ފަލަސްތީނަށް ތާއީދުކޮށް ބާއްވާ މުޒާހަރާތަކުގެ ސަބަބުން ޔަހޫދީ މުޖުތަމައަށް ކުރާ ނޭދެވޭ އަސަރުތަކަށް ބަލައި، ބައެއް ހާލަތްތަކުގައި އެފަދަ ހިނގާލުންތައް މަނާކުރެވިދާނެ ކަމަށް އިނގިރޭސި ބޮޑުވަޒީރު ކިއާ ސްޓާމާ ވިދާޅުވެއްޖެ އެވެ.
ބީބީސީއަށް ދެއްވި އިންޓަވިއުއެއްގައި ސްޓާމާ އެހެން ވިދާޅުވީ މިދިޔަ ބުދަ ދުވަހު ލަންޑަނުގައި ޔަހޫދީ ދެ ފިރިހެނަކަށް ވަޅިން ހަމަލާދީ ޒަހަމްކޮށްލި ހާދިސާއާ ގުޅިގެންނެވެ.
އޭނާ ވިދާޅުވީ ހިޔާލު ފާޅުކުރުމުގެ މިނިވަންކަމާއި ސުލްހަވެރިކަމާއެކު އިހުތިޖާޖު ކުރުމުގެ ހައްގު އޭނާ އަބަދުވެސް ދިފާއުކުރައްވާނެ ކަމަށެވެ. ނަމަވެސް، މުޒާހަރާތަކުގެ ތެރޭގައި ނުރައްކާތެރި ޝިއާރުތައް ބޭނުންކުރުމަކީ އެއްވެސް ހާލެއްގައި ބަލައިގަނެވޭނެ ކަމެއް ނޫން ކަމަށާއި، އެފަދަ ގޮވާލުންތައް ގޮވާ މީހުންނަށް ދައުވާ ކުރަންޖެހޭނެ ކަމަށް އޭނާ ވިދާޅުވި އެވެ.
ދެހާސް ތޭވީސް ވަނަ އަހަރުގެ އޮކްޓޫބަރު މަހު ގާޒާ ހަނގުރާމަ ފެށުނު ފަހުން، ފަލަސްތީނަށް ތާއީދުކޮށް ބާއްވާ ހިނގާލުންތަކަކީ ލަންޑަނުގައި އާންމު ކަމަކަށް ވަނީ ވެފަ އެވެ. މި މުޒާހަރާތަކަށް ފާޑުކިޔާ ފަރާތްތަކުން ބުނަމުންދަނީ، މި ހަރަކާތްތަކުގެ ސަބަބުން ނަފުރަތު އުފެދި، މިއީ ޔަހޫދީންނާ ދެކޮޅުވެރިކަން ފާޅުކުރާ މައިގަނޑު މަރުކަޒަކަށް ވެފައިވާ ކަމަށެވެ.
މުޒާހަރާގެ ބައިވެރިން ބުނަމުންދަނީ، އެމީހުން ބޭނުންކުރަމުންދަނީ ގާޒާގެ މަސްރަހާ ގުޅޭ އިންސާނީ ހައްގުތަކާއި ސިޔާސީ މައްސަލަތަކަށް ސަމާލުކަން ހޯދުމަށް ލިބިދީފައިވާ ޑިމޮކްރެޓިކް ހައްގު ކަމަށެވެ.
މިކަމާ ގުޅޭގޮތުން އަޅާ ހަރުކަށި ފިޔަވަޅުތައް އަމާޒުކުރަންވީ ހަމައެކަނި މުޒާހަރާތަކުގައި ބޭނުންކުރާ ޝިއާރުތަކާއި ބެނާތަކަށްތޯ ނުވަތަ މުޒާހަރާތައް މުޅިން ހުއްޓުވަންތޯ ސުވާލުކުރުމުން ސްޓާމާ ވިދާޅުވީ، މުޒާހަރާތައް މުޅިން ހުއްޓުވަންޖެހޭ ހާލަތްތައް ވެސް އަންނާނެ ކަމަށެވެ.
