެޓިޝަނާމެދު މަޖިލީހުގެ ޖަލްސާގައި ބަހުސްކުރަން އެޖެންޑާ ނުކޮށް، ޕެޓިޝަން ބަލައިގަތުމުގެ އުސޫލަށް ބަދަލު ގެނައުމަށް އެޖެންޑާ ކޮށްފި އެވެ.
މިއަދުގެ ޖަލްސާގެ އެޖެންޑާގައި އޮތީ، ރައްޔިތުންގެ މަޖިލީހުގެ ގަވާއިދުގެ 272 ވަނަ މާއްދާގެ (ނ) ގައިވާ ގޮތުގެ މަތިން، މަޖިލީހުގެ ގަވާއިދުގެ 257-1 ގެ (ޅ) އުނިކުރުމަށް ފުނަދޫ ދާއިރާގެ މެންބަރު މުހައްމަދު މަމްދޫހު ހުށަހަޅުއްވާފައިވާ މައްސަލަ ދިރާސާކުރުމަށް ދާއިމީ ކޮމިޓީއަށް ފޮނުވުމެވެ.
މަމްދޫހު އުނިކުރަން ހުށަހެޅުއްވި މާއްދާގައި ބަޔާންކޮށްފައި ވަނީ، މަޖިލީހަށް ކުރިން ހުށަހެޅިގެން ކުރިއަށްދާ ޕެޓިޝަނެއްގައި އެޅުމަށް ގޮވާލާފައިވާ ފިޔަވަޅެއް އަލުން އެޅުމަށް އެދި އިތުރު ޕެޓިޝަނެއް ހުށަނޭޅޭނެ ކަމަށެވެ.
މައުލޫމާތު ލިބިފައިވާ ގޮތުގައި، މި ބަދަލު ގެންނަން މެންބަރު މަމްދޫހު ހުށަހެޅުއްވީ، ތުޅާދޫ ދާއިރާގެ މެންބަރު އަބްދުލް ހަންނާނު އަބޫބަކުރު ހުށަހަޅުއްވާފައިވާ ބިލް ކުރިއަށް ގެންދަން ސ. މީދޫ ކައުންސިލްގެ ރައީސް އަހުމަދު ޝާތިރު އިސްވެ ހުށަހެޅުއްވި ޕެޓިޝަނަށް މަޖިލީހުގެ ތަޅުމުގައި ބަހުސްކުރަން ލާޒިމުވާ މިންވަރަށް ސޮއި ހަމަވުމުގެ ކުރިން، އޭނާ އަށް އެ ޕެޓިޝަން މަޖިލީހުގެ ކޮމިޓީއަށް އޮޅިގެން ފޮނުވިފައި އޮތުމުން، އެ މައްސަލައިގައި އިތުރު ޕެޓިޝަނެއް ހުށަހެޅުމުގެ ޖާގަ ހޯދުމަށެވެ.
ބިންތައް އަތުލެވޭ ބިލު ފާސްކުރުމަށް ގޮވާލައި ސަރުކާރު އަޑީގައި އޮވެ ޕެޓިޝަނެއްގައި ސޮއިކުރަން ފަށައިފި
މިފަދަ ޕެޓިޝަނެއްގައި ސޮއިކުރަން ފަށާފައި މިވަނީ އެ ބިލާ ދެކޮޅަށް ސޮއިކުރި ޕެޓިޝަނެއްގައި ސޮއި ހަމަކޮށް މަޖިލީހުގެ ތަޅުމާ ހަމައަށް މައްސަލަ ގޮސްފައި ވަނިކޮށް. މައުލޫމާތު ލިބިފައިވާ ގޮތުގައި ސަރުކާރުގެ ސިޔާސީ މަގާމުތަކުގައި ތިބި މީހުންނާއި ވެރިކަން ކުރާ ޕާޓީގެ މެންބަރުންނަށް އަންނަނީ މި ޕެޓިޝަނުގައި ސޮއިކުރުމަށް އަންގަމުން.
މިހާރު އޮތް އުސޫލުން އެއް ކަމަކާ ގުޅޭ ގޮތުން އެއް ޕެޓިޝަނަށް ވުރެ ގިނަ ޕެޓިޝަން ހުށައެއް ނޭޅޭނެއެވެ.
ނަމަވެސް މަމްދޫހު ހުށަހެޅުއްވި ގޮތަށް ގަވާއިދުން އެ ބައި އުނިކޮށްފިނަމަ، އެއް މައުޟޫއަކަށް ތަކުރާރުކޮށް ޕެޓިޝަން ހުށަހެޅުމުގެ ފުރުސަތު ލިބި، ޕެޓިޝަން ހުށަހެޅުމުގެ މުޅި ނިޒާމު އޮޅުންބޮޅުން ވެގެންދާނެ އެވެ.
ލާމަރުކަޒީ ގާނޫނަށް ގެންނަން އުޅޭ އިސްލާހާ ގުޅިގެން އާންމުންގެ ބޮޑެތި ކަންބޮޑުވުންތަކެއް ހުރި އިރު، އެކަމާ ދެކޮޅަށް ހުށަހެޅި ޕެޓިޝަނަށް ބަހުސްކުރުން ފަސްކޮށް، ގަވާއިދަށް ބަދަލު ގެންނަން އުޅޭ ސަބަބެއް ޕީއެންސީން ރަސްމީކޮށް ހާމަކޮށްފައެއް ނުވެ އެވެ.
ހަންނާންގެ ބިލް ކުރިއަށް ގެންދަން ތާއިދުކޮށް ޝާތިރު ހުށަހެޅި ޕެޓިޝަނަށް ސޮއި ހޯދުމަށް ޕީއެންސީގެ މަޖިލީހުގެ މެންބަރުން ވެސް މަސައްކަތް ކުރަމުންދާ ކަމަށް އެނގިފައިވެ އެވެ.
އެ ޕެޓިޝަން ކޮމިޓީއަށް ފޮނުވިފައި އޮތުމުން، ދެނެއް ސީދާ މަޖިލީހުގެ ތަޅުމުގައި ބަހުސްކުރަން އެ ޕެޓިޝަނެއް ނުގެންދެވޭނެ އެވެ.
ޕީއެންސީގެ ތާއިދާއެކު މަޖިލީހުގައި ކުރިއަށް ގެންދާ ހަންނާނު ހުށަހެޅުއްވި ބިލް ބޭރުކޮށްލަން ސޯޝަލް މީޑިއާ އެކްޓިވިސްޓް މިދުޢަމް ސައުދު ހުށަހެޅި ޕެޓިޝަންގައި މިހާރު 2300 އަށް ވުރެ ގިނަ މީހުން ސޮއިކޮށްފައިވެ އެވެ.
މި ޕެޓިޝަން ކުރިއަށް އޮތް ތިން ޖަލްސާގެ ތެރެއިން ޖަލްސާއަށް އެޖެންޑާކުރަން ޕެޓިޝަން ކޮމިޓީން ފާސްކޮށްފައި ވާއިރު، މިއަދުގެ ޖަލްސާއަށް އެ ޕެޓިޝަން އެޖެންޑާކޮށްފައެއް ނެތެވެ.
