ރަޝިޔާގެ ދެކުނުގެ ސަރަހައްދެއްގެ ގޮނޑުދޮށަކަށް ދިން ޑްރޯން ހަމަލާއެއްގައި ތިން ކުޑަކުދިން ހިމެނޭހެން ޖުމްލަ ހަތް މީހަކު މަރުވެއްޖެ އެވެ.
ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، ގޮނޑުދޮށާއި މޫދުގައި ގިނަ ބަޔަކު ތިއްބާ، ވަރަށް ބާރުމިނުގައި އައި ޑްރޯނެއް ގޮނޑުދޮށަށް ވެއްޓި ބޮޑު އަލިފާންގަނޑަކަށް ބަދަލުވެގެންދެ އެވެ.
ކްރަސްނޯޑާ ސަރަހައްދުގެ ގަވަރުނަރު ވެނިއަމިން ކޮންޑްރަޓްޔޭވް ވިދާޅުވި ގޮތުގައި، މި ހާދިސާގައި ޒަހަމްވި މީހުންގެ ޖުމްލަ އަދަދު މިހާރު ވަނީ 40 އަށް އަރާފަ އެވެ. މީގެ ތެރެއިން 17 މީހަކަށް ހޮސްޕިޓަލުގައި ދަނީ ފަރުވާ ދެމުންނެވެ.
މިއީ އާންމު ރައްޔިތުންނަށް އަމާޒުކޮށް ޔޫކްރޭނުން ގަސްތުގައި ދިން ހަމަލާއެއް ކަމަށް ގަވަރުނަރު ތުހުމަތު ކުރެއްވި ނަމަވެސް، ޔޫކްރޭނުން މިކަމާ ގުޅޭ ގޮތުން އަދި އެއްވެސް އެއްޗެއް ބުނެފައެއް ނުވެ އެވެ.
މި ޑްރޯން ހަމަލާ އަމާޒުކުރީ ކޮން ތަނަކަށް ކަމެއް އަދި ސާފެއް ނުވެ އެވެ. ޔޫކްރޭނުގެ ބައެއް ޓެލެގްރާމް ޗެނަލްތަކުން ބުނާ ގޮތުގައި، ޑްރޯން ގޮނޑުދޮށަށް ވެއްޓުނީ އިލެކްޓްރޯނިކް ވޯފެއާ ސިސްޓަމްތައް ބޭނުންކޮށްގެން ޑްރޯންގެ ސިގްނަލް ޖޭމްކޮށްލުމާ ގުޅިގެންނެވެ.
ވޭތުވެދިޔަ އަހަރުގެ ތެރޭގައި، ރަޝިޔާގެ ސަރަހައްދުތަކަށް ދުރު ރާސްތާގެ ހަމަލާތައް ދިނުމުގައި ޔޫކްރޭނުން ވަނީ ބޮޑެތި ކާމިޔާބީތަކެއް ހޯދާފަ އެވެ. މިގޮތުން ހަކަތަ އުފައްދާ މަރުކަޒުތަކާއި، އަސްކަރީ ގުދަންތަކަށް ޔޫކްރޭނުން ދަނީ ހަމަލާދެމުންނެވެ.
މިފަދަ ހަމަލާތަކުގައި އާންމުން މަރުވާ ހާދިސާތައް ދަނީ އިތުރުވަމުންނެވެ. އެގޮތުން މިދިޔަ ހަފުތާ ބަންދުގައި ރަޝިޔާގެ އެކި ސިޓީތަކަށް ދިން ހަމަލާތަކުގައި އަށް މީހަކު ވަނީ މަރުވެފަ އެވެ.
ފެބްރުއަރީ 2022 ގައި ފެށި ހަނގުރާމައާ އެކު، ރަޝިޔާއިން ދަނީ ޔޫކްރޭނުގެ މީހުން ދިރިއުޅޭ ސަރަހައްދުތަކަށާއި ސިޓީތަކަށް މެދުނުކެނޑި ހަމަލާދެމުންނެވެ.
